Što kiraŭnik CRU viedaje pra Pucina? Šmat — choć by toje, što jon nie ŭmieje prajhravać

Bierns dvojčy pracavaŭ u Rasii, u tym liku pasłom z 2005 pa 2008 hady. U amierykanskim uradzie mała chto mieŭ taki blizki dośvied pracy z Pucinym.

Pucin — uvasableńnie «svojeasablivaha spałučeńnia jakaściaŭ»: «jon samanadziejny, złosny, viečna pakryŭdžany i niaŭpeŭnieny ŭ sabie», — pisaŭ Bierns. Kiraŭnik Kramla — «apostał pomsty», śćviardžaje Bierns.

Bierns prahnazuje, što zamiest taho, kab spynić uvarvańnie va Ukrainu, Pucin, chutčej za ŭsio, padvoić svaje namahańni.

— Ja dumaju, jon znachodzicca ŭ takim stanie śviadomaści: nie vieryć, što moža dazvolić sabie prajhrać, — skazaŭ Bierns na sieminary, arhanizavanym «Financial Times».

Čałaviek dla śpiecyjalnych zadač

Usio heta robić Biernsa unikalnaj fihuraj siarod hałoŭnych daradcaŭ prezidenta Džo Bajdena, jakomu daručany samyja adčuvalnyja zadačy. Mienavita Bernsa Bajden tajemna adpraviŭ u Maskvu minułaj vosieńniu, kab papiaredzić Pucina pra nastupstvy napadu na Ukrainu, i mienavita da Bernsa časta źviartajucca vašynhtonskija elity, sprabujučy pradkazać, što Pucin zrobić dalej.

Najbližejšyja miesiacy na fonie pytańniaŭ ab tym, ci byli vyviedvalnyja danyja ZŠA ab Rasii i Ukrainie dastatkova dakładnymi — i ci pavinien Vašynhton chutčej adpraŭlać ciažkuju zbroju ŭva Ukrainu — Bierns, imavierna, daść šmat adkazaŭ.

— Bierns vielmi stały, vielmi daśviedčany, vielmi strymany i vielmi ŭdumlivy ŭ tym, što jon kaža, — skazaŭ Uiljam Tejłar, były ambasadar ZŠA Va Ukrainie, jaki daŭno znajomy z dyrektaram CRU. — Pa ŭsich hetych pryčynach, a taksama z-za jaho dośviedu z Pucinym, my jaho słuchajem.

Bierns, viadoma, dobry pucinołah, ale navat jon nie pradbačyŭ, nakolki rasiejski lidar sarvie zamiežnapalityčnyja płany administracyi Bajdena.

Na słuchańniach u Sienacie ŭ lutym minułaha hoda Bierns skazaŭ, što ŭ jakaści dyrektara CRU ŭ jaho budzie «čatyry klučavyja i uzajemaźviazanyja pryjarytety». Jany pavinny byli być: «Kitaj, technałohii, ludzi i partniorstva».

Pavialičyć

Rasii ŭ śpisie nie było

Rasija nie patrapiła ŭ hety śpis pryjarytetaŭ. Pa praŭdzie kažučy, mała chto ŭ Vašynhtonie ŭ toj čas turbavaŭsia pra heta. Stalica ZŠA była značna bolš apantanaja Kitajem i ich ambicyjami.

Heta źmianiłasia ŭ apošnija miesiacy 2021 hoda, kali Pucin pačaŭ źbirać vojski ŭzdoŭž miažy Rasii z Ukrainaj. Bajden adpraviŭ Biernsa ŭ Maskvu, dzie jon sustreŭsia z pradstaŭnikami Kramla i pahavaryŭ z Pucinym praz telefon, pieradaŭšy aściarohi ZŠA z nahody zboru vojskaŭ i papiaredziŭšy, što Maskva zapłacić vysokuju canu ŭ vypadku ŭvarvańnia.

Z časam čynoŭniki administracyi Bajdena navažylisia vybaračna rassakrecić i apublikavać niekatoryja źviestki amierykanskaj vyviedki ab patencyjnych vajskovych płanach Kramla. Heta byŭ niezvyčajny manieŭr, jaki pa słovach Biernsa maje vyrašalnaje značeńnie dla taho, kab spynić dezinfarmacyju Pucina, jakoj jon apraŭdvaje ŭvarvańnie va Ukrainu.

Bierns admoviŭsia davać intervju dla hetaha artykuła, ale z tych časoŭ, jak jon pačaŭ kiravać CRU, jon vykazvaŭsia na roznych hramadskich forumach.

