20-гадовай дзяўчыне далі год «хіміі» за тое, што збіла на самакаце малое дзіця
Здарэнне адбылося ў жніўні ў Бабруйску на вуліцы Максіма Горкага.
Дзяўчына на электрасамакаце праявіла няўважлівасць і наехала на пяцігадовую дзяўчынку, паведамляе Генпракуратура.
Той былі нанесеныя цяжкія цялесныя пашкоджанні: закрыты пералом правай вялікабярцовай косткі галёнкі і гематомы.
Дзяўчына на судзе прызнала сваю віну. Яна сказала, што не тармазіла, бо да апошняга моманту думала, што дзіця адыдзе ў бок.
Ёй інкрымінавалі прычыненне цяжкага цялеснага пашкоджання па неасцярожнасці, і суд прызначыў год абмежавання волі з накіраваннем у папраўчую ўстанову адкрытага тыпу («хімію»).
Прысуд у законную сілу не ўступіў, можа быць абскарджаны і апратэставаны ў апеляцыйным парадку.
Каментары