Змякчылі забарону на працу трэнерам без дыплома. Ранейшыя патрабаванні аказаліся нерэалістычнымі
Міністэрства спорту і турызму змяніла ранейшую пастанову аб праходжанні акрэдытацыі для работнікаў спартыўнай сферы. Улічылі просьбы і скаргі трэнераў, якія з 1 студзеня 2024 года маглі застацца без працы з-за фармальных прычын, піша Tochka.by.
Паводле ранейшых правіл, да 1 студзеня 2024 года работнікі спартыўнай сферы павінны былі прайсці акрэдытацыю. Абавязковай для гэтага ўмовай мусіла стаць наяўнасць вышэйшай адукацыі, якую мелі далёка не ўсе прадстаўнікі са спартыўнай галіны і фітнэс-сферы.
Новая пастанова Мінспорту, якая ўносіць змены ў раней адкарэктаваную інструкцыю, апублікаваная на Нацыянальным прававым інтэрнэт-партале. Цяпер фітнэс-трэнеры і педагогі без вышэйшай адукацыі змогуць працягнуць працу ў сваёй галіне пры ўмове, што яны ўжо праходзяць адпаведную перападрыхтоўку па групе спецыяльнасцяў «Фізічная культура і спорт» (і былі прынятыя на працу да 1 студзеня 2024 года). Дакумент ужо ўступіў у сілу.
Ранейшыя патрабаванні выклікалі хвалю абурэнняў ад прадстаўнікоў фітнэс-сферы, бо там часта працуюць тыя, хто скончыў толькі розныя курсы.
Пры гэтым многія трэнеры адзначалі: яны гатовыя жыць па новых правілах, але ім не хапае часу, каб атрымаць адукацыю і прайсці акрэдытацыю ў тэрмін. Да таго ж у інстытутах перападрыхтоўкі і павышэння кваліфікацыі проста няма месцаў для ўсіх ахвотных. Цяпер, дарэчы, запісацца на такую перападрыхтоўку ў адну з навучальных устаноў можна толькі на верасень 2024 года.
Каментары