U BATE — najhoršyja vyniki za historyju. Top-5 pryčyn pravału

Čornyja śpisy pazbavili BATE lidaraŭ

Siezon-2023 pačaŭsia ŭ biełaruskim futbole z praciaha historyi pra čornyja śpisy. U 2022-m futbalisty, jakija padčas pratestaŭ vykazvalisia suprać hvałtu, zastalisia biez kamandaŭ, i pa vynikach niekatoryja pryniali rašeńnie skončyć karjeru. Naprykład, heta zdaryłasia sa Stanisłavam Drahunom, adnym z klučavych hulcoŭ BATE ŭ apošnija hady.

Akramia Drahuna, BATE straciŭ praz čornyja śpisy Dzianisa Ščarbickaha, Maksima Bardačova i Dźmitryja Biaśśmiertnaha, i heta ŭsio futbalisty asnovy. Pryčym jany da apošniaha znachodzilisia ŭ padviešanym stanie — dazvolać im hulać ci nie dazvolać?

Darečy, ź niekatorymi hulcami z čornych śpisaŭ paźniej adbyłasia mietamarfoza — jany vykazali «škadavańnie» za svaje pavodziny ŭ 2020-m. Takija pakajalnyja pres-kanfierencyi adbylisia ŭ Stanisłava Drahuna i Alaksandra Hutara, pryčym Hutar paśla «pakajańnia» pierajšoŭ u BATE. Što da Drahuna, jon syšoŭ u miedyjafutboł i raźvivaje ŭłasnuju kamandu D-media.

Były futbalist moładzievaj zbornaj Biełarusi i trenier Jaŭhien Viaroŭka adznačaje, što staŭleńnie da hulcoŭ minskaha «Dynama» z čornych śpisaŭ było bolš łahodnym. Voźmiem Alaksandra Sačyŭku, jaki dziela padpisańnia kantraktu z «Dynama» zapisaŭ videa ahitacyjnaha źmiestu, ciapier jon vychodzić na pole. A tut my tłumačyli, jak moža być źviazany favarytyzm režymu ŭ bok «Dynama» i čempijonstva hetaha kłuba.

Pavialičyć

Trenier Alšeŭski straciŭ suviaź z kamandaj

Siońniašni BATE ŭžo naŭrad ci nazavieš siamjoj, tym bolš va ŭmovach taho presu, jaki nakładaje na kamandu drenny vynik u čempijanacie. U kamandzie błahi klimat, i havaryć pra dasiahnieńni ŭ takim vypadku nie prychodzicca, a koŭč Kirył Alšeŭski, miarkujučy pa ŭsim, niazdolny vypravić situacyju.

Naprykład, u kancy žniŭnia BATE prajhraŭ u jeŭrakubkach kosaŭskamu «Bałkani» 4:1. Praz paru dzion paśla razhromu paŭabaronca barysaŭčan Arciom Kancavy reposnuŭ u instahramie niekalki videa: na adnym jon trymaŭ šklanku ŭ ruce i śpiavaŭ trek Cimaci, jaki pačynaŭsia sa słovaŭ «Tanu ŭ marcini», na inšym — fihuravaŭ z kaljanam u ruce. Vyhladaje, što sumny vynik u hulni nie prymusiŭ Arcioma vybačycca pierad fanatami ci, naprykład, nalahać na treniroŭki.

Pavialičyć

Abo inšaja historyja. U kastryčniku ŭ dubl trapiŭ paŭabaronca Dźmitryj Padstrełaŭ, jakoha ŭletku ŭziali dla ŭzmacnieńnia kamandy. Ale paśla adnaho z matčaŭ chłopiec nahrubiŭ Alšeŭskamu i toj u jakaści vychavaŭčaj miery adasłaŭ chłopca ŭ dubl. Ale žorstkaje rašeńnie chutčej padzialiła hulcoŭ, a nie abjadnała ich.

Tryvožnyja źviestki prychodzili nie tolki nakont Alšeŭskaha, ale i pra bosa kamandy Andreja Kapskaha. U kastryčniku žurnalist Uładzisłaŭ Tatur pisaŭ, što Kapski-małodšy «nie kantraluje kamandu, hublaje jaje i Alšeŭski, u raździavalni niama paradku i dyscypliny — jość prablemy z Arciomam Kancavym i Dzianisam Hračycham». U sieciva traplali źviestki, što kamanda nie ŭsprymaje ŭstanoŭki i hulniavyja schiemy Alšeŭskaha, futbalisty prapanujuć niešta źmianić u padychodach, ale koŭč admaŭlajecca.

Pryčym taktyčnaj hnutkaści ŭ treniera zusim niama. Ad startu siezona jon pasprabavaŭ arhanizavać kambinacyjny atakujučy futboł pa schiemie 4-3-3 z tryma napadajučymi. I choć taktyka nie spracoŭvała, trymaŭsia za jaje da apošniaha.

