U 101 hod pamior adzin z samych bahatych narviežcaŭ. Jon admoviŭsia ad miljardaŭ i pracavaŭ pa 10 hadzin na dzień
Ołaf Tun ažaniŭsia ŭ 95 hadoŭ, ale hetamu papiaredničała siamiejnaja drama.
U 2013 hodzie časopis Forbes uklučyŭ na toj čas 90-hadovaha narviežca Ołafa Tuna ŭ śpis 200 samych bahatych ludziej śvietu. Na toj čas jaho kampanija vałodała 450 abjektami nieruchomaści pa ŭsioj Narviehii, u tym liku 60 hatelami.
Jak zhadvaŭ sam Ołaf, u jaho ź dziacinstva była pradprymalnickaja žyłka. Žyvučy z baćkami na fiermie, va ŭzroście 8 hadoŭ jon zamaŭlaŭ pa katałohu kaladnyja paštoŭki, atrymlivaŭ ich pa pošcie i pradavaŭ susiedziam.
Pa słovach mužčyny, jon chacieŭ vyvučać miedycynu, ale ŭ 1939-m hodzie, kali jamu było 16 hadoŭ, pačałasia vajna, i baćki pabajalisia adpuskać jaho z domu.
«Mnie pryjšłosia zastacca ŭ našaj vioscy, i rabić mnie było zusim niama čaho. Niepadalok było niekalki fierm lisinaha futra, tak što ja ŭziaŭ z saboj skurki lisic i adpraviŭsia ŭ Osła, kab ich pradać», — raskazvaŭ paźniej Ołaf.
Praź niekalki hadoŭ u Osła chłopiec vałodaŭ svajoj łaŭkaj. Paśla taho, jak skončyłasia vajna, Tun nakiravaŭsia ŭ Łondan, dzie vyvučaŭ anhlijskuju movu. Viarnuŭšysia z Brytanii, u 1951 hodzie małady pradprymalnik zaniaŭsia prodažam futra za miažu, a ŭ chutkim časie nabyŭ na hałoŭnaj vulicy Osła budynak pad svoj mahazin. Ciapier tam znachodzicca bujny handlovy centr.
Paźniej pradprymalnik źviarnuŭ uvahu na nabyćcio inšaj nieruchomaści. U 1966 hodzie Tun adkryŭ svoj pieršy restaran, a ŭ 1989 hodzie zasnavaŭ sietku hatelaŭ. Paźniej jon pašyryŭ svoj biznes na handlovyja centry. Siarod jaho ŭładańniaŭ taksama byli aeraport i chimičny zavod.
Kali Ołafu było 90 hadoŭ, jon raskazvaŭ pra svoj režym pracy: «Ja prychodžu ŭ ofis niedzie ŭ 7-8 ranicy, zatym u mianie pastajannyja sustrečy, i dadomu ja viartajusia kala šostaj viečara. 10-hadzinny pracoŭny dzień dla mianie zvykły».
A maładym ludziam, jakija chočuć dasiahnuć pośpiechu, Tun raiŭ ciažka pracavać i być punktualnymi.
U 2007 hodzie pa pamiery bahaćcia Ołaf Tun byŭ druhim u Narviehii. Pry hetym jon praciahvaŭ žyć vielmi ścipła ŭ nievialikim taŭnchaŭzie na dźvie siamji niedaloka ad Osła. Jon nie mieŭ prysłuhi, sam prybiraŭ u domie i dahladaŭ sad.
«Ja samastojna kiruju svaim Falksvahienam, u mianie adna para łyžaŭ i adzin viełasipied. Maju čyrvonuju šapačku źviazała mnie žonka», — raskazvaŭ Ołaf žurnalistam.
Mienavita šapačka była adnoj z charakternych rys abličča miljardera. A žonkaj jon nazvaŭ žančynu, ź jakoj ažaniŭsia tolki ŭ 95-hadovym uzroście. Da hetaha Ołaf pražyŭ ź joj bolš za 30 hadoŭ, znachodziačysia ŭ šlubie ź inšaj žančynaj.
Pieršaja žonka Ołafa dastatkova rana pačała chvareć na chvarobu Alchiejmiera. Jak raskazvaŭ sam Tun, sa svajoj druhoj žančynaj jon paznajomiŭsia ŭ toj pieryjad, kali žonka ŭžo nie paznavała jaho. Ale razvodzicca ź joj jon nie zachacieŭ.
«Čamu b nie pakłapacicca ab tym, kamu nie paščaściła surjozna zachvareć? (…) Kali vy ŭžo takija darosłyja i nie źbirajeciesia zavodzić dziaciej, u hetym [razvodzie] niama nieabchodnaści», — raskazvaŭ Ołaf žurnalistam.
Jon tak i nie raźvioŭsia. A z kachankaj ažaniŭsia praz hod paśla śmierci žonki.
Paśpiachovy, ale biaździetny biznesmien u 2013 hodzie vyrašyŭ pieradać bolšuju častku svaich aktyvaŭ dabračynnamu fondu, jaki asnoŭnuju ŭvahu akazvaje miedycynskim daśledavańniam.
«Ja nie mahu ŭziać hrošy z saboju, kali pamru. Ale ja zrabiŭ tak, što paśla majoj śmierci hrošy buduć tracicca tak, jak ja chaču. (…) Niechta dumaje ab tym, jak by pieradać svoj biznes svajoj siamji, a mnie važna, kab moj fond padtrymlivaŭ navuku. Mnie zdajecca, mienavita navuka niasie vialikuju važnaść u hetym žyćci», — havaryŭ Tun.
Ołaf Tun pamior 16 listapada va ŭzroście 101 hod. Paśla jaho śmierci premjer-ministra Narviehii Jonas Har Ściore nazvaŭ Tuna «ŭnikalnym pradprymalnikam», jaki «nikoli nie zabyvaŭ pra svaju prynaležnaść da miascovaj narviežskaj supolnaści».
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič26
Kamientary