Zabojstva Nasrały: detali apieracyi i reakcyja śvietu

Izrailskija ŭłady sačyli za miescaznachodžańniem lidara «Chiezbały» Chasana Nasrały ciaham niekalkich miesiacaŭ, piša The New York Times.

U Izraili ličyli, što ŭ najbližejšy čas jon moh niekudy schavacca, tamu vyrašyli nanieści ŭdar u piatnicu ŭviečary pa štab-kvatery ŭ Biejrucie, dzie sabralisia kamandziry «Chiezbały», raskazali try čynoŭniki ŭ izrailskim Minabarony.

Na ich dumku, pasadu hienieralnaha sakratara «Chiezbały» paśla zabojstva Nasrały moža zaniać kiraŭnik vykanaŭčaj rady livanskaj partyi i jaho stryječny brat Chašam Safijedzin, jaki nie prysutničaŭ na schodzie ŭ piatnicu.

Pavodle źviestak NYT, apieracyju płanavali z pačatku tydnia, kali izrailskaje kiraŭnictva, niezadoŭha da adjezdu premjer-ministra Izraila Bińjamina Nietańjachu ŭ Ńju-Jork, abmiarkoŭvała z pradstaŭnikami ZŠA mahčymaść spynieńnia ahniu ŭ Livanie.

Hetuju infarmacyju paćvierdzili i dvoje surazmoŭcaŭ Axios, udakładniŭšy, što ŭpieršyniu płan abmiarkoŭvaŭsia 25 vieraśnia. Pa słovach adnaho ź ich, apieracyja matyvavanaja tym, što «Chiezbała» pad kiraŭnictvam Nasrały admaŭlałasia «dystancyjavacca» ad CHAMASa, praciahnuŭšy nanosić udary pa paŭnočnaj terytoryi Izraila.

Jak paviedamlaje Telegraph sa spasyłkaj na izrailskaha čynoŭnika, pajezdka Nietańjachu ŭ Ńju-Jork stała častkaj «adciahvajučaha manieŭru»: kiraŭnictva «Chiezbały» pavinna było pavieryć, što Izrail nie raspačnie nijakich radykalnych dziejańniaŭ pry adsutnaści svajho lidara, tamu Nasrała znachodzicca ŭ biaśpiecy.

U momant udaru pa štabu ŭ Biejrucie lidar hrupoŭki, jak miarkujecca, słuchaŭ pramovu izrailskaha premjer-ministra na siesii Hienasamblei AAN, dadała krynica. Nietańjachu ŭchvaliŭ ŭdar prosta pierad svaim vystupam.

U Iranie paśla śmierci Chasana Nasrały abjavili ažno piacidzionnuju žałobu. Lidary hetaj dziaržavy, jakaja ŭsimi sposabami padtrymlivaje «Chiezbału», vykazali škadavańnie z nahody jahonaj hibieli. Viarchoŭny lidar Irana, 85-hadovy Ali Chamieniei, vykazaŭsia nadzvyčaj emacyjna:

«Zabojstvy biezabaronnych ludziej u Livanie jašče raz pakazali ŭsim lutaść šalonaha sijanisckaha sabaki, dakazali niedalnabačnaść i hłupstva palityki lidaraŭ uzurpatarskaha režymu. Terarystyčnaja banda nie zmahła zrazumieć, što masavyja zabojstvy nie mohuć paŭpłyvać na tryvałuju strukturu arhanizacyi supracivu i razburyć jaje».

 U toj ža čas prezident Irana Masud Piezieškijan ličyć, što pryniaćcie pakutnickaj śmierci było daŭniaj maraj Sajeda Chasana Nasrały, i što jon «honar musulman i simvał supracivu». Zahad ža na jahonaje zabojstva, maŭlaŭ, byŭ dadzieny ZŠA.

Prezident ZŠA Džo Bajden, adnak, padkreślivaje, što 

«ZŠA nie byli paviedamlenyja i nie ŭdzielničali ŭ dziejańniach izrailskich Uzbrojenych sił».

Ale ŭ toj ža čas jon adznačyŭ:

«Hibiel Nasrały ŭ vyniku izrailskaha avijaŭdaru — heta akt pravasudździa dla jaho šmatlikich achviar, siarod jakich tysiačy amierykancaŭ, izrailcian i livancaŭ». 

Z asudžeńniem dziejańniaŭ Izraila vystupiŭ prezident Turcyi Redžep Taip Erdahan. Jon skazaŭ, što nibyta «Livan i livanski narod stali apošniaj metaj palityki hienacydu, akupacyi i ŭvarvańnia, jakaja pravodzicca Izrailem z 7 kastryčnika».

Prahnazavana asudziła Izrail i MZS Rasii:

«Rašuča asudžajem ździejśnienaje Izrailem čarhovaje palityčnaje zabojstva. Hetaja siłavaja akcyja bahataja jašče vialikimi dramatyčnymi nastupstvami dla Livana i ŭsiaho Blizkaha Ŭschodu. Izrailski bok nie moh nie ŭśviedamlać takuju niebiaśpieku, ale pajšoŭ na padobny krok — na zabojstva livanskich hramadzian, što praktyčna niepaźbiežna spravakuje novy ŭsplosk hvałtu. Takim čynam, na jaje kładziecca ŭsia paŭnata adkaznaści za nastupnuju eskałacyju».

• 2
• 1
• 3
• 0
• 0
• 0
• 0
• 1