Pierałom u nastrojach rasijan: chočuć pieramoŭ z Ukrainaj, a nie praciahu vajny
Rasijskija ŭłady zaŭvažyli źnižeńnie hramadskaj padtrymki vajny na fonie pastajannych paražeńniaŭ na froncie i mabilizacyi. U rasparadžeńnie «Mieduzy» patrapili vyniki apošniaha zakrytaha sacapytańnia, praviedzienaha Fiederalnaj słužbaj achovy (takija daśledavańni robiacca na zamovie Kramla i tolki dla ŭnutranaha karystańnia). Pa hetych danych, za mirnyja pieramovy z Ukrainaj ciapier vystupaje kala 55% rasijan, a za praciah vajny — tolki 25%.
Hetyja ličby ŭ cełym supadajuć z vynikami kastryčnickaha apytańnia «Levada-Centra», adzinaha bujnoha niezaležnaha sacyjałahičnaha centra ŭ Rasii. U spravazdačy «Levady» «za» i «chutčej, za» mirnyja pieramovy vystupiła 57% respandentaŭ; «za» i «chutčej, za» praciah bajavych dziejańniaŭ — 27%.
Pry hetym, miarkujučy pa zakrytych sacapytańniach FSA, staŭleńnie rasijan da vajny rezka pahoršyłasia mienavita apošnim časam. Jašče ŭ lipieni 2022 hoda apytańni pakazvali, što za mir z Ukrainaj vystupaje tolki 30% rasijan.
Pa słovach dźviuch krynic «Mieduzy», blizkich da administracyi prezidenta (AP), pa hetaj pryčynie rasijskija ŭłady płanujuć abmiežavać kolkaść adkrytych apytańniaŭ ab adnosinach rasijan da vajny (raniej ich, naprykład, rehularna pravodziŭ dziaržaŭny VCIOM).
«Namierać ciapier možna ŭsiakaha, lepš hetaha nie rabić», — padkreśliła krynica «Mieduzy», blizkaja da Kramla. Adzin z palittechnołahaŭ taksama zajaviŭ, što ciapier «dynamiku [adnosiny rasijan da vajny] lepš nie davać».
Dyrektar «Levada-Centra» Dzianis Vołkaŭ u razmovie z «Mieduzaj» pakazvaje, što kolkaść rasijan, jakija vystupajuć za pieramovy z Ukrainaj, pačała chutka raści paśla abviaščeńnia mabilizacyi 21 vieraśnia:
«Heta niežadańnie hramadzian asabista ŭdzielničać u vajennych dziejańniach. Ich padtrymka [bajavych dziejańniaŭ] zastajecca vysokaj, ale žadańnie asabista ŭ hetym udzielničać u ludziej davoli nievialikaje.
Akramia taho, padtrymka z samaha pačatku była dekłaratyŭnaj na fonie taho, što ludzi heta ŭsprymali jak niešta ich nie datyčnaje — «žyćcio praciahvajecca i navat naładžvajecca». Ciapier ryzyka vyrasła i ludzi chočuć, kab pieramovy ŭžo pačalisia. Pry hetym pakul bolšaść usio roŭna pakidaje heta na vodkup ułady: «My chacieli b, ale vyrašać buduć jany».
Sacyjołah Ryhor Judzin u razmovie z «Mieduzaj» taksama źviazaŭ rost kolkaści prychilnikaŭ pieramoŭ z mabilizacyjaj. Pavodle jaho acenki, vosieńniu rasijanie sutyknulisia z «razbureńniem štodzionnaści i adčuvańniem niebiaśpieki». Jašče adnym arhumientam dla rasijan na karyść pieramoŭ Judzin ličyć «stratu viery ŭ pieramohu praz parazy na froncie i adsutnaść pierakanaŭčaj teoryi taho, jak mienavita Rasija pieramoža».
«Pry hetym ja nie ździŭlusia, kali heta spałučajecca z vostrym adčuvańniem niebiaśpieki dla krainy. U tym sensie, što pieramovy i [nastupnaja] lehalizacyja anieksii [novych ukrainskich terytoryj] pavinny zaścierahčy krainu», — dadaŭ jon.
Na dumku Judzina, takuju niezadavolenaść chodam vajny možna nazvać, chutčej, «apatyčnaj». Tym nie mienš jon nie vyklučyŭ mahčymaść antyvajennych pratestaŭ, bo «pratesty ŭźnikajuć nie tamu, što ludzi niešta dumajuć, a tamu što dla ich uźnikajuć mahčymaści. Pratesny patencyjał u Rasii i biez taho vielmi vysoki. Kali źjaviacca mahčymaści, buduć pratesty. Całkam mahčyma, što čakać zastałosia nie tak doŭha».
Jak kažuć krynicy «Mieduzy», blizkija da Kramla, sami ŭłady nie vielmi vierać, što ŭ bližejšy čas u Rasii razhornucca masavyja antyvajennyja vystupleńni.
Zrešty, surazmoŭcy pryznajuć, što ciapier «situacyju lepš nie padahravać i nie razdražniać ludziej lišni raz». Pavodle infarmacyi krynic «Mieduzy«, dziaržaŭnyja i praŭładnyja ŚMI ŭžo atrymali rekamiendacyi «nie piedalavać temu vajny» — i zasiarodzicca na «bolš pazityŭnym paradku».
Palitołah Uładzimir Hielman zajaŭlaje, što dynamika staŭleńnia rasijan da vajny naŭrad ci padšturchnie rasijskija ŭłady da adekvatnych pieramoŭ z Ukrainaj. Miarkujučy pa ŭsim, rasijski bok «nie hatovy iści na sastupki». «Dy i ŭ cełym pierśpiektyvy pieramoŭ zaležać ad chodu bajavych dziejańniaŭ, a zusim nie ad pieravah udzielnikaŭ apytańniaŭ», — nahadvaje Hielman.
Jak raniej pisałasia, Pucin sapraŭdy nie hatovy admaŭlacca ad damahańniaŭ ukrainskich terytoryj, a svaimi namiokami na pieramovy jon tolki sprabuje vyjhrać čas dla padrychtoŭki novaha nastupu. Jak śćviardžajuć krynicy, blizkija da Kramla, ad svaich płanaŭ Pucin nie admoviŭsia — i zimoj u Rasii mahčymaja «novaja chvala» mabilizacyi. Nakolki masavaj jana budzie, nieviadoma.
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?7676
Kamientary