Jak atrymać šenhienskuju vizu ŭ Biełarusi samastojna. Praktyka i parady

Italija: samaja papularnaja ŭ biełarusaŭ

Italija redka admaŭlaje ŭ vizach i ščodraja na terminy: čaściej za inšyja krainy adkryvaje multyvizy ad 3 miesiacaŭ da hoda navat u čysty pašpart. Kali vy ŭžo byli ŭ Italii, to prykładzienyja rachunki i reziervacyi pavialičać šancy na vizu da 3 hadoŭ.

Hałoŭnaja prablema — zapisacca na padaču. Vizavy centr Italii prypyniŭ vydavańnie słotaŭ, tamu zapisvacca ciapier treba pavodle žyvoj čarhi z 16:00 da 17:00 u «sšytak administratara Aleha» (heta nie žart). Vam dajuć paradkavy numar (ciapier numary pieravyšajuć 20 000), ź jakim vy budziecie potym prychodzić da VC i čakać, pakul jon nie zrobicca pieršym siarod ludziej u čarzie. Prychodzić na padaču treba z hatovym pakietam dakumientaŭ, asabisty kabiniet na sajcie vizavaha centru Italii maje być stvorany nie bolš jak za 10 dzion da taho.

Manitoryć paradkavy numar, jaki ŭžo puścili na padačy, možna ŭ telehram-čacie. Miarkujučy z vodhukaŭ tam, kali čas dazvalaje, možna prychodzić sa svaim numaram za miesiac da pajezdki. Ale moža i pašancavać: byli tyja, chto prachodziŭ z bolš poźnim numaram, i ich prapuskali na padaču pry adsutnaści čarhi.

A 17 kastryčnika ŭ VC Italii paviedamili, što ŭ kastryčniku buduć testavać anłajn-vieryfikacyju asoby dla zapisu ŭ čarhu.

Na hetym varyjanty samastojnaj padačy kančajucca. Jość varyjant nabyć tur u turystyčnych ahienctvach, u ich, jak praviła, pad tury jość asobnyja daty (jak praviła, u tur jechać nie abaviazkova). 

Zbory dla padačy na italjanskuju vizu składajuć 50‒130 jeŭra ŭ zaležnaści ad pasłuh vizavaha centru. 

Ispanija: doraha i doŭha

Uletku 2023 hoda ŭ Miensku pačaŭ pracavać VC Ispanii. Ale zapisacca praz sajt prablematyčna: čaściej za ŭsio jon śpić miortvym snom. 

Daty na zapis źjaŭlajucca tolki raz na miesiac, a terminy razhladu mohuć dachodzić da 45 dzion. Pry padačy VC taksama prosić napisać raśpisku, što klijent padaje dakumienty nie mienš jak za 6 tydniaŭ da mierkavanaha vyjezdu.

Pavialičyć

Akramia taho, terminy vizaŭ ispancy škadujuć i zvyčajna dajuć adnarazovyja abo miesiačnyja vizy. Vandroŭniki z dobraj vizavaj historyjaj mohuć atrymać vizu praciahłaściu 3—5 miesiacaŭ. Ale i heta chutčej vyklučeńnie, čym praviła.

Akramia taho, Ispanija vidavočna daje zrazumieć, što biudžetnym turystam tut nie radyja. Naprykład, kali ŭ tałonie jość pamyłka, to, kab jaje vypravić, daviadziecca zapłacić pry vizicie ŭ VC. Premium-servis tut kaštuje 370 rubloŭ (kala 105 jeŭra, što rekord siarod usich VC), a na kožny dzień znachodžańnia ŭ krainie ŭ vas na rachunku musić być nie mienš za 113 jeŭra (ale minimum 1020 jeŭra). Ale najlepš mieć na rachunku nie mienš za 2000 jeŭra. 

Dapamahčy złavić datu chutčej mohuć turystyčnyja ahienctvy, u jakich zaŭsiody jość svaja broń, ale heta vyjdzie istotna daražej: pry rehistracyi vy zapłacicie nie mienš za 880 rubloŭ (247 jeŭra): za rehistracyju — 350 rubloŭ, za pakiet dakumientaŭ — 250 rubloŭ, VC za padaču — 280 rubloŭ.

Pavialičyć

Hrecyja: chutka, ale ryzykoŭna

Hrecyja — dobry varyjant dla tych, kamu terminova patrebnaja viza. Ale i ryzyk tut bolš: kala 85% vydadzienych vizaŭ — na adnu pajezdku, a 15—20% zajavaŭ atrymlivajuć admovy. Statystyka admovaŭ značna ŭzrastaje paśla zakančeńnia turystyčnaha siezonu, a razhlad zajavaŭ moža zaniać 21—25 dzion. Ciapier Hrecyja stała bolš łajalnaju da tych, chto zapytvaje vizu na śviaty — Kalady i Novy hod.

