«U ZUS akruhlili vočy: jany nikoli pra takoje nie čuli». Jak biełarusy pieravodzili piensiju ź Biełarusi ŭ Polšču

Jak heta pracuje? 

Raniej kožnaja kraina pry naličeńni piensij uličvała tolki strachavy staž (pieryjady, kali rabotnik płaciŭ unioski ŭ miascovy fond sacyjalnaj abarony) u krainie. Ale ŭ 2022-m nabyło moc Pahadnieńnie ab sacyjalnym zabieśpiačeńni pamiž Polščaj i Biełaruśsiu, jakoje krainy padpisali try hady tamu, ale nijak nie mahli ratyfikavać.

Z hetaha momantu Biełaruś i Polšča stali ŭličvać staž pracy piensijanieraŭ u abiedźviuch krainach, a taksama vypłačvać biełaruskuju piensiju ŭ Polščy dy naadvarot. Ale pracuje heta nie dla ŭsich piensijanieraŭ, a tolki dla tych, chto stała žyvie ŭ krainie i maje časovy ci pastajanny DNŽ na lubych padstavach ci kartu rezidenta ES. 

Akramia taho, minimalnaja piensija ŭ Polščy składaje 1781 złoty (kala Br 1480), a heta vyšej za navat siaredniuju piensiju ŭ Biełarusi (u kastryčniku 2024 hoda jana skłała Br 852), nie kažučy ŭžo pra minimalnuju. Tamu dla bolšaści biełarusaŭ u Polščy jość sens padavacca na dapłatu da minimalnaj polskaj piensii, kali jany majuć prava na piensiju i paśpieli zapłacić sacyjalnyja ŭnioski ŭ Polščy chacia b za adzin dzień.

Jak padać ​​zajaŭku na pieravod piensii ŭ Polšču, čytajcie na sajcie Ustanovy sacyjalnaha strachavańnia, ZUS

Pavialičyć

Historyja 1. «FSAN sprabavaŭ pieravieści piensiju na rachunak, ale bank Santader adchiliŭ płaciež praz sankcyi»

Alena (imia źmienienaje) pierajechała ŭ Polšču ŭ 2021 hodzie razam z maci-piensijanierkaj. Maci adrazu skazała, što taksama pajedzie, bo «niama nijakaha sensu siadzieć u Biełarusi ŭ adzinocie, kali siamja — u inšaj krainie».

«U 2020 hodzie jana pahladzieła na toje, što adbyvajecca ŭ krainie, i skazała, maŭlaŭ, davajcie źjazdžać, pakul nie pozna i jašče vypuskajuć. Da taho ž majmu synu ŭ Biełarusi spaŭniałasia 18 hadoŭ — jaho taksama treba było ratavać z hetaha biazładździa.

Pierad adjezdam maci pajšła ŭ FSAN spytać, jak być ź piensijaj, kali pierajazdžaješ u Polšču.

Tam joj prapanavali dva varyjanty. Pieršy — zajavić za try miesiacy, što jana źjazdžaje, i piensiju joj pa adjeździe prosta pierastajuć vypłačvać. Druhi — prosta zrabić vyhlad, što jana da ich nie prychodziła, i atrymlivać piensiju na biełaruskuju kartku, ale «nie śviacić» joju za miažoju.

My ŭ vyniku vybrali druhi varyjant i pakinuli kartku znajomamu, jaki zdymaŭ hrošy ŭ bankamacie ŭ jeŭra i prosta pieradavaŭ hrošy maci».

Darečy, davieranaść maci Aleny taksama paśpieła zrabić u Biełarusi, ale taja akazałasia biessensoŭnaja: nataryus pamyliłasia ŭ proźviščy. Pry hetym u 2023 hodzie termin bankaŭskaj kartki dla atrymańnia piensii zakančvaŭsia, a dla padaŭžeńnia treba było jechać u Biełaruś. 

«Ja pačytała na polskich sajtach, jak pieravieści siudy biełaruskuju piensiju, i ŭ kancy 2023 hoda my pajšli razam u najbližejšy ZUS. 

Tam pracaŭniki akruhlili vočy: miastečka maleńkaje, nichto dasiul z takim pytańniem jašče nie źviartaŭsia. U vyniku my razam čytali instrukcyju na ichnym sajcie i pisali zajaŭku ŭ volnaj formie, što centr žyćciovych intaresaŭ maci pierajšoŭ ź Biełarusi ŭ Polšču, tamu prosim pieranieści i piensiju. 

Paznačyli tam bankaŭskija rachunki ŭ Biełarusi i Polščy, dadali numar piensijnaha paśviedčańnia, numar pašparta, źviestki karty pobytu». 

