Sabaki čujuć pa pachu, kali čałaviek u stresie. I voś što jany tady robiać
Vučonyja vyśvietlili novyja cikavyja fakty pra sabak i ich pavodziny.
Vyniki novaha daśledavańnia navukoŭcaŭ z Univiersiteta Brystola byli apublikavanyja ŭ časopisie Scientific Reports.
Dla svajho ekśpierymientu navukoŭcy nabrali 18 sabak roznych parod viekam ad vaśmi miesiacaŭ da dziesiaci hadoŭ.
Padčas vyprabavańniaŭ sabak navučyli tamu, što miska ź ježaj znachodzicca ŭ kankretnym miescy, kali ŭ inšym, to ježy tam niama. Jak tolki sabaka razumieŭ roźnicu pamiž hetymi miescami misak, jon chutčej padychodziŭ da miesca z pačastunkam, čym da pustoha miesca.
Potym daśledčyki pravieryli, jak chutka sabaka padychodziŭ da miski ź ježaj, jakaja raźmieščanaja ŭ adnym z troch novych miescaŭ pamiž dvuma zychodnymi.
Chutki padychod adlustroŭvaŭ «aptymizm» adnosna prysutnaści ježy ŭ hetych nieadnaznačnych miescach. Heta słužyła markioram stanoŭčaha emacyjnaha stanu. Pavolny padychod śviedčyŭ pra «piesimizm» i admoŭnyja emocyi.
Na nastupnym etapie pierad tym, jak puścić sabak da vybaru miski, ich padviarhali ŭździejańniu pachu potu nieviadomych im ludziej (usiaho było nabrana adzinaccać dobraachvotnikaŭ). Hetyja pachi sabrali ŭ toj čas, kali ŭdzielniki vyrašali składanyja matematyčnyja zadačy, što vyklikała ŭ ich stres, albo słuchali zaspakajalnuju muzyku, jakaja vyklikała rassłableńnie.
Vyniki pakazali, što sabaki, jakija ŭdychnuli pach rassłablenaha čałavieka, chutčej padychodzili da miski, jakaja znachodziłasia ŭ novym miescy, demanstrujučy tym samym aptymizm adnosna taho, što ŭ miscy budzie ježa. Tyja ž sabaki, jakija adčuli pach stresu, pavodzili siabie aściarožniej, što vučonyja interpretavali jak piesimizm.
Daśledčyki miarkujuć, što takaja «piesimistyčnaja» reakcyja adlustroŭvaje niehatyŭny emacyjny stan i, mahčyma, dla sabaki heta sposab ekanomić enierhiju i paźbiahać rasčaravańnia.
Na dumki aŭtaraŭ, ich adkryćcio moža dapamahčy prafiesijnym kinołaham i ŭładalnikam sabak zrazumieć, jak ich ułasnyja emocyi ŭpłyvajuć na dresiroŭku sabak. Heta taksama moža być važnym faktaram dla słužbovych sabak, jakija vykonvajuć funkcyi ŭ stresavych umovach, naprykład, u palicyi ci pry praviadzieńni pošukava-vyratavalnych apieracyj.
«Sabačniki viedajuć, nakolki ich hadavancy ŭsprymalnyja da ich emocyj, ale tut my pakazvajem, što navat pach nieznajomaha čałavieka, jaki znachodzicca ŭ stresie, upłyvaje na emacyjny stan sabaki, jaho ŭsprymańnie ŭznaharody i zdolnaść da navučańnia. Kinołahi časta apisvajuć stres, jaki pieradajecca pa švorcy, ale my taksama pakazali, što jon moža pieradavacca i pa pavietry», — adznačajuć aŭtary.
Kamientary
Duj u Jeúrajopt za dvušačkaj!)