Kolkaść niezadavolenych žyćciom rasijan skaraciłasia da histaryčnaha minimumu — «Levada-centr»
Tolki 12% udzielnikaŭ lipieńskaha apytańnia «Levada-centra» skazali, što žyćcio, jakoje jany ciapier viaduć, ich nie zadavalniaje. Pavodle sacyjałahičnaj słužby, heta samy nizki pakazčyk za ŭsiu historyju nazirańniaŭ, piša «Ahientstvo».
Žyćcio, jakoje viaduć apytanyja sacyjołahami rasijanie, zadavalniaje 54% respandentaŭ, paviedamiŭ «Levada-centr». Paśla nievialikaha źnižeńnia hety pakazčyk nabliziŭsia da piku, zafiksavanaha ŭ krasaviku 2023 hoda — 55%.
Bolš za inšych žyćcio zadavalniaje moładź da 24 hadoŭ (75%), respandentaŭ, jakija ličać, što spravy ŭ krainie iduć u pravilnym kirunku (63%), i tych, chto padtrymlivaje Uładzimira Pucina na pasadzie prezidenta (59%).
Mienš za ŭsio žyćcio zadavalniaje rasijan ad 55 hadoŭ (48%), tych, kamu ledź chapaje na ježu (34%), tych, chto ličyć, što spravy ŭ krainie iduć niapravilnym šlacham (27%), i respandentaŭ, jakija nie padtrymlivajuć Pucina (21%).
Pavodle śćviardžeńnia dyrektara «Levada-centra» Dzianisa Vołkava, skaračeńniu kolkaści niezadavolenych svaim žyćciom rasijan paspryjaŭ dośvied žyćcia pad sankcyjami i adsutnaść nieabchodnaści aktyŭna ŭdzielničać u vajnie.
Bolšaść apytanych rasijan zmahli prymirycca z vajnoj va Ukrainie i sankcyjami dziakujučy tamu, što jany niepasredna nie ŭciahnutyja ŭ vajnu i mohuć praciahvać žyć zvyčajnym žyćciom, a taksama zmahli nazapasić dastatkovyja resursy ŭnutry siamji i majuć dośvied pieraadoleńnia kryzisnych situacyj.
Źmianić staŭleńnie da taho, što adbyvajecca ŭ krainie, mohuć tolki masavyja ŭzrušeńni, apošnim ź jakich była mabilizacyja vosieńniu 2022 hoda, skazaŭ Vołkaŭ u kamientary «Ahientstvu».
Padtrymlivać pazityŭny nastroj ludziam dapamahaje ŭpeŭnienaść u tym, jany zmohuć prystasavacca da mahčymych ciažkaściaŭ u ekanomicy dziakujučy nazapašanamu vopytu i resursam, padtrymcy siamji, a časam i dziaržavy.
Rost represij i ŭvarvańnie USU ŭ Kurskuju vobłaść naŭrad ci zmohuć akazać surjozny ŭpłyŭ na acenku žyćcia ŭ Rasiei, ličyć Vołkaŭ. Pavodle jaho słoŭ, represii dla bolšaści ludziej «chutčej, niekatory fon, jaki jany ŭličvajuć, ale niepasredna heta ich žyćcio nie zakranaje».
Niahledziačy na bajavyja dziejańni ŭ Kurskaj vobłaści, bolšaść rasijan praciahvaje vieści zvyčajnaje žyćcio, tamu ŭździejańnie na acenki moža być abmiežavanym, śćviardžaje Vołkaŭ.
Situacyja, pa słovach sacyjołaha, nie źmienicca, kali nie budzie novaj mabilizacyi.
«Ułady ad zvyčajnych ludziej aktyŭnaha ŭdziełu [u vajnie] nie patrabujuć, samy vialiki šok i stres vyklikała častkovaja mabilizacyja ŭ 2022 hodzie, tamu što patrabavała ŭdziełu i spačatku niavyznačanaha koła asob. Ciapier byccam by ŭłady sprabujuć hetaha paźbiehnuć», — skazaŭ Vołkaŭ.
Varta, adnak, adznačyć, što da vynikaŭ sacyjałahičnych apytańniaŭ va ŭmovach, kali ŭ krainie ŭstalavaŭsia represiŭny aŭtarytarny režym, zaŭsiody treba stavicca krytyčna. Zusim niezaležnaja sacyjałohija pry takoj situacyi naŭrad ci mahčymaja, a vielmi aptymistyčnyja ličby, jakija jana fiksuje, ź vialikaj vierahodnaściu mohuć być vynikam uładnaj zamovy. Da taho ž vyniki mohuć karektavacca ŭ adpaviedny bok faktaram strachu.
«Rasija łže nakont ekanamičnaha rostu. Sankcyi pracujuć, ich treba ŭzmacnić» — ministry finansaŭ ES
Raspaviadajem, jak nakručvajuć hałasy ŭ anłajn-apytankach i kolki heta kaštuje
Biełarusam telefanujuć z rasijskich numaroŭ z sacyjałahičnymi apytańniami. Čym cikaviacca?
Pierałom u nastrojach rasijan: chočuć pieramoŭ z Ukrainaj, a nie praciahu vajny
Biełaruskaja błohierka pracavała na rasijskaj apazicyjnaj fabrycy botaŭ, a paśla źliła dakumienty?43
Kamientary