Łukša raskazaŭ, na jakich umovach adbyvałasia pamiłavańnie

Były viadučy i palitźniavoleny Dźmitryj Łukša, jaki vyjšaŭ na svabodu pa pamiłavańni 3 lipienia, u TOKu raskazaŭ pra abstaviny svajho vyzvaleńnia. Jon śćviardžaje, što zahadzia nie pisaŭ prašeńnie ab pamiłavańni, jamu heta prapanavała zrabić administracyja kałonii 15 červienia 2024 hoda:

«Ja pryjšoŭ u kabiniet, dzie byŭ pradstaŭnik Hienieralnaj prakuratury. Usio vielmi spakojna, jak u kino. Jon pakazvaje mnie paśviedčańnie. «Siadajcie, kali łaska. Jość šanc, kab vy pajšli dachaty» — «Dobra». Jon kaža: «Voś, treba padpisać. Da 3 lipienia niešta budzie». Ja zapytaŭsia, jakija ŭmovy. Jon adkazaŭ: «Nijakich. Vy vychodzicie i ŭsio. (…) Pra ciabie zabyvajucca, kali, zrazumieła, sam nikudy nie palezieš. Prosta žyvi».

Mužčyna raskazvaje, što paprasiŭ pradstaŭnika prakuratury zrabić takuju ž prapanovu jaho žoncy Palinie Pałavinka, jakoj zastavałasia trochi bolš za miesiac da vyzvaleńnia. «Jon nie viedaŭ, što ŭ mianie jość žonka [za kratami]. (…) Jon niekamu telefanuje. Ja čuŭ, jon pytajecca: «Takaja-ta ŭ vas siadzić? Pahavarycie ź joj taksama. Muž pieradaje pryvitańnie». I jon kaža [mnie]: «Ja nie viedaju, u jaje vielmi mały astatak».

Pa słovach Łukašy, tolki paśla vyzvaleńnia jon daviedaŭsia, što jaho žoncy takuju ž prapanovu zrabili jašče 13 červienia — to-bok za dzień da taho, jak adbyłasia razmova ź im. Takim čynam, padkreślivaje jon, Palina vyjšła na volu nie ź jaho padačy.

Łukša raskazvaje, što da dnia vyzvaleńnia jon nie vieryŭ, što jano nasamreč adbudziecca:

«Ja, chutčej, nie vieryŭ, što heta budzie. (…) Kali ja pryjšoŭ na [razmovu z prakuroram], sa mnoj stajali chłopcy. Ja pytajusia: «U kaho jaki astatak?». I jany adkazvajuć: «Dva miesiacy», «try miesiacy». A ŭ mianie hod i try miesiacy.

Ja da apošniaha, da taho momantu, pakul mianie nie zabrali [z atrada] 3 lipienia byŭ upeŭnieny, što mianie nie razhledziać u Minsku. Ja zdahadvaŭsia, što, peŭna, hety dakumient pajedzie ŭ Minsk. U Minsku budzie niejkaja kamisija ci samomu čałavieku (Łukašenku — NN) patrapić. Ja byŭ upeŭnieny, što mianie nie adpuściać z-za astatku. Hod i try miesiacy — heta vielmi šmat».

Pa słovach Łukšy, paśla padpisańnia prašeńnia ab pamiłavańni pačaŭsia napružany pieryjad čakańnia. My čamuści padumali, što nas vypuściać pierad 3 lipienia, za tydzień da hetaj daty. Što nas buduć vypuskać mienavita 3-ha, my byli ŭpeŭnieny, što nie — vielmi ž pafasna».

Adnak, nasupierak mierkavańniam, vyzvaleńnie adbyłosia mienavita ŭ hety dzień:

«Ja pamiataju, my idziom na śniadanak, i baču: viaduć niekudy adnaho chłopca z tych, što sa mnoj byŭ na padpisańni. I ŭ mianie adrazu pieršaja dumka: «Aha, jaho — tak, a mianie — nie. Inakš by nas zabrali ŭsich [z atrada]». A potym ja zrazumieŭ, što nas pa adnym vyryvali i adpraŭlali [na vychad]».

***

Dźmitryj Łukša naradziŭsia ŭ 1989 hodzie. U kancy 2000-ch i pieršaj pałovie 2010-ch pracavaŭ na BT, byŭ viadučym «Zony Ch».

U 2020 zdymaŭ pratesty dla kazachstanskaha telekanała «Chabar». U 2022 byŭ aryštavany i prysudžany da 4 hadoŭ źniavoleńnia za ŭdzieł u demanstracyjach i «dyskredytacyju Biełarusi». Razam ź im była asudžanaja jaho žonka Palina Pałavinka. Adbyvaŭ pakarańnie ŭ kałonii ŭ Škłovie.

Vyzvaliŭsia 3 lipienia 2024 hoda pa pamiłavańni adnačasova z žonkaj, paśla čaho siamja źjechała ŭ Polšču.

Hladzicie całkam:

• 0
• 2
• 0
• 0
• 0
• 0
• 0
• 0