Były ziać Šajhu prakaciŭsia ŭ płackarcie pa Biełarusi i źniaŭ rolik
«Heta čysty, ale samy drenny płackart».
Rasijski papularny błohier Alaksiej Stalaroŭ (i były ziać eks-ministra abarony Rasii Siarhieja Šajhu) prakaciŭsia na ciahniku ŭ Biełarusi i apublikavaŭ videa ab svaim padarožžy (na jaho jutub-kanale 4,8 młn padpisčykaŭ). Padarožža adbyłosia 21—22 vieraśnia.
Aŭtar kaža, što razam sa svaimi kampańjonami — dziaŭčynaj Lijanaj i papularnym rasijskim spartyŭnym błohieram Tatwole (Damir Sadykaŭ) — pieršy raz u Biełarusi.
Pierad pajezdkaj maładyja ludzi abmianiali hrošy, zaŭvažyŭšy, što biełaruskija kupiury «trochi padobnyja da jeŭra», i nabyli pa rekamiendacyjach svaich znajomych błohieraŭ ź Biełarusi biełaruskija pradukty. Siarod ich — vafielki «Vićba» i syrok «Panda» (praŭda, jak paźniej vyśvietliłasia, zamiest jaho ŭziali «Pluš»). Akramia hetaha jany nabyli čypsy Lays sa smakam dranikaŭ, napoj «Bieła-Koła», a ŭ kulinaryi supiermarkieta «Santa» — faršyravanyja draniki.
Na kasie kramy błohier padzialiŭsia: «My pieršy raz u Biełarusi i ŭ dzikim zachapleńni ad ludziej, ad taho, jak tut kruta, čysta i cudoŭna».
Pa słovach Stalarova, jon nabyŭ bilety da Viciebska ŭ samy tanny płackartny vahon ciahnika №606 «Brest-Połack» praz Pinsk, Łuniniec, Kalinkavičy. Jaho siabram uvohule daviałosia pieršy raz jechać u płackartnym vahonie.
Brescki vakzał błohier nazvaŭ atmaśfiernym. Jaho spadarožniki źviarnuli ŭvahu na istotnaje adroźnieńnie pamiž vakzałami Biełarusi i Rasii — najaŭnaść u nas na vakzale i pryvakzalnaj terytoryi kramaŭ. U Rasii takoha niama.
Havoračy pra sam ciahnik, Stalaroŭ źviartaje ŭvahu na sini koler (u Rasii vahony zialonyja ci šera-čyrvonyja). Druhi momant — «vidać, što heta saviecki ciahnik». Stalaroŭ narakaje, što ŭ vahonie navat niama razietak. A miescy ich byli kala samaj prybiralni.
«Pach, jak u babulinaha doma, babulinaj šafy», — dzielacca maładyja ludzi. «Heta samy drenny płackart. Jon čysty, ale samy stary.(…) Heta samy stary saviecki ciahnik, ale nadzvyčajna dahledžany. Heta jak da babuli ty pryjšoŭ u hości. U jaje idealnaja čyścinia. Ale dom nadzvyčaj stary», — dadaje Stalaroŭ.
Błohieru Tatwole davieryli zrabić ahlad prybiralni pa troch kryteryjach — čyścinia, pach, kamfort. Pa apošnim paramietry jana atrymała try bały ź piaci. Čyścinioju jon zastaŭsia niezadavoleny.
Nie abyšłosia i biez sustrečy ź milicyjaj, jakaja na stancyi ŭ Łunincy paprasiła ich nie zdymać ciahnik. «U nas tut pamiežnaja zona. Padyšli pravadnicy i paskardzilisia, što vy zdymajecie kalosnyja pary. Nielha zdymać», — skazali błohieram milicyjanty.
U kancy svajoj pajezdki Stalaroŭ źviarnuŭ uvahu na spaźnieńnie ciahnika. Zamiest 7.37, jak praduhledžana ŭ raskładzie, u Viciebsk jany prybyli ŭ 7.44.
***
Alaksiej Stalaroŭ u minułym byŭ u adnosinach z dačkoj byłoha ministra abarony Rasii Siarhieja Šajhu Ksienijaj. U pary ŭ 2021 hodzie naradziłasia dačka Miłana.
Kamientary