Z kavaj, cukierkami i kaśmietykaj: vybirajem advent-kalendary, zroblenyja ŭ Biełarusi
Pahladzieli, jakija advent-kalendary ŭ hetym hodzie prapanujuć biełarusam (i kolki hrošaj za ich prosiać). U padborcy vyklučna varyjanty, zroblenyja ŭ Biełarusi.
Sałodkija
Sioleta «Kamunarka» pachvaliłasia tym, što pačnie pradavać ułasny advent-kalandar. Praŭda, raźličany jon usiaho na 15 dzion. Abiacajuć, što ŭnutry buduć nie tolki cukierki i šakaładki, ale i mahnitnaja zakładka dla knih, navahodni mahnit na ladoŭniu, birulka-flikier z łahatypam fabryki. Košt adventa pakul nie viadomy.
«Spartak» zrabiŭ advent-kalandar u dvuch varyjantach: na 15 i na 31 akienca. Vialiki kaštuje kala 26 rubloŭ.
Aproč hetaha šmat biełaruskich majstroŭ prapanoŭvajuć u instahramie svaje advent-kalendary ź piernikami. Naprykład, u akaŭncie banafsheh.bakery1 možna nabyć nabor z 30 maleńkimi i 1 vialikim piernikam, jakija raśpisanyja ŭručnuju. Pad kožnym ź ich jość niejkaje navahodniaje zadańnie. Kaštuje sałodki advent 114 rubloŭ.
U instahram-akaŭncie sestry_cakes prapanoŭvajuć advent dla fanataŭ Hary Potera — mienavita hetamu piersanažu pryśviečany ŭsie malunki na piernikach. Kaštuje nabor z 30 štuk 75 rubloŭ.
Tortoletka.by prapanoŭvaje nievialiki piernikavy advent za 50 rubloŭ, a vialiki za 70 (ale tut vidavočna, što malunki nadrukavanyja).
Dla pryhažości
Pra advent-kalandar ad Luxvisage, na jaki abrynułasia chvala krytyki, my ŭžo pisali. Nabor z 12 bjuci-srodkaŭ pradajecca na markiet-płejsie Wildberries za 257 rubloŭ, ale realny ich košt, kali kuplać paasobku, ažno ŭ dva razy mienš.
Prykładna takija samyja pretenzii ŭ biełarusak i da inšaha biełaruskaha brendu kaśmietyki — firmy Modum. Jaje advent-kalandar taksama maje tolki 12 akiencaŭ. Ale jość u dvuch varyjantach, jakija faktyčna adroźnivajucca tolki ŭpakoŭkaj: bjuci-srodki ŭ muzykalnaj skryni kaštujuć na markiet-płejsie 187 rubloŭ, a ŭ zvyčajnaj — 153 rubli.
Na abureńni patencyjnych pakupnic, što skład adventu ciahnie tolki na 80 rubloŭ, pradstaŭniki brendu adkazvajuć, što skryni vielmi jakasnyja i ŭ ich potym možna zachoŭvać niejkija rečy.
Svoj pieršy advent sioleta vypuściŭ i Belor Design. Jak i ŭ kankurentaŭ, u hetym bjuci-kalendary 12 akiencaŭ. Ale jość i pryjemny bonus, bo padarunkaŭ na adzin bolš — 13. Jašče raduje toje, što ŭ adroźnieńnie ad Luxvisage Belor Design dasłaŭ svaje boksy ŭ pieršuju čarhu biełaruskim błohierkam, a nie rasijskim.
Kaštuje advent-kalandar ad Belor Design 150 rubloŭ. I heta pieršy prykład taho, kali košt biełaruskaj pradukcyi ŭ boksie pieravyšaje zajaŭlenuju vytvorcam canu na ŭvieś nabor. Bo kali nabyvać paasobku, to za tavary pryjdziecca zapłacić kala 168 rubloŭ
Kab pakłapacicca pra siabie
«Tryputnik dla dušy. 30 sposabaŭ pakłapacicca pra siabie» — mabyć, heta najbolš niebanalny advent-kalandar, jaki možna nabyć u Biełarusi.
Stvorany jon pa matyvach bestselera biełaruskaj žurnalistki i piśmieńnicy Volhi Prymačenka «Usio skončycca, a ty nie».
Paznačana, što hety advent-kalandar — krynica emacyjnaj padtrymki dla tych, chto stamiŭsia i straciŭ cikavaść da žyćcia. Karystalnikam prapanoŭvajuć vydalać achoŭny płast «tryputnika», kab daviedacca, što možna zrabić, kab pamienšyć tryvožnaść i pieraklučyć uvahu na prostyja, zrazumiełyja i efiektyŭnyja dziejańni.