Padać dakumienty možna ŭ Minsku, Viciebsku i Breście. Dla zapisu treba zarehistravacca na sajcie VC Hrecyi, dzie rehularna źjaŭlajucca svabodnyja słoty na zapis. 

Atrymańnie hrečaskaj vizy z ulikam konsulskaha zboru i pasłuh vizavaha centru abyjdziecca ŭ 80—125 jeŭra.

Vienhryja: tolki kali vy sapraŭdy jedziecie tudy

Łohiku vydačy viz u ambasadzie Vienhryi zrazumieć vielmi składana, a vizy tolki pad daty pajezdki nie redkaść. Kali vy sapraŭdy źbirajeciesia ŭ Vienhryju abo Šviejcaryju (VC taksama prymaje zajaŭki na vizu Šviejcaryi) abo možacie paćvierdzić svoj minuły vizit u krainu, to mohuć vydać šenhien i na try hady.

Ale kali nie, to vysokaja vierahodnaść atrymać vizu pad pajezdku abo navat admovu. Ciapier dla padačy na vizu nieabchodnaja paćvierdžanaja i apłačanaja reziervacyja hatela. Pryčym admianiać jaje navat paśla atrymańnia vizy nie rekamiendujecca: vienhry raniej anulavali tolki što vydadzienuju vizu paśla taho, jak čałaviek pierareziervavaŭ žytło.

U adroźnieńnie ad Italii, kraina prymaje zajaŭki na vizy tolki praz sajt VFS Global, dzie i daviadziecca łavić daty. Zvyčajna dajuć 1-2 miescy za dzień, tamu popyt vysoki.

Jak i ŭ vypadku z Hrecyjaj, viza Vienhryi z ulikam koštu pasłuh vizavaha centru budzie kaštavać ad 80 da 125 jeŭra.

Pavialičyć

Francyja: vizy Šredynhiera

Nie zvažajučy na standartny pakiet dakumientaŭ, daty na zapis u francuzskaj ambasadzie vydajucca nierehularna, a statystyka vydačy viz varjujecca ad vizaŭ pad pajezdku da multyvizaŭ na termin da hoda ŭ čysty pašpart. 

Pakiet dakumientaŭ dla francuzskaj vizy standartny, a terminy razhladu zajavy składajuć ad dvuch da čatyroch tydniaŭ. Ale admovy ŭ vizie nie redkaść.

Zapisacca samomu na padaču ‒ praktyčna nieprachodny kvest. Vizavaha centru niama, tamu padavacca treba praz sajt ambasady Francyi ŭ Minsku, jaki, čaściej za ŭsio, nie pracuje.

Na sajt akiency dla zapisu vykidvajucca redka. Vyjście tolki adno: kožny dzień manitoryć čat i spadziavacca, što pašancuje adnojčy ŭbačyć słoty na sajcie, jaki pracuje.

Krychu praściej atrymać akienca dla zapisu ŭ vypadku zaprašeńnia ad siabroŭ abo svajakoŭ. U hetym vypadku moža dapamahčy list u konsulstva z prośbaju vydać datu dla padačy.

Akramia taho, francuzy mohuć spraŭdzić vaša znachodžańnie ŭ krainie: kali pavodle papiaredniaj vizy vy da Francyi nie dajechali, to možacie čakać nastupny raz albo vizu pad pajezdku, albo admovu.

Francyja pracuje z zajaŭkami biełarusaŭ niepasredna, tamu viza abydziecca najtańniej — 35 jeŭra za konsulski zbor.

Skrupuloznaja Hiermanija dla samych ciarplivych

Ambasada Hiermanii najlepšaja dla vydačy vizaŭ pavodle zaprašeńnia. Z turystyčnymi vizami składaniej. Haściavyja vizy niaredka dajuć na 5 hadoŭ, a voś turystyčnyja — pad daty pajezdki. Ale pry hetym i admovaŭ vielmi mała.

Kali padajeciesia druhi raz, varta prykłaści ŭsie mahčymyja dokazy pieršaj pajezdki: ad zdymkaŭ la Bundestahu da rachunkaŭ ź miascovych kramaŭ. Heta pavialičyć vaš šaniec na doŭhaterminovuju vizu.

Ale jość i niuansy: pra skrupuloznaść niemcaŭ ludzi ŭžo składajuć lehiendy. Tut praviarajuć nie tolki reziervacyju žytła, ale i zasialeńnie. Nie pryjechali — vas mohuć čakać anulavańnie vizy i departacyja. Jak i ŭ vypadku ź Vienhryjaj, pra źmienu reziervacyi treba paviedamić u ambasadu da pajezdki.

