Rasčaravany prybytkam ad «tapańnia chamiaka» biełarus paskardziŭsia ŭ tavarystva abarony pravoŭ spažyŭcoŭ. Ci spracavała?
«Prabačcie za ščyraść, ale łoch — nie mamant, łoch nie vymre».
Adzin z karystalnikaŭ našumiełaj hulni Hamster Kombat vielmi rasčaravaŭsia prybytkam ad «tapańnia chamiaka» i tamu vyrašyŭ źviarnucca da tavarystva abarony pravoŭ spažyŭcoŭ Biełarusi, kab toje «choć niešta zrabiła» z usioj hetaj situacyjaj.
«Vitaju! U mianie pytańnie pa chamiaku, dumaju, vy čuli, što ŭsie tapali chamiaka. Abiacali, što vyjduć na biržu i ŭsie na hetym zarobiać. A ciapier akazałasia, što kurs HMSTR (unutranaja kryptavaluta hulni. — «NN») amal nulavy. Ludzi siadzieli dniami i načami, tapajučy chamiaka. A ŭ vyniku, usie namahańni ŭ nul. Skažycie, ci realna niešta zrabić uvohule? Ci sotni tysiač ludziej prosta marnavali miesiacy svajho žyćcia daremna?» — skardzicca karystalnik u aficyjnuju hrupu «Ukantakcie» tavarystva.
Adkaz jurysta ad arhanizacyi nie prymusiŭ siabie čakać (paśla toj vybačyŭsia za naśmiešku). Juryst zajaviŭ, što čakańni karystalnika — heta jahonyja prablemy, i paraiŭ jamu źmianić rod dziejnaści, «a nie ciskać chamiačka».
«Zajmiciesia narmalnaj spravaj, a jašče lepš lubimaj spravaj, i ŭsio ŭ vas budzie dobra. A kali spadziavacca, što, tapajučy chamiaka, vy staniecie miljanieram — to, bajusia, vas čakaje raźbitaje karyta», — adznačyŭ juryst tavarystva abarony pravoŭ spažyŭcoŭ Biełarusi.
Akramia taho, z karystalnika pačali śmiajacca i inšyja ludzi. Tak, pad kamientarami da dopisu prahučali reakcyi nastupnaha źmiestu.
«Prabačcie za ščyraść, ale łoch — nie mamant, łoch nie vymre».
«My jašče ŭ našaj pravincyi pakiemonaŭ nie łavili, a vy ŭžo chamiakoŭ niejkich tapajecie».
«Vy realna takija isnujecie, ci heta prosta ŭkid?»
«Možna śpinier pakrucić, kažuć, što supakojvaje».
«Prosta tapać treba ŭmieć. Ja voś za try miesiacy tapańnia 100 tysiač dalaraŭ vyvieŭ, usio pracuje».
Nahadajem, što dniami adbyŭsia liścinh miehapapularnaj hulni Hamster Kombat, padčas jakoha hulcam pačali vydavać realnyja hrošy za prodaž unutryhulniavaj kryptavaluty Hamster Coin (HMSTR) na biržy, jakaja zdabyvałasia šlacham prostaha naciskańnia (tapańnia) na chamiaka padčas hulni. Ale hulcy ŭ vyniku zastalisia rasčaravanyja.
Štomiesiačnaja kolkaść karystalnikaŭ hulni pieravyšaje 104 miljony čałaviek. Košt adnoj kryptamaniety Hamster Coin składaje kala $0,1, a na sami kryptamaniety ŭ hulni možna kuplać palapšeńni, jakija pavialičvajuć pasiŭny prybytak hulca.
U pieršuju čarhu hulcy byli niezadavolenyja pamieram uznaharody. Da fiksacyi prahresu ŭ hulni raspracoŭščyki paviedamlali, što hałoŭnym pakazčykam pry raźmierkavańni tokienaŭ stanie pakazčyk pasiŭnaha prybytku ŭ hulni.
Paśla padviadzieńnia vynikaŭ vyśvietliłasia, što za 1 młn prybytku ŭ hadzinu hiejmiery atrymali prykładna pa 220 HMSTR, što pry siońniašnim kursie składaje $2,2.
Akramia taho, karystalnikaŭ, jakija vykarystoŭvali aŭtamatyzavanyja sposaby zdabyčy maniet, abvinavacili ŭ čytarstvie i pazbavili ŭznaharody. Miarkujučy pa kamientarach u sacsietkach i tematyčnych telehram-čatach, niekatorych hulcoŭ abvinavacili ŭ parušeńni praviłaŭ niezasłužana.
U častki hulcoŭ u dadatku adlustroŭvajecca paviedamleńnie pra toje, što vyvad na kašalki Binance, OKX, Bybit i Telegram Wallet časova zakryty. Adziny dastupny sposab vyvadu HMSTR-kryptabirža EBI.
Źniavoleny raskazaŭ, jak siadzieŭ u kałonii ŭ Hłybokim u susiedniaj kamiery sa Statkievičam2
Kamientary
A kab mahli b daciahcisia, adkaz byŭ by inšy, ŭžo b svałačylisia za "pravy spažyŭca" pa sudoch