Алексіевіч: Мы ўсе павінны дапамагаць Украіне, мы павінны перамагчы Пуціна
Нобелеўская лаўрэатка па літаратуры Святлана Алексіевіч падчас уручэння ёй рэгалій ганаровага доктара ўніверсітэта Вітаўта Вялікага ў Каўнасе падкрэсліла, што пасля абвяшчэння Расіяй частковай мабілізацыі Украіна як ніколі мае патрэбу ў дапамозе Захаду, паведамляе Delfi.
Алексіевіч выказала перакананне, што вайна хутка не скончыцца праз прадузятасці супраць Захаду самога расійскага народа, які доўга кармілі прапагандай.
«Я думаю, што вайна будзе яшчэ даўжэйшай і наша дапамога, дапамога Захаду павінна быць яшчэ большай. Таму што Расія — велізарная краіна. Што значыць мабілізацыя? Гэта велізарная колькасць людзей.
І не відаць, каб у Расіі нешта адбылося, нейкі рэвалюцыйны пераварот, пакуль гэтага не відаць», — сказала Алексіевіч журналістам у Каўнасе.
На пытанне, ці спадзяецца яна, што сітуацыя ў Беларусі зменіцца, яна адказала, што ў аўтарытарных рэжымаў не атрымаецца «спыніць час».
«Але на сённяшні момант усё залежыць ад таго, што будзе ва Украіне. Мы ўсе павінны дапамагаць Украіне, мы павінны перамагчы Пуціна», — сказала яна.
Па словах пісьменніцы, яна не ведае, што трэба зрабіць, каб змянілася і расійскае грамадства, таму што большая яго частка цалкам давярае свайму кіраўніцтву з-за прапаганды, якая вядзецца ўжо шмат гадоў.
«Я шмат ездзіла па Расіі. І як быццам спіць народ, як быццам ён перакормлены гэтым тэлебачаннем. Тое, што людзі кажуць, у гэта нават не верыцца.
Я памятаю — бамбяць Харкаў, сціраюць з твару зямлі, а жанчына кажа: так, у мяне там жыве сястра, яе дом разбамбілі, але я ўсё роўна веру ў нашага прэзідэнта», — распавяла Алексіевіч пра свой досвед.
«Пуцін уклаў шмат грошай у прапаганду, і ён зрабіў гэта з народам. І хоць цяпер усё паварочвае назад, гэта вельмі доўга», — падсумавала нобелеўская лаўрэатка.
Афіцэр-пагранічнік, які прайшоў праз турму, расказвае пра жыццё «да» і «пасля» дый не шкадуе слоў пагарды для амапаўцаў3
Каментары