Rajać praviarać prapanavanyja varyjanty i zabirać u svaju skarbonku tyja, što spracavali lepš za ŭsio. Niachaj jany stanuć «praviłami bieražlivych adnosin z saboj», na jakija vy zaŭsiody zmožacie abapiercisia.
Traktavać zadańni lepš maksimalna šyroka: voś što pieršaje pryjdzie na rozum, toje i rabicie. Nie abaviazkova vykonvać dasłoŭna — natchniajciesia zadadzienym napramkam, słuchajcie siabie i padkazki cieła.
Na oz.by «Tryputnik dla dušy. 30 sposabaŭ pakłapacicca pra siabie» kaštuje 21 rubiel, a ŭ anłajn-kramie 21vek.by — kala 14 rubloŭ.
Dla zabavy
U topie prodaž kramy oz.by jość zrobleny ŭ Biełarusi advent-kalandar z zadańniami «Navahodni pierapałoch 2» (papiaredniaja viersija ludziam spadabałasia, kali mierkavać pa kamientaryjach).
Stvaralniki abiacajuć, što ich advent dapamoža nasycić padziejami kožny dzień śniežnia. U nabory jość 31 kartka, na kožnaj ź jakich pa try zadańni roznaha ŭzroŭniu składanaści — ad palubavacca ŭpryhožanymi vitrynami kram da śpiačy kaladny kieks. Vykanać adno zadańnie ci niekalki adrazu, vyrašać tolki vam.
Bonusam iduć kartki z padborkami najlepšych navahodnich filmaŭ, multfilmaŭ, piesień. Kaštuje nabor kala 19 rubloŭ.
Dla amataraŭ kavy
Kampanija Daloni Coffee Roasters, jakaja zajmajecca absmažvańniem kavy, svoj advent-kalandar (Coffee advent calendar) vypuskaje čaćviorty hod zapar. Kaniešnie, jaho asnova — kava ŭ dryp-pakietach (jana ŭ kožnym z 31 akienca).
Dla taho, kab praces dehustacyi byŭ bolš tvorčym i cikavym, u advent ukłali dehustacyjny list i koła smakaŭ z paradami, jakija dapamohuć amataram kavy strukturavać svoj dośvied.
U jakaści pryjemnych bonusaŭ u Coffee advent calendar jość natatnik, iryski ručnoj pracy, formački dla stvareńnia imbirnych piernikaŭ i charčovy farbavalnik dla ajsinhu, pałatno, farba i pendzal. Nu i samaje cikavaje — u advent dadali ŭsio nieabchodnaje dla taho, kab pasadzić svajo kavavaje dreva.
Košt takoha advent-kalendara — 195 rubloŭ, ale kali zamaŭlaješ adrazu dva, to atrymajecca 375 rubloŭ za abodva.
Dla tych, chto bolš lubić harbatu
Moodbox.by prapanoŭvaje niezvyčajny advent-kalandar. U jaho ŭvachodzić 10 roznych hatunkaŭ harbaty. Zavarvać harbatu prapanujecca nie ŭ niejki dzień kalendara, a ŭ peŭnyja momanty. Naprykład, kali budzieš padvodzić vyniki adychodziačaha hoda ci kuplać padarunki blizkim. Kaštuje taki advent 44 rubli.
Dla maleńkich
Cikavyja advent-kalendary dla dzietak prapanoŭvaje One good advent. Dla dziaciej ad 4 hadoŭ u ich jość, naprykład, «advent-horad»: tam nieabchodna kleić na postar nalepki, a taksama kožny dzień śniežnia vykonvać tematyčnaje zadańnie. Kaštuje jon 40 rubloŭ.
Dla školnikaŭ — «advent dom», dzie 31 kvatera, u kožnaj ź jakoj jość kiuar-kod z navahodnimi historyjami pra jaje žycharoŭ. Taksama praduhledžany śpis navahodnich zaniatkaŭ da śviata. Kaštuje taki 50 rubloŭ.
Dla samastojnaha napaŭnieńnia
Kali hatovyja varyjanty vam nie padychodziać, dyk možna nabyć pusty advent-kalandar i napoŭnić jaho samastojna.
Naprykład, woody.by prapanoŭvajuć roznyja varyjanty advent-kalendaroŭ z DSP (vidavočny plus — imi možna karystacca šmat hadoŭ). Advent «Piernikavy dom» kaštuje 65 rubloŭ, a advent u vyhladzie hruzavika — 45 rubloŭ.
Mark Formelle pradaje za 25 rubloŭ boks z šaściu nievialikimi skryniami, kudy možna schavać padarunački (ich, viadoma, treba nabyć asobna).
Apublikavali razmovy žonki Bałaby, u jakich jana sprabuje schavać ad muža troch kachankaŭ, u tym liku Rusłana Alachno5
Kamientary