Супраць рэгіянальнага выдання «Медыя-Палессе» завялі новую справу за «пагрозу нацыянальнай бяспецы краіны»
Заяву ў міліцыю напісала настаўніца Мікашэвіцкай СШ №2, дзе вучылася кандыдатка ў прэзідэнты Святлана Ціханоўская, паведамляе БАЖ.
На «Медыя-Палессе» выйшла публікацыя «Настаўнік Ціханоўскай: «Гэта яна за мужам, як за дзекабрыстам пайшла. Не толькі характар, але і любоў сваю праявіла». Настаўніца Іна Кухарава, імя якой згадвалася ў артыкуле, запатрабавала абвергнуць інфармацыю пра тое, што яна вучыла Ціханоўскую і параўноўвала яе з дэкабрысткай.
Як высветлілася, карэспандэнт Анатоль Крэйдзіч, апытаўшы многіх людзей на радзіме Святланы Ціханоўскай у Мікашэвічах — настаўнікаў, суседзяў, аднакласнікаў, — цытату, сказаную іншым настаўнікам, памылкова прыпісаў Кухаравай.
Пра заяву рэдактар сайта Святлана Гарда даведалася па тэлефоне ад супрацоўніка Мікашэвіцкага аддзялення міліцыі.
«Звязаўшыся з настаўніцай і высветліўшы патрабаванні заяўніцы, апублікавалі абвяржэнне і ўнеслі праўку ў артыкул аб Ціханоўскай, — распавяла Святлана Гарда службе маніторынгу ГА «БАЖ». — Але гэта не дапамагло. Міліцыя пачала адміністрацыйны працэс супраць ААТ «МП компані», уладальніка сайта».
Міліцыянт прыехаў апытваць дырэктара ТАА «МП компані» Максіма Гарда з гатовым аддрукаваных пратаколам.
Згодна з інкрымінаваным артыкулам (ч. 3-1 арт. 22.9 КаАП «Распаўсюд сродкам масавай інфармацыі інфармацыі, распаўсюджванне якой забаронена ў сродках масавай інфармацыі…»), публікацыя ў «Медыя-Палессе» нанесла шкоду нацыянальным інтарэсам Рэспублікі Беларусь, спрыяла нагнятанню сацыяльнай напружанасці ў грамадстве, стварэнню панічных настрояў, вядзе да масавага дэзынфармавання насельніцтва і парушае канстытуцыйнае права грамадзян на атрыманне поўнай, дакладнай i своечасовай iнфармацыi.
Сведкам прызнаны Анатоль Крэйдзіч. Пацярпелых няма.
Анатоль Крэйдзіч у штат рэдакцыі прыняты нядаўна, журналіст і рэдактар больш чым з 30-гадовым стажам, аўтар шэрагу кніг, намеснік старшыні Саюза пісьменнікаў Беларусі.
«Гэта чарговы крок уладаў задушыць незалежны рэсурс, у тым ліку эканамічнымі санкцыямі», — падкрэсліла Святлана Гарда.
Нагадаем, па рашэнні суда Лунінецкага раёна, рэдакцыя ў ліпені выплаціла штраф у памеры 120 базавых велічынь — 3240 рублёў.
Афіцэр-пагранічнік, які прайшоў праз турму, расказвае пра жыццё «да» і «пасля» дый не шкадуе слоў пагарды для амапаўцаў3
Каментары