«Pieryfieryjnyja pryłady» (The Peripheral) — fantastyčny sieryjał ad stvaralnikaŭ «Śvietu Dzikaha Zachadu»

Navukovaja fantastyka moža zabłytać šmat kaho, ale sieryjał, pra jaki siońnia raskažam, pačynajecca davoli zrazumieła. I heta niahledziačy na toje, što jaho stvaralniki — Liza Džoj i Džonatan Nołan, aŭtary inšaha televizijnaha šedeŭra «Śviet Dzikaha Zachadu», piša Guardian.

Asnoŭnaja častka siužeta pačynajecca ŭ 2032 hodzie ŭ amierykanskich horach Błakitnaha chrybta, dzie Flin i jaje brat Biortan dahladajuć chvoruju maci. Flin pracuje ŭ cechu 3D-druku. Ich śviet padobny da našaha, ale krychu źmienieny: naprykład, Ministerstva ŭnutranaj biaśpieki stavicca z padazreńniem da luboha źniaćcia najaŭnych u bankamacie.

Biortan — prafiesijanalny hulec u hulni ŭ virtualnaj realnaści. Mienš umiełyja hiejmiery mohuć naniać jaho, kab jon prachodziŭ hulni zamiest ich, i časam jaho padmianiaje Flin. Jana hulaje lepš za brata, ale jaje nie tak achvotna najmajuć, jak mužčynu (niekatoryja rečy nikoli nie mianiajucca), i Flin uvohule addaje pieravahu žyćciu ŭ realnym śviecie.

Raptam źjaŭlajecca mahčymaść zarabić vialikija hrošy, i dla hetaha treba ŭsiaho tolki prateściravać novuju i zvyšdaskanałuju hulniu. Flin biarecca za taki šans i nieŭzabavie atrymlivaje asałodu ad zachaplalnaj pryhody ŭ styli Džejmsa Bonda, ale chutka pryhoda pačynaje jaje pužać. Toje, što pačałosia jak katańnie na matacykle pa futurystyčnym Łondanie i flirt z pryhožymi žančynami, pieratvarajecca ŭ śviet, dzie vydalajuć voka biez anestezii i zmahajucca hukavaj zbrojaj, i hety śviet pačynaje zdavacca zanadta realnym.

Usio sapraŭdy realna, i futurystyčnaja stalica — nasamreč Łondan u 2099 hodzie. Tam žyvie čałaviek, jakoha kličuć Uiłf Nietertan. Jaho naviedvaje dziaŭčyna, jakaja vyratavała jamu žyćcio ŭ minułym, i ciapier jana pryjšła raźvitacca z Uiłfam pierad tym, jak adpravicca ratavać śviet — nie naš, jašče adzin.

Słovami «pieryfieryjnyja pryłady» nazyvajuć cieły kibarhaŭ, da jakich karystalniki simulataraŭ mohuć padklučacca z roznych miescaŭ i navat roznych časoŭ. Mienavita tut my pavinny vas pakinuć sam-nasam z hetaj historyjaj, kab dać mahčymaść vyrašyć, padabajecca jana vam ci nie.

Heta virtuoznaja ekranizacyja Hibsana, jakaja zachoŭvaje i intryhu, ŭnutranuju łohiku tvora, jakoj by składanaj jana ni była. Tyja, chto zdoleje zrazumieć «Pieryfieryjnyja nałady» na bolš hłybokim uzroŭni, dakładna buduć vielmi zadavolenyja hetym sieryjałam. Astatnija ž mohuć prosta naciešycca raźvićciom siužeta.

Rejtynhi na vialikich suśvietnych resursach:

IMDB — 8,2/10

Rotten Tomatoes — 74% (krytyki), 88% (hledačy)

Čytajcie taksama:

Samy niedaacenieny sieryjał hoda. Čamu varta pahladzieć «Raździaleńnie», kali vy jaho prapuścili

Što pahladzieć. «Alaska Dejli» (Alaska Daily) — tajamničaja historyja z łaŭreatkaj «Oskara»

Pra skandynaŭskija filmy, połackija syrki, dom i paśladoŭnaść. Hutarka z dyrektarkaj najbujniejšaha biełaruskaha niezaležnaha kinafiestyvalu

• 4
• 0
• 0
• 1
• 1
• 1
• 2
• 0