«Zacisnuła ŭ pałajučym aŭto». U strašnym DTZ zahinuŭ Vital Prychač, adzin z apošnich niezaležnych deputataŭ
Jamu było 46 hadoŭ.
U aŭtakatastrofie trahična zahinuŭ Vital Prychač, siabra Ruchu «Za Svabodu» ź Biełaaziorsku, paviedamiŭ Juryj Hubarevič. Vital Prychač byŭ aktyŭnym udzielnikam kamandy demakratyčnych deputataŭ, jakija ŭ 2003 hodzie vyjhrali vybary ŭ Biełaaziorsku.
«Kreatyŭny i enierhičny, Vital nikoli nie hublaŭ nadziei i zaŭsiody zastavaŭsia vierny svaim kaštoŭnaściam i pierakanańniam.
Nam budzie vielmi jaho nie chapać», — napisaŭ Hubarevič.
Jak stała viadoma «Našaj Nivie», Vital na svaim Chevrolet trapiŭ u DTZ 16 kastryčnika: nie daŭšy rady kiravańniu, jon źjechaŭ na mašynie ŭ kiuviet i ŭrezaŭsia ŭ dreva. Paśla hetaha aŭto zaharełasia. Vital nie zmoh vybracca i na miescy skanaŭ u pałajučym aŭto ad atrymanych paškodžańniaŭ.
Mienavita pra heta strašnaje zdareńnie raniej paviedamlali ŭ DAI. Avaryja adbyłasia na aŭtadarozie Alekšycy — Vaŭkavysk — Pružany pablizu vioski Porazava, što ŭ Śvisłackim rajonie.
17 kastryčnika Vitala pachavali. U jaho zastałosia dvoje dziaciej.
Pa fakcie zdareńnia pravodzicca pravierka SK.
Kamientary