Pamyłki ŭ kiraŭnictvie ad Kapskaha-małodšaha

Małady kiraŭnik barysaŭskaj kamandy nie karystajecca aŭtarytetam va ŭłasnych hulcoŭ. Za piać hadoŭ, ciaham jakich Andrej Kapski ŭznačalvaje kłub, jon tak i nie zdoleŭ stać u kamandzie sapraŭdnym lidaram. Viadoma, što hulcy nie ŭsprymajuć jaho krytyku i dazvalajuć sabie łajacca z bosam, a paśla hetaha nie atrymlivajuć anijakaha pakarańnia.

Jaŭhien Viaroŭka adznačaje surjoznyja prablemy ŭ kiraŭnictvie kłubam — ad pryznačeńnia treniera da pamyłak u farmavańni składu kamandy. Datyčna Alšeŭskaha jon adznačaje, što trenier ničoha nie vyjhravaŭ z bolš mocnym składam BATE i byŭ vyzvaleny ad pasady ŭ pieršym svaim prychodzie paśla niezadavalniajučych vynikaŭ.

Pavialičyć

Viaroŭka miarkuje, što BATE ciapier znachodzicca na svaim miescy ŭ tablicy: «Pieramoha «Dynama» była aŭtamatyčna zakładzienaja ŭ vyniki siezona [pa palityčnych pryčynach], «Nioman» maje dobry pa mierkach hetaha čempijanatu skład, plus jany syhranyja. BATE pa sutnaści moh zmahacca za miescy z treciaha pa piataje».

Cisk z boku ŭładaŭ

Z pačatku siezona-2023 BATE čakaŭ padpisańnia płana raźvićcia — dakumienta, jaki musić dać kłubu dazvoł karystacca finansami dziaržpradpryjemstvaŭ. Podpis na hetaj papiery zaležyć ad Minsportu. A ministr Siarhiej Kavalčuk — nieprychavany łabist intaresaŭ minskaha «Dynama», kłuba, jakich pa vynikach siezonu-2023 uziaŭ čempijonstva, zamoŭlenaje Alaksandram Łukašenka jašče ŭ 2021-m. To i nie dziva, što płan raźvićcia dla BATE tak i nie padpisali. Byli śviedčańni, što heta aznačaje cisk na Kapskaha — maŭlaŭ, jon musić pieradać kłub u dziaržaŭnuju ŭłasnaść.

Finansavyja prablemy

Adnosna niaŭdały siezon u jeŭrakubkach tolki ŭzmacniŭ prablemy BATE. Kab paŭdzielničać u ich, kłubu daviałosia amal dva miesiacy žyć i treniravacca za miažoj, na što pajšli niamałyja srodki. Adzinaje dasiahnieńnie BATE ŭ jeŭrakubkavym siezonie — prachod pieršaha raŭnda adboru Lihi čempijonaŭ, za što kłub atrymaje ad UEFA 1,41 miljona jeŭra.

Kali b kamanda prajšła chacia b u hrupu Lihi kanfierencyj, jana mahła b raźličvać na niekalki miljonaŭ jeŭra ad UEFA, ale pra heta ciapier zastajecca tolki maryć. Pakolki siezon-2023 BATE skančvaje na piataj pazicyi, u nastupnym hodzie im naŭrad ci śvieciać jeŭrakubki — tolki ŭ vypadku vyjhryša kubka Biełarusi viasnoj. Adpaviedna, kłub niedaatrymaje hrošy, a dla biełaruskich kamand heta važnaja krynica dachodu. Va ŭmovach, kali dziaržava stavicca da BATE pa-varožamu, jak moža barysaŭskaja kamanda zarablać na žyćcio? Viaroŭka dadaje, što BATE pa sutnaści adrezany ad baraćby za čempijonstva.

Vierahodna, barysaŭski kłub budzie sprabavać raspradać lidaraŭ, kab zarabić choć štości. Ale ź jakimi vykanaŭcami tady ŭvohule zastaniecca kamanda? Piataje miesca ŭ čempijanacie stavić Andreja Kapskaha pierad vybaram, i jamu nie pazajzdrościš.

Siaredzina tablicy i daŭhi. Jak žyvie niekali zorny BATE

«Hałoŭnaje — intelekt» i «lepš być trecim, čym druhim». Chackieviču — 50: hutarym pra futboł, žyćcio i bulbu

«Haściam» — 20 hadoŭ. Jak stvaraŭsia kultavy klip na adnu z samych papularnych piesień časoŭ biełaruskaj niezaležnaści i što stała ź jaho hierojami

• 4
• 0
• 7
• 3
• 2
• 2
• 7
• 0