Jak padsadnyja ahienty ad KDB mohuć razvodzić źniavolenych na hrošy, abiacajučy svabodu
Čarhovaje rasśledavańnie «Bajpoł» raskryvaje padrabiaznaści adnaho zakrytaha suda suprać supracoŭnika KDB, jaki padsadžvaŭ svajho ahienta ŭ kamiery. Heta historyja daŭniaja. Ale jana pakazvaje, jak śpiecsłužby praz «kačak» mohuć vyviedvać infarmacyju i ŭ abmien na niemałyja hrošy abiacać svabodu.
Hieroj historyi — major KDB Uładzisłaŭ Tataranka. Jon pracavaŭ u hałoŭnym upraŭleńni pa kontrraźviedvalnym zabieśpiačeńni pravaachoŭnych i kantralujučych orhanaŭ, baraćbie z karupcyjaj i arhanizavanaj złačynnaściu.
Zakrytaje sudovaje pasiadžeńnie pa kryminalnaj spravie suprać jaho prachodziła viasnoj 2011 hoda ŭ Minskim harnizonnym vajennym sudzie. Majora Tataranku abvinavačvali ŭ padrychtoŭcy da dačy chabaru, machlarstvie, złoŭžyvańni ŭładaju i atrymańni chabaru.
Jak vynikaje z materyjałaŭ sudovaj spravy, u orhanach KDB Tataranka zajmaŭsia apieratyŭnaj rabotaj z tymi, chto znachodziŭsia pad śledstvam ci byŭ asudžany i znachodziŭsia ŭ SIZA KDB.
Jak śćviardžajecca ŭ materyjale «Bajpoł», jon byŭ adnym z tych apieratyŭnych rabotnikaŭ, jakija padsadžvali da viaźniaŭ SIZA KDB ahientaŭ z metaj schileńnia da supracoŭnictva, paćviardžeńnia infarmacyi ab złačynstvach, atrymańnia dadatkovaj infarmacyi ab supraćpraŭnaj dziejnaści.
Padčas takoj dziejnaści śledčyja atrymlivali taksama infarmacyju ab sumach hrošaj, jakija mohuć być vykarystanyja dla tak zvanaha «vodkupu zakładnika» za raskajańnie.
U materyjale śćviardžajecca, što ŭ 2009 hodzie ŭ SIZA KDB pad kiraŭnictvam Uładzisłava Tataranki pravodziłasia ŭnutrykamiernaja raspracoŭka dvuch hramadzian Respubliki Biełaruś — byłoha karumpavanaha supracoŭnika milicyi z ABEZ I. i hienieralnaha dyrektara adnaho z aŭtasałonaŭ R., jaki skraŭ hrošy.
Dla taho, kab pravieryć, ci jość u abvinavačanych hrošy, Tataranka pravodziŭ apieratyŭnyja kambinacyi z dapamohaj hramadzianina Rasii Karena Vartaniana, jaki znachodziŭsia ŭ SIZA pa abvinavačańni ŭ sieryi vymahalnictvaŭ u Žodzinie. Tataranka padsadžvaŭ Vartaniana ŭ kamiery, dzie ŭtrymlivalisia I. i R.
Jak śćviardžajecca ŭ materyjale rasśledavańnia, Tataranka adznačaŭ, što
«Vartanian naležnym čynam vykonvaŭ svaje abaviazki (ahienta), u suviazi z čym jamu nieadnarazova prapanoŭvałasia zaachvočvańnie ŭ vyhladzie telefonnych pieramovaŭ i spatkańniaŭ».
Telefonnyja razmovy i spatkańni adbyvalisia ŭ asabistym kabiniecie Tataranki. Heta było zroblena, kab nie raskryć asobaŭ.
