Były aficer, vyžyŭ u strašnym bai. Chto toj kalinoviec Vieramiejčyk, jakoha Vjetnam addaŭ biełaruskamu KDB?

Vučyŭsia ŭ biełaruskamoŭnaj škole, słužyŭ u Piečach

Vasilu 34 hady, jon rodam z Salihorska. Ale bolšaść žyćcia pravioŭ u Minsku — vučyŭsia ŭ biełaruskamoŭnaj himnazii № 9, potym u histaryčnym kłasie Liceja BDU. 

«Mianie zatrymlivali jašče ŭ 2005 hodzie pry pierajmienavańni praśpiekta Franciška Skaryny, mnie tady było 15 hadoŭ. Mamu vyklikali ŭ škołu, jana skazała, što mnoj hanarycca, kłas paapładziravaŭ mnie. Ja ŭdzielničaŭ u Płoščy 2006 hoda», — raskazvaŭ «Radyjo Svaboda» Vasil.

Vieramiejčyk skončyŭ Vajskovuju akademiju Biełarusi i słužyŭ u Piečach. Sa słužby jon zvolniŭsia ŭ 2016 hodzie ŭ zvańni lejtenanta, paśla čaho pracavaŭ u IT.

«Ja ź vielmi intelihientnaj siamji. Pieršaj majoj knihaj paśla «Bukvara» byŭ «Adkul naš rod» Uładzimira Arłova. Druhaja — «Dziesiać viakoŭ biełaruskaj historyi» Arłova i Sahanoviča. I dačka ŭ mianie raście prykładna z takim ža naboram», — dzialiŭsia jon u intervju.

Zatrymlivali na 10 sutak u 2020-m

U 2020 hodzie Vieramiejčyk padtrymaŭ ruch za svabodnyja vybary, udzielničaŭ u mitynhach i maršach. U listapadzie 2020 hoda jaho zatrymali pa padazreńni ŭ padpałach aŭtamabilaŭ supracoŭnikaŭ prakuratury. Ale paśla 10 sutak aryštu jon vyjšaŭ na volu: dokazaŭ nie znajšli.

Napačatku 2021 hoda praz pahrozu paŭtornaha aryštu emihravaŭ va Ukrainu, žyŭ ź siamjoj u Lvovie.

Pavialičyć

Byŭ namieśnikam «Bresta»

U lutym 2022-ha Vasil dałučyŭsia da biełaruskaha tady jašče bataljona imia Kastusia Kalinoŭskaha. Jon uziaŭ sabie pazyŭny «Pacuk».

Hetaja mianuška kaliści dastałasia Vasilu jašče padčas terminovaj słužby — jon prajhraŭ u sprečcy i pavinien byŭ sabie prydumać śmiešnuju i kryŭdnuju mianušku.

Mužčyna byŭ namieśnikam «Bresta» (Ivana Marčuka) u bataljonie «Vołat».

Pavialičyć

Vieramiejčyk udzielničaŭ u bajach u Chiersonskaj, Mikałajeŭskaj i Łuhanskaj abłaściach.

U krasaviku 2022 hoda ŭ Mikałajeŭskaj vobłaści «Pacuka» padčas ciažkaha boju paranili. Tady ź siami bajcoŭ vyžyli tolki dvoje.

Vieramiejčyka ŭznaharodzili miedalom «Ukraina pierš za ŭsio».

Vasil byŭ taksama siabram zahinułaha kalinoŭca «Vołata» (Pavieł Susłaŭ).

«Ja z «Vołatam» pierapisvaŭsia apošni raz za hadzin piać da jaho śmierci, — raskazvaŭ «Pacuk». — Z samaha zapaminalnaha — heta razmova ź im. Ja z tryma zamiežnikami pryjechaŭ za dzień da jaho śmierci na miesca, dzie jon zahinuŭ. I my ŭsiu noč ź im prahavaryli pra žyćcio, dziaŭčat, vajnu. Ja navat škadavaŭ, što nie zapisaŭ na dyktafon. Chto ž viedaŭ».

Pavialičyć

Adzin z zasnavalnikaŭ Asacyjacyi biełaruskich dobraachvotnikaŭ

Paśla taho, jak Vasil pakinuŭ Połk Kalinoŭskaha, jon žyŭ u Vilni. Razam ź inšymi byłymi vajarami zasnavaŭ Asacyjacyju biełaruskich dobraachvotnikaŭ.

Vasil uvajšoŭ u Kaardynacyjnuju radu 3 sklikańnia ad błoka Prakopjeva-Jahorava.

Jak apynuŭsia ŭ Vjetnamie

Na padstavie taho, što Vasil raniej byŭ biełaruskim vajskoŭcam, Litva pryznała jaho pahrozaj nacyjanalnaj biaśpiecy. Mužčynu daviałosia pakinuć krainu. Va Ukrainu viarnucca było niemahčyma, bo atrymaŭ zabaronu na ŭjezd u krainu — jak miarkujecca, praz kanflikt sa štabam Pałka Kalinoŭskaha. Niejki čas žyŭ u Hruzii, a ŭ vyniku Vieramiejčyk apynuŭsia ŭ Vjetnamie.

Abstaviny jahonaha zatrymańnia dakładna nie viadomyja. Zdaryłasia heta 13 listapada — Vasil tolki paśpieŭ paviedamić, što zatrymany. Nakolki viadoma, užo 14 listapada byłoha vajara departavali ŭ Biełaruś.

• 1
• 4
• 1
• 6
• 8
• 38
• 20
• 0