Vystupajučy na fiestyvali Weekend Financial Times na pačatku hetaha miesiaca, Bierns skazaŭ, što, kali administracyja publična papiaredziła, što Pucin rychtujecca da ŭvarvańnia, jon i jaho kalehi praviali «šmat biassonnych načej, spadziejučysia, što my pamylajemsia». Ale Pucin vyrašyŭ ich rasčaravać.

Pavialičyć

Kitaj praciahvaje być №1

Kali Bierns i jaho ahienctva ŭsio jašče sprabujuć pierachitryć Kreml, dyrektar CRU pa-raniejšamu ličyć, što mienavita Kitaj ujaŭlaje najbolšuju doŭhaterminovuju hieapalityčnuju pahrozu dla Złučanych Štataŭ. Azijacki hihant, jaki ŭznačalvaje Si Czińpin, «u šmat jakich aśpiektach jość samym surjoznym vyprabavańniem, ź jakim kali-niebudź sutykałasia CRU», — skazaŭ Bierns aŭdytoryi va ŭniviersitecie Georgia Tech u krasaviku.

Prahres ŭ halinie štučnaha intelektu ŭ krainie, kiravanaj kamunistami, ekanamičnyja suviazi sa Złučanymi Štatami, i dziejańni ŭ kibierprastory, jakija, miž inšym, pahražajuć biaśpiecy amierykanskich dziaržsłužboŭcaŭ — tolki niekatoryja sa šmatlikich pryčynaŭ, pa jakich CRU sprabuje supraćstajać Piekinu.

Heta vielmi składana. Zhodna z paviedamleńniami CRU, Piekin pa čarzie identyfikuje mnohich tajemnych supracoŭnikaŭ, papiarednie pakaraŭšy śmierciu krynicy CRU u Kitai.

Kab CRU ŭ doŭhaterminovaj pierśpiektyvie zasiarodziłasia na Kitai, Bierns stvaryŭ China Mission Center, adziny taki centr u ahienctvie, sfakusavany na adnoj krainie. Ahienctva taksama pavialičvaje svoj biudžet na dziejnaść, źviazanuju z Kitajem, i spadziajecca padvoić kolkaść supracoŭnikaŭ, jakija buduć razmaŭlać na kitajskaj movie.

Bierns taksama stvaryŭ Centr transnacyjanalnych i technałahičnych misijaŭ, sfakusavany na novych technałohijach i prablemach, takich jak źmianieńnie klimatu. Bierns pryznačyŭ pieršaha ŭ ahienctvie «hałoŭnaha śpiecyjalista pa technałohijach» Nanda Mułčandani, jaki maje dośvied pracy ŭ pryvatnym i dziaržaŭnym siektarach.

Pavialičyć

Havanski sindrom

U pačatku svajho terminu Bierns daručyŭ vyłučyć bolš srodkaŭ dla razumieńnia dziŭnych chvarobaŭ, časta zvanych «Havanskim sindromam», jakija zakranuli mnohich aficeraŭ CRU, amierykanskich dypłamataŭ i inšych uradavych čynoŭnikaŭ. Jość aściarohi, što za hetymi incydentami staić Rasija. Adnak da hetaha času amierykanskija čynoŭniki zajaŭlajuć, što nie znajšli nijakich dokazaŭ datyčnaści Maskvy.

Tym nie mienš, Bierns zasiarodziŭsia na hetaj temie, dziakujučy čamu zavajavaŭ simpatyju mnohich ludziej sa śvietu vyviedki.

Rušyć jak štorm

Amal niemahčyma znajści ŭ Vašynhtonie kahości, chto krytykavaŭ by Biernsa, navat u pryvatnym paradku.

— Jon čałaviek, jaki kaža: «Tak, heta sapraŭdy składana. I sapraŭdy ciažka nie mieć idealnych adkazaŭ», — skazaŭ adzin z byłych vysokapastaŭlenych čynoŭnikaŭ administracyi Bajdena.

Adnym z najhoršych momantaŭ prezidenctva Bajdena staŭ zachop talibami ŭłady ŭ Afhanistanie ŭ žniŭni minułaha hoda, što pryviało da masavych trahiedyjaŭ padčas evakuacyi z aeraporta Kabuła.

Krytyki zadavalisia pytańniem, ci zanadta pavolna amierykanskaja vyviedka zrazumieła, što Kabuł zachopiać.