U materyjale śćviardžajecca, što Vartanian prapanavaŭ asudžanamu R. sadziejničańnie ŭ rašeńni pytańnia ab źmienie miery abmiežavańnia ci źmiakčeńni miery pakarańnia ŭ sudzie. Takim čynam Vartanian «raźvioŭ» R. na sumu z čatyrma nulami, aŭtavoz z pryčepam i ziamielny ŭčastak pad budaŭnictva zavoda dla vytvorčaści pitnoj vady.
Materyjały rasśledavańnia śviedčać ab tym, što za sadziejničańnie ŭ spravie samoha Vartaniana Tataranka atrymaŭ ad jaho rodnych 3 tysiačy dalaraŭ i kaštoŭnyja padarunki.
Pa takoj ža schiemie Vartanian dziejničaŭ i adnosna inšaha abvinavačanaha — I. Za hrošy jon jamu prapanoŭvaŭ sadziejničańnie ŭ źmienie miery abmiežavańnia ci spynieńnia kryminalnaj spravy. Dla I. pasłuha kaštavała 30 tysiač dalaraŭ.
Spačatku I. pahadziŭsia pieradać hrošy, ale paźniej admoviŭsia. Jaho žonka źviarnułasia ŭ MUS z zajavaju, što ad muža patrabujuć chabar za vyzvaleńnie z-pad varty i spynieńnie kryminalnaj spravy.
Apieratyŭnyja supracoŭniki MUS praviali pravierku — situacyja paćvierdziłasia.
U sudzie načalnik śledčaha ŭpraŭleńnia KDB Dźmitryj Kanaplanik i śledčy pa asabliva važnych spravach śledčaha ŭpraŭleńnia KDB Viačasłaŭ Kulaviec vystupili na karyść ahienta Vartaniana. Jany zajaŭlali, što były milicyjanier I. prapanoŭvaŭ hrošy Vartanianu, kab kupić aŭtamabil dla siamji, a nie dla svajho vodkupu.
Ale hetyja pakazańni byli pryznanyja jak nieadpaviednyja rečaisnaści. A Tataranku vystavili abvinavačańnie.
U vyniku Tataranku pryznali vinavatym u pieravyšeńni słužbovych paŭnamoctvaŭ. Sud pryznačyŭ jamu try hady pazbaŭleńnia svabody i štraf u pamiery 100 bazavych vieličyń. Akramia hetaha, jon byŭ pazbaŭleny prava na praciahu piaci hadoŭ zajmać pasady i zajmacca dziejnaściu, jakaja źviazanaja z vykanańniem arhanizacyjna-rasparadčych abaviazkaŭ.
U toj ža čas na padstavie art. 78 Kryminalnaha kodeksa sud vyrašyŭ pakarańnie ŭ dačynieńni da Tataranki ŭ vykanańnie nie pryvodzić, kali na praciahu dvuchhadovaha terminu jon nie ździejśnić novaha złačynstva i budzie vykonvać abaviazki, jakija na jaho ŭskładzienyja.
Tataranku apraŭdali pa abvinavačańni ŭ sprobie machlarstva ŭ asabliva bujnym pamiery, padbuchtorvańni da dačy chabaru ŭ bujnym pamiery, u atrymańni chabaru paŭtorna ŭ bujnym pamiery.
Ale nie pašancavała ahientu Vartanianu. Jaho pryznali vinavatym u sprobie ździejśnić machlarstva ŭ asabliva bujnym pamiery. Jaho pryhavaryli da 5 hadoŭ pazbaŭleńnia svabody z kanfiskacyjaj majomaści. Vartanian taksama byŭ pryznany vinavatym u padbuchtorvańni da dačy chabaru.
Čytajcie jašče:
BYPOL raskryŭ miechanizm pravakacyi suprać Daškieviča i Łobava ŭ 2010 hodzie
Jak HUBAZiK stvaraje fejkavyja pierapiski z fejkavymi ŭdzielnikami płana «Pieramoha»
Pamior dzied Koli Łukašenki — były viazień HUŁAHa, asudžany za dapamohu «banderaŭcam»8
Kamientary