Taksama niemcy chočuć bačyć dakumienty ŭ papiarovym vyhladzie ź pierakładam na anhlijskuju ci niamieckuju. Z apošnich novaŭviadzieńniaŭ — vypiska z rucham na rachunku za apošnija 6 miesiacaŭ, pierakładać jaje nie treba.

Paśla ŭsiaho hetaha z vami mohuć jašče i pahutaryć pry padačy dakumientaŭ abo navat paśla praz telefon. 

Varta adznačyć, što zrabić zaprašeńnie dla haściavoj vizy ŭ Hiermaniju vam mohuć nie tolki svajaki, ale i siabry ci znajomyja. Tak što raim pašukać kahości ŭ samoj krainie, chto moža vysłać vam zaprašeńnie.

Padavać zajaŭku na afarmleńnie vizy treba praz formu na sajcie, paśla čaho čakać list ab pryznačeńni daty. U adkaz vam pryjdzie data, paŭpłyvać na jakuju niemahčyma: kali nie paćvierdzić jaje na praciahu dvuch dzion, zapis anulujecca. Śpis čakańnia vielizarny i moža raściahnucca na 12 miesiacaŭ.

U niamieckuju ambasadu treba padavacca i tym, chto choča atrymać vizu Aŭstryi, Bielhii, Słavienii, Luksiemburha i Niderłandaŭ.

Košt konsulskaha zboru nižejšy za košt niepasrednaj padačy praz ambasadu — 35 jeŭra.

Polšča: zadańnie z zoračkaj

Na hety momant Polšča — adzinaja z susiednich krain, što vydaje turystyčnyja vizy biełarusam. Akiency na padaču ŭ VC Polščy Polščy źjaŭlajucca na miesiac napierad, sačyć možna ŭ hetym čacie. Naprykład, minski rehijon vydaŭ słoty na šmat jakija typy vizaŭ užo da kanca listapada. Ale heta nie aznačaje, što zapisacca lohka.

Kali Polšča ŭviała vieryfikacyju praz sełfi i zdymak pašparta, usio stała jašče horš. Słotaŭ pa-raniejšamu amal nie znajści, ale navat kali i pašancavała, padčas prachodžańnia vieryfikacyi chtości inšy zvyčajna paśpiavaje pierachapić vašu datu. Akramia taho, sajt časta daje zboi, a zapisvacca na padaču treba ŭ peŭny VC u zaležnaści ad prapiski.

Usio heta robić padaču na polskuju vizu adnoj z samych składanych, tamu šmat chto addaje ad 170 da 980 jeŭra (u zaležnaści ad rehijonu padačy i popytu) vizavym ahientam, jakija prachodziać hety kvest za pretendenta na vizu. 

Turystyčnyja vizy vydajucca ŭ asnoŭnym pad pajezdku, jość vypadki vydačy takich vizaŭ na 3-4 dni: jakraz chopić, kab tolki pastajać na miažy. Dla padačy patrabujuć apłačanuju reziervacyju hatela, maršrutny list z raśpisanym płanam pajezdki i vypisku z rachunku z reštkami nie mienš za 500‒600 jeŭra na čałavieka. Čas razhladu dakumientaŭ składaje ŭ siarednim 15 dzion, časam pašparty vydajucca chutčej.

Dobraja vizavaja historyja moža pavialičyć šancy na praciahłuju multyvizu, ale i heta redkaść, a nie praviła. Admoŭ taksama chapaje, ale kali čałaviek sapraŭdy płanavaŭ pajezdku ŭ Polšču i z dakumientami ŭsio dobra, možna padacca na apielacyju ŭ konsulstva. Praŭda, heta kaštuje 80 jeŭra, ale ŭ vypadku paśpiachovaha razhladu vam, chutčej za ŭsio, pastaviać vizu pad pajezdku.

Kali jość mahčymaść, varta zrabić zaprašeńnie ad luboha čałavieka z PMŽ abo rezidencyjaj Polščy — admovy redkija, a vizy zvyčajna daŭžejšyja za turystyčnyja.

Akramia taho, ź vieraśnia 2024 hoda zajaŭniki, starejšyja za 60 hadoŭ, mohuć padać dakumienty na vizu pavodle vajavodskaha zaprašeńnia ad dziaciej i ŭnukaŭ biez papiaredniaj rehistracyi ŭ VC zhodna z rehijonam prapiski. Tut važnaja parada — prychodzić na padaču zranku, bo VC maje kvotu miescaŭ, i mohuć nie pryniać u toj ža dzień. Da pakietu dakumientaŭ treba budzie prykłaści dakumienty, jakija paćviardžajuć svajackija suviazi.

