Łukašenka pamiłavaŭ eks-kiraŭnika svajoj achovy Uciuryna

Alaksandr Łukašenka pamiłavaŭ byłoha namieśnika dziaržsakratara Rady biaśpieki i byłoha kiraŭnika svajoj słužby biaśpieki Andreja Uciuryna. U 2020 hodzie toj byŭ prysudžany da 12 hadoŭ źniavoleńnia za karupcyju.

Pra vyzvaleńnie Uciuryna paviedamiŭ były palitviazień Siarhiej Piatruchin. Krynicy «NN» paćvierdzili hetu infarmacyju. 

Uciuryn byŭ adnym z samych addanych łukašenkaŭskich hvardziejcaŭ. Niekali jašče jahony baćka ŭznačalvaŭ elitnuju čaść Unutranych vojskaŭ 3214, a sam Andrej pajšoŭ u Słužbu biaśpieki prezidenta ŭ 1995-m i dasłužyŭsia da načalnika ŭ hetym viedamstvie, da jakoha ŭ Łukašenki samy vialiki davier. Jon uznačaliŭ Słužbu biaśpieki ŭ 2007 hodzie i kiravaŭ joj siem hadoŭ. Paśla staŭ namieśnikam dziaržsakratara Rady biaśpieki.

Uciuryna zatrymali ŭviesnu 2019 hoda ŭ momant atrymańnia chabaru ad rasijskaha biznesoŭca. Paźniej Łukašenka paviedamiŭ, što Uciuryn «trapiŭ pad pryceł» siłavikoŭ, kali jašče ŭznačalvaŭ słužbu achovy.

Sud nad Uciurynym prachodziŭ z krasavika pa lipień 2020 hoda. Jaho, kavalera ordena «Za słužbu Radzimie» i ŭładalnika miedala «Za biezdakornuju słužbu», pryznali vinavatym u atrymańni chabaraŭ na ahulnuju sumu 192 tysiačy dołaraŭ.

Takija hrošy jamu płacili za łabiravańnie intaresaŭ pry pastaŭcy telekamunikacyjnaha abstalavańnia dla DVP MUS, u pryvatnaści dla turmy №8 u Žodzinie.

Uciurynu prysudzili 12 hadoŭ pazbaŭleńnia voli ŭ kałonii ŭzmocnienaha režymu, a taksama pazbavili zvańnia pałkoŭnika.

Pakarańnie były vysokapastaŭleny siłavik adbyvaŭ u kałonii ŭ haradskim pasiołku Vićba Viciebskaj vobłaści. Usiaho pa «spravie Uciuryna» asudzili 16 čałaviek. Siarod ich — čynoŭniki Ministerstva finansaŭ, a taksama mieniedžary Nacbanka, BPS-Śbierbanka, Biełarusbanka, kiraŭnik «Biełtelekama», pradstaŭniki kamiercyjnych struktur. Akramia taho, terminy atrymali rasijskija biznesmieny, jakija davali chabary.

Usiaho ŭ datyčnych kanfiskavali bolš za $1,65 miljona.

Takim čynam, Uciuryn adsiadzieŭ mienš za pałovu z pryznačanych jamu 12 hadoŭ.

Pavialičyć

***

Andrej Uciuryn naradziŭsia ŭ 1971 u Pienzie. U 1992 skončyŭ Sarataŭskaje vyšejšaje vajskovaje kamandnaje vučylišča MUS Rasii, a ŭ 2002 — Akademiju MUS Biełarusi. Ad 1995 — u słužbie achovy Łukašenki. Uznaharodžany ordenami «Za biezdakornuju słužbu» i «Za słužbu Radzimie». Kiraŭnik Słužby achovy ŭ 2007-2014. Namieśnik dziaržsakratara Rady biaśpieki (2014-2019). Znachodziŭsia ŭ źniavoleńni z 2019 da 2024.

• 0
• 1
• 2
• 1
• 0
• 0
• 8
• 0