Try hady tamu ajcišnik Andrej Zielcer akazaŭ supraciŭ siłavikam, jakija pryjšli da jaho dachaty

U 2020—2024 hadach za patrabavańni sumlennaha padliku hałasoŭ, pratest suprać vajny abo vystupy suprać łukašyzmu byli aryštavanyja dziasiatki tysiač ludziej. I tolki adzin ź ich sustreŭ siłavikoŭ, jakija pryjšli jaho aryštoŭvać, sa zbrojaj u rukach. Heta zdaryłasia 28 vieraśnia 2021 hoda na vulicy Jakuboŭskaha ŭ Minsku.

Dahetul niajasna, čamu da Zielcera pryjšli — z vobšukam ci aryštoŭvać. Dźviery da jaho ŭ kvateru vybivali hetaksama, jak u tysiačy inšych kvater. Ale 31-hadovy ajcišnik sustreŭ bryhadu siłavikoŭ sa strelbaj u rukach. Pieršym strełam jon paceliŭ u svajho adnahodka, supracoŭnika KDB Dźmitryja Fiedasiuka z pazyŭnym «Nirvana».

Łukašenkaŭcy apublikavali videa šturmu kvatery, jakoje zdymali siłaviki. Kadraŭ, źniatych na telefon žonkaj Zielcera, Maryjaj Uśpienskaj, jany tak i nie apublikavali.

Pavialičyć

Pieratrus u Zielcera byŭ adnoj z tysiač takich akcyj padčas masavych represij. Ale heta byŭ adziny vypadak, kali achviara sustreła siłavikoŭ sa zbrojaj u rukach.

Hetaja biesprecedentnaja padzieja vyklikała ŭ biełarusaŭ buru emocyj, a taksama šmat pytańniaŭ.

Łukašenkaŭskaja administracyja skarystalisia situacyjaj, kab pravieści kampaniju zastrašvańnia. Za kamientaryi z asudžeńniem dziejańniaŭ siłavikoŭ zaviali sotni kryminalnych spraŭ.

Siarod inšych, byŭ zatrymany žurnalist «Kamsamolskaj praŭdy» Hienadź Mažejka — za stanoŭčy artykuł pra Zielcera ŭ dziacinstvie. Tady ž byŭ zabłakavany sajt kp.by i spynienaja dziejnaść biełaruskaj redakcyi. 

Andreja Zielcera pachavali na Lasnych mohiłkach u minskim mikrarajonie Šabany. Cieła Andreja pryvieźli na mohiłki prosta z morha, bo ŭsim rytualnym załam zahadali admovicca pravodzić cyrymoniju raźvitańnia.

Pradprymalnik i prapaviednik-pratestant Sierhij Mieljaniec u svaim intervju «Našaj Nivie» siarod inšaha raskazaŭ, jak adbyvałasia toje pachavańnie. Pavodle jaho słoŭ, «tam było samaje sumnaje pachavańnie, jakoje ja bačyŭ u žyćci».

Dźmitryja Fiedasiuka Alaksandr Łukašenka paśmiarotna ŭznaharodziŭ ordenam «Za asabistuju mužnaść». Na jaho mahile pakłali mulaž mietaličnaha šlema. Ci Fiedasiuk jašče niejak udzielničaŭ u padaŭleńni pratestaŭ suprać falsifikacyi vybaraŭ i ŭ represijach paśla 2020-ha, nieviadoma.

Pavialičyć

Pra Fiedasiuka ciapier prapahanda nie asabliva havoryć. Mahčyma, paličyli, što sam napamin pra toj vypadak nahadvaje, što niechta vybraŭ supraciŭ sa zbrojaj u rukach.

Rada Biełaruskaj Narodnaj Respubliki ŭznaharodziła Andreja Zielcera Miedalom Ordena «Pahoni», naroŭni z hrupaj palityčnych viaźniaŭ i biełaruskich bajcoŭ.

Maryi Uśpienskaj, žoncy Andreja Zielcera, prysudzili prymusovaje lačeńnie. Jana była vyzvalenaja ad kryminalnaj adkaznaści «za ŭčynienyja joju ŭ stanie nieprytomnaści hramadska niebiaśpiečnyja dziejańni». 

U pary zastaŭsia 10-hadovy syn. Padčas trahiedyi chłopčyk znachodziŭsia ŭ škole, jaho zabrała babula.

Žančyna, jakaja siadzieła ŭ adnoj kamiery z Uśpienskaj na Akreścina, paźniej raskazała žurnalistam: «…pryvieźli jaje na Akreścina biez abutku. Bo jašče doma, kali pačali piłavać dźviery, jana była ŭ chałacie. Śpiecham nadzieła navierch štany i švedar, ale zastałasia biez trusoŭ. Tolki na Akreścina adna z sukamiernic pazyčyła joj škarpetki i trusy. Spała Maša pad batarejaj, ale tuju batareju nie ŭklučali, — raskazała byłaja palitźniavolenaja. — Kab nie źmierznuć, jany nalivali haračuju vadu ŭ viadro i zasoŭvali pa adnoj nazie kožnaja. Paryli nohi, nadziavali škarpetki i ŭtraich, skruciŭšysia abarankam, spali», — raskazała jaje sukamiernica.

Jaje sukamiernicy raskazvali, što Maryja ciažka pieražyvała toje, što adbyłosia ŭ jaje na vačach.

Na pratesty 2020 hoda łukašysty adkazali masavymi represijami. Praz zatrymańni prajšli dziasiatki tysiač ludziej, sotni tysiač byli vymušanyja pakinuć Biełaruś. Na siońnia pravaabaroncy naličvajuć kala 1400 palitviaźniaŭ. 

• 1
• 0
• 0
• 0
• 0
• 7
• 1
• 2