Беларускі абураюцца адвэнт-календаром ад Luxvіsage — і не толькі з-за цаны
Беларускі брэнд касметыкі Luxvіsage выпусціў свой адвэнт-каляндар. Набыць такі пакуль можна толькі праз расійскі маркет-плэйс. Падарункі і ў ім паасобку каштуюць у два разы танней, чым сам набор. Але ў беларусак і іншыя пытанні да брэнду.
Па-першае, дзіўна, што такі набор беларускай касметыкі нельга набыць у Беларусі. На афіцыйнай старонцы брэнду ў інстаграме раяць замаўляць адвэнт-каляндар на расійскім маркет-плэйсе Wildberries.
Па-другое, агляды на адвент-каляндар Luxvіsage пачалі рабіць расійскія блогеркі. Выглядае так, быццам брэнд даслаў навінку менавіта ім, праігнараваўшы беларускіх.
Узнікаюць пытанні і наконт таго, у які ж дзень пачынаць распакоўку адвэнт-календара. Бо звычайна ў Еўропе з яго дапамогай чакаюць Каляды (таму акенцаў з мініяцюрнымі падарункамі 24 ці 25). Апошнім часам з’явіліся варыянты і для нерэлігійных людзей — на 30 ці 31 акенца, каб чакаць Новы год.
Але ў адвент-календары Luxvіsage усяго 12 акенцаў. У каментарыях сумна жартуюць, што, мабыць, пачынаць распакоўку трэба за 12 дзён да наступнай зарплаты, каб весялей было чакаць дня, калі нарэшце зноў дазволіш сабе набыць ежы пасля дарагога падарунка.
Ну і галоўнае пытанне датычыцца кошту. За 12 танных беларускіх прадуктаў прапануюць заплаціць 257 рублёў.
Галоўны прынцып адвэнт-календароў ад еўрапейскіх брэндаў касметыкі заключаецца ў тым, што пакупнік атрымлівае прадуктаў на большую суму, чым заплаціў. Напрыклад, аддаў 100 еўра, а атрымаў б'юці-сродкаў на 200. Канешне, там ёсць свае хітрасці. Напрыклад, часта кладуць прадукты, якія звычайна не карыстаюцца вялікай папулярнасцю (памаду не самага хадавога адцення ці яшчэ нешта такое). Але з большага людзі застаюцца задаволенымі.
У Luxvіsage атрымліваецца, што набыць падарункі асобна будзе ў два разы танней, чым калі замовіш адвэнт-каляндар цалкам. Мы падлічылі кошт усіх прадуктаў у адвэнце Luxvіsage, карыстаючыся тым самым Wildberries — атрымалася каля 128 рублёў.
У інстаграме Luxvіsage шмат абураных беларусак, якія таксама не паленаваліся самастойна падлічыць агульны кошт падарункаў. Жанчыны пытаюцца, чым можна гэта растлумачыць. Найбольш папулярны варыянт: «Мабыць, кардон такі дарагі». Прадстаўнікі брэнду негатыў пакуль ігнаруюць.
Сёлета Luxvіsage актыўна замаўляў рэкламу сваёй касметыкі ў топавых расійскіх блогерак. Нават Ксенія Сабчак прызнавалася ў любові да тушы для веек Luxvisage XXL і гелю для броваў таго ж брэнду.
Тады падпісчыц з Беларусі найбольш хваляваў той факт, дзе супербюджэтны беларускі брэнд знайшоў грошы на рэкламу ў Сабчак. Хтосьці выказаў здагадку, што маркетолагам Luxvisage прыйшлося прадаць душу д'яблу. А адна дзяўчына пажартавала: «Усёй Беларуссю скідаліся вам на рэкламу». Мабыць, у тым жарце была частка праўды.
Каментары
Чаму кіраўніцы выбарчага штабу Ціханоўскай можна Тэслу купляць, Вячорку насіць гадзіннік за тысячы даляраў, Красулінай навучаць дзяцей у Берліне невядома за якія грошы, Ціханоўскай жыць невядома за колькі і адкуль атрыманае, а простым людзям нельга купіць тое, што яны хочуць, за свае?