Paśla hetaha pracaŭniki Ustanovy sacyjalnaha strachavańnia pieranakiravali zajavu ŭ svoj hałaŭny ofis u Łodzi, a toj praz try tydni pieranakiravaŭ jaje ŭ FSAN Biełarusi. Paśla padačy Alena zaviała kabiniet ZUS PUE dla maci, kab atrymlivać usie paviedamleńni anłajn, a nie listami poštaju.

«Nam skazali čakać da paŭhoda, a praz čatyry miesiacy biełaruski FSAN adkazaŭ, što pasprabavaŭ pieravieści piensiju na naš rachunak u banku Santader, ale tam płaciež adchilili praz sankcyi. Nam prapanavali adkryć rachunak u banku Pekao ci PKO. My adkryli rachunak u PKO ŭ jeŭra, kab paźbiehčy lišnich kanviertacyj, i prosta pierasłali jaho numar u adkazie na hety list».

U vyniku maci Aleny naličyli adnym płaciažom piensiju za ŭsie čatyry miesiacy, pakul razhladali zajavu. Jašče try miesiacy jana atrymlivała na rachunak 307 jeŭra piensii.

«A potym maci, na žal, pamierła. Ja adrazu dasłała ŭ biełaruski FSAN paśviedčańnie ab śmierci ź pierakładam i apastylem, mnie paabiacali naličyć materyjalnuju dapamohu na pachavańnie. Pakul čakaju», — raskazała Alena.

Historyja 2. «Kali b viedali pra taki doŭhi čas čakańnia, pačali rabić usio heta raniej»

Maci Valeryja (imia źmienienaje) pryjechała da jaho ŭ Polšču na pačatku 2023 hoda praz kryminalnuju spravu suprać jaje.

«Śledčy kamitet u Hrodnie raspačaŭ kryminalnuju spravu suprać jaje, chacia jana ŭ Hrodnie nikoli nie była, i pastavili joj štamp u pašparcie ab zabaronie vyjezdu z krainy. Praz paru dzion my zdoleli vyvieźci jaje z krainy z dapamohaj evakuacyjnaj słužby BySol.

Spačatku jana mahła zdymać piensiju ź biełaruskaj kartki ŭ Polščy, potym heta rabiŭ jaje plamieńnik praz dublikat kartki — płaciŭ za jaje kamunalnyja pasłuhi, a astatniaje pieradavaŭ u jeŭra praz znajomych u Polšču.

Ale praź niekatory čas skončyłasia damova maci z «Biełarusbankam», praciahnuć jakuju možna tolki praz asabisty vizit u bank. Tak piensija pamieram 200 jeŭra pierastała pastupać na kartku», — zaznačaje Valeryj.

Tym časam žančyna ŭ Polščy atrymała kartu pobytu pavodle mižnarodnaj abarony i padałasia na indyvidualnuju prahramu adaptacyi, praź jakuju atrymlivała materyjalnuju dapamohu kala 1300 złotych (kala 300 jeŭra) za miesiac i zabiaśpiečyła sabie strachoŭku na hod. Ale hadavaja prahrama chutka skončycca, tamu treba niejak viartać piensiju. 

«Paraiŭšysia ŭ fejsbuku, my daviedalisia, što praz toje, što maci nie pracavała ŭ Polščy, joj niemahčyma budzie naličvać minimalnuju piensiju ŭ Polščy, a pracavać jana ŭ 70 hadoŭ užo nie moža. Tamu zastajecca tolki sprabavać atrymlivać jaje biełaruskuju piensiju tut. 

Ludzi papiaredžvali, što heta amal niemahčyma, ale my nadumali pasprabavać».

Padavalisia na pieravod piensii Valeryj z maci va Ustanovu sacyjalnaha strachavańnia Varšavy ŭ lipieni 2024 hoda. Pracaŭniki tam taksama nikoli nie sutykalisia z takim, ale zajaŭku pryniali i pieranakiravali jaje ŭ Biełaruś.

«Pakul my jašče čakajem adkazu: pavodle vodhukaŭ, heta moža zaniać ad 8 miesiacaŭ da hoda. Kali b my viedali pra taki doŭhi čas čakańnia, to pačali b rabić usio heta raniej. Taksama nam prapanavali pieryjadyčna telefanavać u biełaruski FSAN, kab sprava pajšła chutčej.

Ale z ulikam taho, što ŭvieś hety čas śledčyja šukali maci, pisali i telefanavali ŭ telehram i vajbier z prapanovami viarnucca, my nie ŭpeŭnienyja, što ŭvohule niešta atrymajecca. Ale nadzieja jość, bo navat tyja, chto siadzić u Biełarusi za kratami, atrymlivajuć piensiju».

• 1
• 0
• 0
• 0
• 0
• 0
• 0
• 0