Rumynija, Bałharyja, Charvatyja dy inšyja niejmaviernyja historyi

VC Charvatyi adkryvaje vizy biełarusam z 2023 hoda, Bałharyja i Rumynija — z krasavika 2024 hoda. Na sajcie VC Bałharyi dasiul niama navat śpisu nieabchodnych dakumientaŭ dla padačy. Toje ž i na rumynskim sajcie.

Pakul vodhuki turapierataraŭ pra hetyja krainy nie vielmi abnadziejvajuć: tut adkryvajuć zvyčajna karotkaterminovyja vizy abo da 6 miesiacaŭ — dla tych, u kaho dobraja vizavaja historyja. A jašče patrabujuć paćvierdzić apłatu hatela i avijakvitkoŭ.

Ale jak siudy zapisacca samastojna, tak i zastajecca zahadkaju: Bałharyja, Charvatyja i Rumynija, a taksama Słavakija dajuć niekalki akiencaŭ za miesiac.

U teoryi jašče možna padacca na šenhienskuju vizu Danii (praz vizavy centr VFS u Minsku), ale budźcie hatovyja da atrymańnia daty na adnu pajezdku abo naahuł da admovy. Heta «zadavalnieńnie» kaštuje nie 35 jeŭra, a 80 — kraina nie padpisała pahadnieńnia ab spraščeńni vizavaha režymu ź Biełaruśsiu.

Pavialičyć

A kali nie ŭdajecca padacca samomu? 

Reziumujučy, možna skazać, što bolš realnyja varyjanty dla samastojnaha zapisu — heta Hiermanija, Hrecyja, Ispanija i Vienhryja. 

Bolš składanyja varyjanty ŭ zapisie — Polšča i Francyja, tudy słoty złavić ciažej. Šancy na samastojnuju padaču i vizu na dobry termin praź inšyja krainy pakul imknucca da nula. Pry hetym pamiatajcie, što takija krainy, jak Litva, Łatvija i Čechija, uvohule nie vydajuć turystyčnych vizaŭ biełarusam.

Kali vy chočacie zaaščadzić i padacca samastojna, jość sens sačyć za datami adkryćcia vizavych słotaŭ praz tematyčnyja telehram-kanały abo ŭ ahulnych čatach pa krainach. Naprykład, Ispanija časta vykidvaje novyja słoty paśla 24 dnia miesiaca, ale vyraznaj sistemnaści niama ni ŭ kaho.

«Dumaju, što kali zadacca metaj, to možna ŭsio zrabić samastojna, heta pytańnie času i niervaŭ, — razvažaje Nasta Łysakoŭskaja. — Šmat chto źviartajecca da pasłuh vizavych ahientaŭ nie tolki praz składanaść zapisu, ale i praz toje, što nikoli nie afarmlali vizaŭ. Jašče adna častaja pryčyna — dapamoha paśla atrymanaj admovy». 

Kali vy ŭsio ž nadumali źviarnucca pa dapamohu da pasiarednikaŭ, rychtujciesia addać za heta dadatkovyja 100‒1500 jeŭra, što časam paraŭnalna z koštam niedarahoha turu.

«Minimalnyja ceny na pasłuhi pačynajucca sa 100 jeŭra, ale heta zaležyć ad składanaści zapisu. Naprykład, Polšča, Ispanija i Italija — adnyja z samych zapatrabavanych kirunkaŭ, dzie ceny mohuć być bližejšyja da vierchniaj miažy. Maksimum za «paskorany» zapis moža dasiahać 1000‒1500 jeŭra, asabliva dla krain z doŭhimi čerhami, jak Italija i Polšča. Važna źviartacca da pravieranych pasiarednikaŭ: čytajcie vodhuki inšych klijentaŭ, udakładniajcie, što mienavita ŭvachodzić u pasłuhi, i paźbiahajcie tych, chto harantuje vizu — takija pasłuhi časta zakančvajucca historyjami pra machlarstva», — adznačaje vizavaja ahientka.

Realnaja karyść ad pasiarednikaŭ jość, kali samastojny zapis praktyčna niemahčymy praz techničnyja składanaści na sajcie vizavaha centru. U ahienctvaŭ, nie zvažajučy na ŭsie zabarony i novaŭviadzieńni vizavych centraŭ, pa-raniejšamu bolš mahčymaściaŭ zapisać vas, čym u vas samych.

• 3
• 1
• 0
• 7
• 0
• 2
• 3
• 0