U hetyja burlivyja tydni Bierns spakojna adpraviŭsia ŭ Kabuł, kab pahavaryć ź lidarami talibaŭ paśla taho, jak jany zachapili afhanskuju stalicu, i ludzi, jakija jaho viedajuć, kažuć, što jon addana abaraniaŭ afhanskich partnioraŭ CRU.

— Jość pryčyna, pa jakoj vy dasyłajecie Uiła Biernsa, kab pahutaryć z talibami, kali ŭsio ŭ Afhanistanie razburajecca, — skazaŭ były čynoŭnik Administracyi. — Heta čałaviek, jaki moža sieści za stoł ź niekatorymi z samych žorstkich i despatyčnych ludziej u śviecie i znajści sposab zrabić heta ad imia amierykanskaha naroda ŭ situacyi, kali inšyja b spasavali ci nie zdoleli.

Bierns taksama šmat pra što škaduje.

U svaich miemuarach, pad nazvaj «The Back Channel» Bierns piša, što vielmi škaduje, što nie zrabiŭ bolš, kab pajści suprać rašeńnia tahačasnaha prezidenta Džordža Buša pra ŭvarvańnie ŭ Irak i źviaržeńnie Sadama Chusejna, choć jak dypłamat šmat razoŭ sprabavaŭ źviarnuć uvahu na niebiaśpieku.

Choć Bierns piša, što jaho tahačasnyja dziejańni mieli šmat składanych matyvaŭ, jon pryznaje ŭ knizie, što adnym ź ich było «pakutlivaje pačućcio, što Sadam zasłuhoŭvaŭ źviaržeńnia».

Pavialičyć

Padziaki za Ukrainu

Administracyja Bajdena i, u pryvatnaści, CRU byli vysoka acenienyja za dakładnyja prahnozy adnosna krokaŭ Pucina ŭva Ukrainie, a taksama za rašeńnie apublikavać niekatoruju infarmacyju, jakaja była viadomaja Złučanym Štatam. Adnak zastajecca niezrazumiełym, čamu Złučanyja Štaty nie pradbačyli, prynamsi, publična pra heta nie kazali, jak drenna budzie vajavać rasijskaja armija i jak doŭha ŭkrainskaja armija zmoža ŭtrymacca.

Nasamreč u amierykanskim uradzie panavała ahulnaje pierakanańnie, što rasijskija vojski chutka razhramiać ŭkrainskija siły. Niekatoryja kamientatary źniešniaj palityki zadavalisia pytańniem: ci źjaŭlajecca heta pryčynaj taho, što Złučanyja Štaty raniej nie nakiroŭvali vialikuju vajennuju dapamohu Ukrainie?

Paśla kryzisaŭ va Ukrainie i Afhanistanie amierykanskija zakanadaŭcy paprasili adkazać, jak vyviedvalnyja słužby ZŠA aceńvajuć zamiežnyja ŭzbrojenyja siły. CRU admoviłasia kamientavać hetaje pytańnie.

Baćkoŭskija parady

Bierns prapracavaŭ 33 hady na zamiežnaj słužbie. U 2014 hodzie pakinuŭ pasadu namieśnika dziaržsakratara. A paśla zajmaŭ pasadu prezidenta Fonda Karniehi.

Padčas prezidenctva Donalda Trampa Bierns zaciata publična vystupaŭ suprać imknieńnia Trampa pamienšyć dypłamatyčnuju słužbu ZŠA za košt skaračeńnia biudžetu, palityčnaj adpłaty i inšych zachadaŭ. Bierns ličyŭ, što heta jaje źniščyć.

Pavaha Biernsa da dziaržaŭnaj słužby pieradałasia jamu ŭ spadčynu ad baćki, hienierał-majora i dyrektara Ahienctva pa kantroli nad uzbrajeńniami i razzbrajeńniem ZŠA. U svaich miemuarach Bierns uzhadvaje, jak jaho baćka adnojčy napisaŭ jamu: «ničoha nie daje stolki honaru, jak słužyć z honaram svajoj krainie».

Ciapier Bierns žartuje, što jaho žonku i dačok śmiašyć toje, što jon pachodzić sa «śvietu Džejmsa Bonda, Džejsana Borna i Džeka Rajana», ale jeździć tolki z dazvolenaj chutkaściu i ledź spraŭlajecca z kantroleram dla hulniavoj prystaŭki.

