«Usie bačyli, što jamu padabajecca Nataša, i dumali: «Nu kali vy ŭžo?!» Były palitviazień Łukša raskazaŭ pra svaje adnosiny z Ejsmantami
U novym vypusku TOKu były viadučy «Zony Ch» i były palitźniavoleny Dźmitryj Łukša razvažaje pra toje, jak źmianilisia kiraŭnik BT i pres-sakratarka Alaksandra Łukašenki. I ci mohuć jany ŭ hłybini dušy zastavacca dobrymi ludźmi.
«Jon nie byŭ nikoli «Ivan Ejsmant». Jon byŭ Vania ŭ dobrym razumieńni. Prosty, dobry chłopiec», — zhadvaje Dźmitryj Łukša.
«Navat ciapier kali ja ŭbaču jaho ŭ Minsku ci ja budu siadzieć za stałom ź siabrami, a jon padydzie i skaža «Pryviet, Dzima», ja skažu «Vitaju, prysadžvajsia» i pacisnu ruku. Jon u mianie ŭ pamiaci zastaŭsia dobrym čałaviekam», — apisvaje ŭjaŭnuju situacyju były viadučy «Zony Ch».
Łukša dapuskaje mahčymaść taho, što Ivan Ejsmant ciapier źmianiŭsia. Ale pry hetym zaŭvažaje, što kali na Vaładarcy znajomiŭsia sa svajoj kryminalnaj spravaj, tam siarod roznych dakumientaŭ była charaktarystyka ź Biełteleradyjokampanii:
«U mianie była narmalnaja charaktarystyka. Vania daŭ mnie charaktarystyku pa fakcie. (…) Nie było nijakaj čarnuchi, niejkich nahavoraŭ».
Nakolki paspryjała karjery Ivana Ejsmanta jaho žonka
Zhadvajučy pra karjeru Ivana Ejsmanta Łukša zaŭvažaje, što heta byŭ vielmi chutki ŭźlot. «[Spačatku] jon išoŭ vielmi płaŭna, jak standartny žurnalist. A potym rezka stanovicca namieśnikam dyrektara Ahienctva televizijnych navinaŭ, potym uznačalvaje ATN, potym [jon] namieśnik staršyni i staršynia [Biełteleradyjokampanii]. Heta vielmi kruty rost».
Łukša nie vyklučaje ŭpłyvu na chutki karjerny rost žonki Ivana Ejsmanta Natalli.
«Ja dumaju, Natalla Ejsmant biezumoŭna zhulała svaju rolu. Mahčyma, heta nie było tak, što jana havaryła «Voś dobra było b majho muža….» Heta prosta pryhoža z punktu hledžańnia niejkaha pijaru palityčnaha, sacyjalnaha, što kiraŭnik BT i pres-sakratarka prezidenta — muž i žonka. Heta cikava navat prostamu abyvacielu. Heta pryhoža hladzicca, takaja pryhožaja vokładka».
Nie vyklučaje Łukša i inšyja varyjant. «Mahčyma, niechta padhledzieŭ: «Hladzicie, u nas jość dobry chłopiec, na antresolach niedzie lažyć. Moža, jaho možna trochi vyšej? Vy ž viedajecie, chto ŭ jaho žonka, z kim jana pracuje?», — razvažaje jon.
Dapuskaje były televiadučy i imaviernaść taho, što intaresy brata mahła prałabiravać jaho siastra Hanna Ejsmant, jakuju jon charaktaryzuje jak «viadomuju, surjoznuju» asobu na BT.
Pry Natallu Ejsmant
Dźmitryj Łukša zhadvaje, što pracavaŭ z Natallaj Ejsmant, kali tolki pryjšoŭ na telebačańnie. «Jana ŭ majoj pamiaci zastałasia jak Nataša, taksama jak Ivan Ejsmant — Vaniem», — zaŭvažaje jon.
Były palitviazień zhadvaje, što kaliści pracavaŭ u adździele kultury, jaki raźmiaščaŭsia ŭ adnym kabiniecie z adździełam rehijonaŭ, dzie Natalla Ejsmant była viadučaj.
«Jana była viasiołaja. Jaje ŭsie nazyvali «šumnaja». Kali jana prychodziła, usie viedali, što Nataša pryjšła. … U jaje zaŭsiody była niejkaja historyja. Jana prychodzić — i ŭvieś siomy pavierch čuje, što siońnia bieły kot u čornyja plamy pierabieh joj darohu. I jana heta raskazvała tak smačna! (…) U jaje charyzma».
Pa słovach Łukšy, kali Natalla pačała vieści prahramu «Hałoŭny efir», jana trochi źmianiłasia, u jaje źjaviłasia subardynacyja. «Jana ŭžo była bolš da niebažycharoŭ BT».
Pra šlub Ivana i Natalli Ejsmantaŭ
Dźmitryj Łukša nazyvaje chłuśnioj razmovy pra toje, što šlub Ivana i Natalli Ejsmantaŭ byŭ pa raźliku.
«Ja bačyŭ, jak u ich raźvivaŭsia hety raman, jakim saramlivym byŭ Vania. Usie bačyli, što jamu padabajecca Nataša. I jakaja bajavaja Nataša była! I ŭsie dumali: «Nu kali ž vy ŭžo?!» I kali jany pačali sustrakacca, heta było miła. Było vidać, što heta ščyra. (…) Heta było pryhoža», — zhadvaje Łukša.
