Tramp nazvaŭ adnoj z pryčyn uvarvańnia Rasii va Ukrainu słovy Bajdena
Eks-prezident ZŠA i kandydat na vybarach-2024 daŭ intervju Iłanu Masku. Tam Tramp vykazaŭsia nakont vajny va Ukrainie.
Tramp daŭ zrazumieć, što vajna pačałasia z-za «durnych rečaŭ», jakija zrabiŭ Bajden — naprykład, zajaŭ, što Ukraina moža być u NATO, paviedamlaje «Politika strany»
Taksama jon nazvaŭ Pucina «dobrym pieramoŭščykam» i zajaviŭ, što va Ukrainy «niama ludziej» dla pieramohi.
«Kali ja syšoŭ [z pasady prezidenta ZŠA ŭ studzieni 2021 hoda], jany pačali farmavać vialikaje vojska na miažy z Ukrainaj. Ja dumaŭ, što ŭ vypadku z Pucinym, a jon dobry pieramoŭščyk, jany robiać heta, kab vieści pieramovy.
A potym Bajden pačaŭ kazać durnyja rečy. Naprykład, jon skazaŭ, što Ukraina moža być u NATO. Kolki NATO isnavała, stolki Rasija kazała, što nikoli na heta nie pojdzie. A tut my biarem i havorym heta. Bo ŭ nas prezident ź nizkim IQ. U jaho jon byŭ nizki jašče 30 hadoŭ tamu, a ciapier, napeŭna, naohuł jaho niama. Rasija pieramahła Hiermaniju razam z nami. Napaleon. U ich vielizarnaja siła. A va Ukrainy ciapier navat ludziej niama. Jany adpraŭlajuć na vajnu maładych i pažyłych ludziej. My ŭ žudasnym stanoviščy», — skazaŭ Tramp.
Jon taksama zajaviŭ, što płanuje «paładzić» z Pucinym. I paviedamiŭ, što pahražaŭ jamu ŭ pieryjad svajho prezidenctva, kali toj atakuje Ukrainu.
«Ja skazaŭ Uładzimiru Pucinu: «Nie rabi hetaha. Ty nie možaš heta zrabić, Uładzimir. Drennyja dni pryjduć. Nie rabi hetaha». Ja skazaŭ jamu, što ja zrablu ŭ adkaz na jaho dziejańni. Jon skazaŭ: «Heta niemahčyma». Ja skazaŭ: «Jašče jak mahčyma». Heta była naša apošniaja razmova. Jon by nikoli hetaha nie zrabiŭ. Ja ładziŭ ź im. Ja spadziajusia, i ciapier ź im zładzić. Heta budzie vielmi dobra», — skazaŭ Tramp.
Jon taksama abvinavaciŭ Abamu z Bajdenam, što tyja zrabili sajuźnikami i Rasiju, i Kitaj.
«Kali vy student histaryčnaha fakulteta, to vy pieršym čynam pavinny zrazumieć, što nielha dapuścić supadzieńnia Rasii i Kitaja», — dadaŭ Tramp.
Sa słoŭ kandydata ad respublikancaŭ, śvietu ciapier pahražaje jadziernaja katastrofa, a nie klimatyčnaja.
«Ludzi kažuć pra hłabalnaje paciapleńnie, źmianieńnie klimatu, ale jany nikoli nie kažuć pra jadziernaje «paciapleńnie». A heta prablema siońnia. U nas jość piać krain ź vialikaj jadziernaj mahutnaściu. Jašče i inšyja da ich dałučajucca. Heta vielmi niebiaśpiečna. I kali ja kažu, što praduchilu Treciuju suśvietnuju vajnu, ja mienavita heta i zrablu. Ale praŭda ŭ tym, što hetaja vajna ŭžo budzie nie pra vojska, tanki i sałdat, jakija stralajuć adzin u adnaho. Heta budzie inšy ŭzrovień razbureńniaŭ, jaki jašče nichto nikoli nie bačyŭ», — skazaŭ Donald Tramp.
U razmovie z Trampam Mask prapanavaŭ siabie na pasadu ŭ jahonaj administracyi, kali toj vierniecca ŭ Bieły dom. Miljarder kaža, što moža dapamahčy «strymlivać dziaržaŭnyja vydatki». Tramp adkazaŭ, što jamu było b heta pryjemna, bo miljarder źjaŭlajecca «vydatnym ekanamistam».
Intervju ŭ žyvym efiry prahledzieli 1,3 miljona čałaviek.
Kamientary
pies da boł..