Nie viedajecie, intraviert vy ci ekstraviert? Mahčyma, ambiviert
My pryzvyčailisia dzialić ludziej na zamknutych i nieludzimych intraviertaŭ dy adkrytych i siabroŭskich ekstraviertaŭ. Ale nie zaŭsiody kankretnaha čałavieka možna adnieści da adnaho z hetych typaŭ. Jak śćviardžajuć psichołahi, jość typ čałavieka-ambivierta. I być takim vielmi dobra.
Nasamreč niama na ŭsie sto adsotkaŭ ludziej z rysami charaktaru tolki intraviertnaści ci ekstraviertnaści. U niekaha pieravažajuć adny rysy, u inšaha — druhija. Ale jość ludzi, jakija znachodziacca prykładna ŭ siaredzinie dyjapazonu. Jany mohuć u peŭnych situacyjach być zamknutymi, a ŭ inšych — havarkimi i tavaryskimi.
Naprykład, dniom typovy ambiviert moža vyrašać sotni pracoŭnych zadač, być u centry ŭvahi kaleh, a viečaram zamknucca ŭ chacie i zasieści ź lubimaju knihaju na ŭvieś viečar.
Z łacinskaj movy «ambi» pierakładajecca jak «abodva», što i adlustroŭvaje źmiašeńnie dvuch supraćlehłych sacyjalnych typaŭ. Upieršyniu dzialić ludziej na ekstraviertaŭ i intraviertaŭ prapanavaŭ šviejcarski navukoviec Karł Junh u 1920-ja hady. Vučony viedaŭ i pra isnavańnie treciaha typu asoby, ale nie ŭnios u svaju typałohiju. Sam termin «ambiviertnaść» prapanavaŭ amierykanski psichołah Edmund Konklin (Edmund Conklin).
Prykmiety taho, što vy ambiviertny čałaviek
U vas byvajuć pieryjady, kali chočacca być u kalektyvie, a taksama pieryjady, kali vy adčuvajecie siabie lepš za ŭsio ŭ adzinocie. Pry hetym nie adčuvajecie siabie kinutym i nikomu nie patrebnym.
Vam padabajecca praca ŭ kalektyvie, vy prysłuchoŭvajeciesia da mierkavańniaŭ inšych, umiejecie dzialić adkaznaść i padtrymlivać kamandny duch. U toj ža čas asobnyja prablemy ci zadačy vyrašajecie samastojna. Vy addajacie pieravahu takomu pracoŭnamu asiarodździu, dzie mohuć spałučacca kamandnaja i samastojnaja praca.
Vy lubicie parazmaŭlać na lubyja temy, ale vam padabajecca i słuchać. Vy ŭvažliva sočycie za situacyjaj i chutka prystasoŭvajeciesia da surazmoŭcy, lohka razumiejecie emacyjny stan čałavieka i ŭmiejecie spačuvać. Pry hetym vy padśviadoma adčuvajecie, nakolki vaš surazmoŭca ščyry, ci možna jamu daviarać.
U vas šmat siabroŭ, vy lohka zavodzicie novych znajomych, možacie padtrymlivać suviazi z roznymi supołkami. U toj ža čas addajacie pieravahu znajomamu sacyjalnamu asiarodździu i padtrymlivajecie ciesnyja suviazi ź niekalkimi blizkimi siabrami.
Vy nie imkniaciesia da pabudovy karjery, bo vam kamfortna ŭ vašym statusie. Pieryjadyčna zajaŭlajecie pra siabie i svaje dasiahnieńni, ale robicie heta chutčej nie z-za ambicyj, a praz žadańnie niešta dakazać.
Vy nikoli nie viedajecie, čamu addaście pieravahu — pajści na šumnuju viečarynku ci pasiadzieć u vuzkim kole. A kali ŭsio-taki vyrašajecie pajści, to paśla pieryjadu burnaj aktyŭnaści i znajomstvaŭ z novymi ludźmi chutka adčuvajecie stomlenaść i chočacie dadomu.
Jakija pieravahi ŭ ambiviertaŭ
Ambivierty mohuć znajści padychod da kožnaha čałavieka. Z adnymi ludźmi jany charyzmatyčnyja, ź inšymi — łahodnyja i zdolnyja zavajavać davier svaim umieńniem słuchać.
Ambiviert najlepš padychodzić na rolu lidara, bo moža spałučyć najlepšyja lidarskija jakaści, jakija ŭłaścivyja ekstraviertam (umieńnie natchnić, pavieści za saboju, iści «naprałom») i intraviertam (uvažlivaje abdumvańnie zadačy i šlachoŭ jaje rašeńnia, umieńnie słuchać i prysłuchoŭvacca, stresaŭstojlivaść).
Ekśpierty pa lidarstvie pryznajuć, što dla kiraŭnika samy važny navyk — zdolnaść adaptavacca. Kiraŭniku vielmi važna ŭmieć prystasoŭvacca da roznych ludziej i situacyj, svoječasova mianiać styl kiravańnia, kab atrymać žadanaje. Najlepš heta mohuć zrabić ambivierty.
Jakija prafiesii najbolš padychodziać dla ambiviertaŭ
Dziakujučy najaŭnaści šyrokaha śpiektra zdolnaściaŭ, ambivierty vielmi ŭniviersalnyja i mohuć spravicca ź luboj rabotaj. Adnak jość prafiesii, dzie mienavita ŭmieńnie sumiaščać dźvie supraćlehłyja rysy charaktaru vielmi nieabchodnyja.
U 2013 hodzie amierykanski psichołah Adam Hrant pravioŭ daśledavańnie, jakoje pakazała, što
nasupierak raspaŭsiudžanamu mierkavańniu ab tym, što najlepšyja pradaŭcy — ekstravierty, na samaj spravie ambivierty dasiahajuć bolšaj pradukcyjnaści prodažu.
Heta źviazana, ličyć navukoviec, z tym, što jany pa svaim charaktary ŭmiejuć jak havaryć, tak i słuchać. Jany demanstrujuć dastatkovuju ŭpeŭnienaść i entuzijazm, kab pierakanać klijenta i zakryć prodaž. Ale ŭ toj ža čas jany ŭmiejuć prysłuchoŭvacca da intaresaŭ klijentaŭ i radziej za ekstraviertaŭ vyhladajuć praźmierna ŭzbudžanymi abo samaŭpeŭnienymi. Jany zdolnyja vyklikać prychilnaść da siabie i zaklučyć paśpiachovuju ździełku.
Akramia pradaŭcoŭ, dla ambiviertaŭ, jak śćviardžajuć psichołahi, dobra padyduć takija prafiesii, jak nastaŭnik, žurnalist, psichołah, markietołah, sacyjalny rabotnik, mieniedžar prajektaŭ, pradprymalnik, dypłamat i palityk.
Čytajcie jašče:
Kamientary
tak hučyć, byccam intravierty - heta niešta drennaje... mnie, jak intraviertu, až kryŭdna stała)
a mnie adzin psichołah niekali patłumačyŭ roźnicu pamiž intraviertami i ekstraviertami tak: intraviert vypracoŭvaje žyćciovuju enierhiju ŭ sabie, biare sa svaich unutranych resursaŭ, a ekstraviert biare enierhiju ad inšych. to bok usie enierhietyčnyja vampiry ekstravierty, ale nie ŭsie ekstravierty - vampiry. napeŭna)