Łukša adznačaje, što siamja Ejsmantaŭ u jaho pamiaci pa stanie na 2010—2015 hady zastałasia jak prostyja ludzi. Ale adznačaje, što rezki karjerny ŭźlot i zornaść, jakuju pabačyli sami Ejsmanty, ich sapsavali. Potym ja niekatoryja momanty hladžu i dumaju: «Heta Nataša? Heta naša Nataša?!» [Choć,] mahčyma, jany ciapier na mianie hladzieli i [dumali]: «Heta naš Dzima? Jaki drenny chłopiec!».
«Ja vielmi chaču vieryć, što ŭ hłybini dušy jany zastalisia takimi, jak ja ich pamiataju. Mnie vielmi chočacca vieryć, bo, jak ja heta nazyvaju, zavodskija nastrojki ŭ ich dobryja byli. Nie byli jany kiepskimi ludźmi. Nie było ŭ ich niejkaj podłaści, paskudstva»,
— padkreślivaje Dźmitryj Łukša.
***
Dźmitryj Łukša naradziŭsia ŭ 1989 hodzie. U kancy 2000-ch i pieršaj pałovie 2010-ch pracavaŭ na BT, byŭ viadučym «Zony Ch».
U 2020 zdymaŭ pratesty dla kazachstanskaha telekanała «Chabar». U 2022 byŭ aryštavany i prysudžany da 4 hadoŭ źniavoleńnia za ŭdzieł u demanstracyjach i «dyskredytacyju Biełarusi». Razam ź im była asudžanaja jaho žonka Palina Pałavinka. Adbyvaŭ pakarańnie ŭ kałonii ŭ Škłovie.
Vyzvaliŭsia 3 lipienia 2024 hoda pa pamiłavańni adnačasova z žonkaj, paśla čaho siamja źjechała ŭ Polšču.
Hladzicie całkam:
Jakimi kvaterami i aŭtamabilami vałodaje siamja Ejsmantaŭ?
Ivana Ejsmanta pryznali najlepšym televiadučym Biełarusi
Sakrety pośpiechu Natalli Ejsmant: jak byłaja aktrysa stała najbližejšym čałaviekam Łukašenki
Były viadučy «Zony Ch» palitviazień Dźmitryj Łukša vyjšaŭ na svabodu pa pamiłavańni
«Usio było padrychtavana, ale nie paśpieŭ vyjechać ź Biełarusi». Raskazvajem pra eks-viadučaha BT Łukšu i jaho zatrymańnie KDB
«Usie bačyli, što jamu padabajecca Nataša, i dumali: «Nu kali vy ŭžo?!» Były palitviazień Łukša raskazaŭ pra svaje adnosiny z Ejsmantami8
Kamientary
U NN pojaviłaś podrabotka na storonie.
Mnie blizkaja familija Ejsmant i ja tut pra heta na forumie kazaŭ: dziavočaje proźvišča majoj babulki Leakadzii Ejsmant. Ci Ejśmant. Toje ž samaje.
A zaraz pa temie artykuła. Kali pažaniŭsia i pieršyje niekalki hadoŭ žyŭ na Aŭtazavodzie ŭ Minsku, to raz u hod da nas prychodziła para i raz u hod my z žonkaj prychodzili da ich na dzień narodzinaŭ našych žonak i ja sustrakaŭsia z ravieśnikam - mužam padruhi i adnakašnicy maj žonki. Jon maich hadoŭ, a našy žonki maładziejšyja za nas na try hady. U nas była dačka i ŭ ich była dačka. Jon žyŭ u prymach u pryvatnym domie na Aŭtazavodzie i ja taksama.
Potym pad šum kołaŭ, maŭlaŭ, tut la ich doma niejkuju darohu buduć budavać im dali kvateru ŭ Sierabrancy, a ja atrymaŭ kvateru la Daŭhabrockaj. Ale my praciahvali sustrakacca dva razy na hod ŭ dni narodzinaŭ našych žonak.
Taja siamja była byłyja kamsamolcy-aktyvisty. Nu i voś nastaŭ śvietły čyrvona-zialony lipień 1994-ha i inaŭhuracyja Alaksandra Łukašenki. Mužu taje padruhi majoj žonki Ryhoravič daŭ pasadu, skažu tak, va Uradzie RB.
I voś my pryjechali na dzień vareńnia da jaho žonki ŭ kvateru ŭžo pravitielstviennoho činovnika, a nie zvyčajnaha našaha siabra ci znajomaha.
Jak zaŭsiody vypili-zakusili, ale atmaśfiera nie była śviatočnaja, niejkaja pryhłušanaja. Raźvitvajemsia. Padychodzim da dviarej i čynoŭnik - haspadar kvatery kaža va ŭsie vuhły kalidora padziaku Ryhoraviču za jaho mudruju palityku. Heta pryblizna 1996 hod. Potym hetaha čynoŭnika Ryhoravič adpraviŭ pasłom nie skažu ŭ jakuju krainu i my raźvitalisia na doŭhija leta.
Potym naša Amieryka i śmierć ad raka majoj žonki. Što tam i jak z toj paraj nia viedaju. ITOHO: prostymi Vania i Nataša Ejsmanty pry pryznačeńni na dziarž pasadu pry Łukašenku dy jašče na BT być nie mohuć. Prostym moža być tolki prysud na 4 hady za pracu na inšaziemnaje TV padčas padziej u Minsku-2020.