Bierns, jaki skončyŭ Univiersitety Ła-Sal i Oksfard, maje bolš dypłamatyčnaha dośviedu, čym ciapierašni dziaržsakratar Entani Blinkien. Ale jany abodva majuć adnolkavy tempieramient i dobra ładziać, kažuć ludzi, jakija ich viedajuć, admaŭlajučy čutki pra toje, što Bierns «cieniavy dziaržaŭny sakratar».

Pavialičyć

Pad hryfam «sakretna»

Jak śćviardžajuć amierykanskija aficyjnyja asoby, časta mienavita Bierns, a nie Blinkien, słužyŭ pasłańnikam prezidenta. Pajezdki dyrektara CRU, jak praviła, zasakrečanyja, u toj čas jak Blinkien amal zaŭsiody biare z saboj reparcioraŭ. Bierns ździejśniŭ 10 ŭnutranych i 16 zamiežnych pajezdak. Unutranyja vizity časta tyčylisia technałohij, naprykład, u Kalifornii.

U niekatorych vypadkach, jak, naprykład, u Rasii, Biernsa pasłali zbolšaha dla taho, kab dać zrazumieć, što ŭ ZŠA jość dadzienyja vyviedki, jakaja paćviardžajuć ich zaściarohi. Jość i takija asoby, jak lidar talibaŭ, jakich bolšaść administracyj ličyć za lepšaje nie ŭhanaroŭvać aficyjnymi vizitami.

Tramp adpraviŭ tahačasnaha dyrektara CRU Majka Pampieja ŭ Paŭnočnuju Kareju na sustreču z dyktataram Kim Čen Ynam, što prakłała šlach da histaryčnaha samitu Tramp-Kim. Ale ŭ jakaści dziaržsakratara Pampiea taksama sustrakaŭsia ź lidarami talibaŭ.

Byłyja supracoŭniki vyviedki kažuć, što jany mała čujuć pra Biernsa ad tych, chto znachodzicca ŭ CRU, što jany ličać prykmietaj taho, što jaho dobra aceńvajuć. Maralny duch, padobna, raście ŭ paraŭnańni z hadami praŭleńnia Trampa, jaki časta vykazvaŭ pahardu da vyviedvalnaj supolnaści, jakaja śćviardžała, što Rasieja ŭmiašałasia ŭ vybary, vyjhranyja im u 2016 hodzie.

Bierns «niešmatsłoŭny i apalityčny», a taksama ciesna źviazany ź inšymi supracoŭnikami Bajdena, skazaŭ Džon Sifier, były supracoŭnik CRU, jaki pracavaŭ u Rasii.

Heta važna dla CRU. Ahienctvu dapamahaje najaŭnaść dyrektara, jaki maje naładžanyja kantakty ź Biełym domam i inšymi členami kabinieta, dadaŭ Sifier.

Pavialičyć

Pahłyblenaja pucinałohija

Paśla vizitu ŭ Kreml minułaj vosieńniu Bierns viarnuŭsia ŭ Vašynhton bieź iluzij i ź niadobrymi navinami dla Bajdena i astatnich čalcoŭ administracyi.

— Jon vielmi realistyčna hladzieŭ na toje, što moža adbycca, i ŭ tym, što da hetaha treba rychtavacca, — skazaŭ pra Biernsa były vysokapastaŭleny čynoŭnik Administracyi.

Bierns paźniej patłumačyŭ, što padčas razmovy jon zrazumieŭ, što choć Pucin jašče nie pryniaŭ niezvarotnaje rašeńnie ŭvarvacca va Ukrainu, ale, padobna, byŭ hatovy heta zrabić.

— Za hetyja hady ja navučyŭsia nikoli nie niedaaceńvać niepachisnuju rašučaść Pucina, asabliva ŭ pytańni Ukrainy, — skazaŭ Bierns.

Pucin, jak adznačyŭ Bierns, daŭno ličyć, što Ukraina nie źjaŭlajecca sapraŭdnaj dziaržavaj, a kali i jość, to pavinna być padparadkavanaja Rasiei.

Praź niekalki tydniaŭ, kali ŭkrainskim vojskam udałosia spynić i adkinuć ruskija vojski, Bierns byŭ aściarožny adnosna budučyni.

Jon skazaŭ čytačam Financial Times, što paraza — heta nie toje, z čym Pucin lohka źmirycca.

— Jon tak šmat pastaviŭ na rašeńnie ab uvarvańni, što, mnie zdajecca, jon pierakanany, što padvojnyja namahańni dazvolać jamu pierałamać situacyju, — skazaŭ Bierns.

• 40
• 0
• 1
• 6
• 2
• 0
• 1
• 0