Зяленскі: Не хачу ехаць у Вільню дзеля забавы, Украіна павінна атрымаць гарантыі бяспекі
Прэзідэнт Украіны падкрэсліў, што саміт NATO вельмі важны і «гэта справа палітычнай волі — знайсці патрэбныя фармулёўкі і запрасіць Украіну».
Прэзідэнт Уладзімір Зяленскі заявіў, што не хоча ехаць на саміт NATO ў Вільні «дзеля забавы» і чакае, што Украіна атрымае запрашэнне ў Альянс і гарантыі бяспекі на перыяд, пакуль яна не з'яўляецца чальцом NATO. Пра гэта ён заявіў у інтэрв'ю ABC news.
Прэзідэнт Украіны падкрэсліў, што саміт NATO вельмі важны і «гэта справа палітычнай волі — знайсці патрэбныя фармулёўкі і запрасіць Украіну».
«Гэта будзе важны мэсэдж, што NATO не баіцца Расіі. Украіна павінна атрымаць дакладныя гарантыі бяспекі, пакуль яна не ў NATO. Гэта вельмі важна. Толькі ў гэтых умовах наша сустрэча будзе мець сэнс. Інакш гэта чарговая палітыка», — сказаў Зяленскі.
На рэпліку вядучай «Гучыць так, што вы наўрад ці паедзеце» Зяленскі ўсміхнуўся і адказаў: «Чаму? Я думаю, мы зробім шмат працы».
У нядзелю віцэ-прэм'ер у пытаннях еўрапейскай і еўраатлантычнай інтэграцыі Вольга Стэфанішына заявіла, што пакуль няма фінальнага рашэння наконт удзелу Зяленскага ў Віленскім саміце NATO, які пройдзе 11-12 ліпеня.
Каментары