Ekanomija składaje tysiačy dalaraŭ. Kupla i pryhon aŭto ź Jeŭropy i ZŠA — što varta viedać
Apošnim časam u Biełarusi značna vyraśli ceny na novyja aŭtamabili, a kolkaść prapanavanych madelaŭ skaraciłasia. Uličvajučy situacyju, jakaja skłałasia, biełaruskija aŭtamabilisty pačali ŭsio bolš cikavicca pryhonam patrymanych aŭto ź Jeŭropy i ZŠA. «Naša Niva» padrychtavała hajd pra toje, jak kupić aŭto z-za miažy i nie narabić pamyłak.
Dyskont ad biełaruskaj mytni
Havoračy pra pryhon aŭto ź Jeŭropy i ZŠA, treba pačynać z taho, što ŭ krasaviku 2019 hoda ŭ Biełarusi źjaviŭsia ŭkaz №140, jaki dazvalaje niekatorym katehoryjam hramadzian uvozić aŭtamabili i inšuju techniku z apłataj 50% pošliny.
Razmytnivać aŭtamabili z 50% dyskontam majuć prava:
— šmatdzietnyja;
— invalidy I i II hrupy;
— baćki/apiekuny dziciaci-invalida va ŭzroście da 18 hadoŭ.
Važna adznačyć, što ŭ vypadku sa šmatdzietnymi siemjami pravam na ilhotu vałodajuć aboje baćkoŭ.
Ahułam ludziej, jakija majuć prava na taki dyskont, u Biełarusi kala paŭmiljona, ale, zabiahajučy napierad, skažam, što bolš za 90% śviežapryhnanych u Biełaruś aŭtamabilaŭ razmytnivajecca mienavita pa hetaj schiemie.
Aŭtamabil, razmytnieny pa ilhotnym taryfie, nie maje nijakich abmiežavańniaŭ pa adčužeńni.
Najaŭnaść takoha kštałtu dyskontu ad biełaruskaj mytni pryviała da taho, što na biełaruskich darohach pačali čaściej sustrakacca raznastajnyja madeli aŭtamabilaŭ, jakija navat pry ŭsim žadańni niemahčyma było nabyć novymi ŭ Biełarusi. Bo praz vysokija zaharadžalnyja pošliny i inšyja ciažkapieraadolnyja farmalnaści biełaruskija dylery ŭ svajoj bolšaści byli vymušanyja handlavać tolki tymi aŭtamabilami, jakija vyrablajucca na terytoryi krain Mytnaha sajuza.
Na jakija aŭto varta źviartać uvahu
U Biełaruś vyhadniej za ŭsio pryhaniać aŭtamabili va ŭzroście ad 3 da 5 hadoŭ.
Tańniej za ŭsio razmytnivać aŭto z ruchavikom abjemam da 1,5 litra. Naprykład, za 4-hadovy aŭtamabil z matoram abjomam 1400 sm³ daviadziecca zapłacić pošlinu ŭ 2380 jeŭra, a kali jość ilhota pa ukazie №140, to 1190 jeŭra.
Da hetaj sumy treba dadać utylizacyjny zbor (dla aŭto va ŭzrostie ad 3 da 7 hod — 816,7 rubla), zbor za mytnaje afarmleńnie (120 rubloŭ) i za pasłuhi dekłaranta (jašče da 100 rubloŭ). Takim čynam, ahulnaja suma, jakuju daviadziecca vydatkavać pry ŭvozie mašyny ŭ krainu, składaje krychu bolš za 1700 dalaraŭ pry ŭmovie lhotnaha razmytnieńnia, ci kala 3000 dalaraŭ, kali razmytnivać pa poŭnym taryfie.
Pry pavialičeńni abjemu ruchavika roźnica pamiž razmytnieńniem pa zvyčajnym taryfie i ilhotnym tolki pavialičvajecca. Razmytnieńnie 3-5 hadovaha aŭto z dvuchlitrovym ruchavikom abydziecca ŭžo ŭ 5400 jeŭra pa poŭnym taryfie i 2700 jeŭra pa ilhotnym. Na ŭtylizacyjny zbor i inšyja vydatki lhoty nie raspaŭsiudžvajucca.
Zhadany ŭkaz adčyniaje dźviery i dla aŭto, jakim užo spoŭniłasia 5 hadoŭ. Ale tut treba być pilnymi, bo mytnyja taryfy dla takich aŭto bolšyja. Najmienšaja roźnica ŭ staŭkach budzie dla aŭtamabilaŭ z abjomam ruchavika ad 1501 da 1800 sm³. Naprykład, ilhotnaje ryzmytnieńnie 3-hadovaha aŭto z matoram 1,8 litra abydziecca ŭ 2250 jeŭra, u toj čas jak 6-hadovaha — u 3150 jeŭra.
Padrabiaźniej aznajomicca sa staŭkami mytnych pošlin možna tut.
Z ulikam davoli istotnaj roźnicy ŭ staŭkach mytnych pošlin dla lhotnikaŭ i ŭsich astatnich, amal uvieś impart mašyn ź Jeŭropy i ZŠA adbyvajecca ź ich udziełam. Zvyčajna tyja, chto nie maje lhot, šukaje takich ludziej siarod svajakoŭ i znajomych. U zaležnaści ad uzroŭniu adnosin, takija «pasłuhi» kaštujuć ad nula da 300-500 dalaraŭ. Adnak kali havorka idzie pra darahija aŭto (ad 20-30 tysiač dalaraŭ) z abjomam ruchavika ad troch litraŭ, to «ŭznaharoda» moža ŭzrastać da 800-1000 dalaraŭ za aŭto.
Elektramabili ŭ Biełarusi na biahučy momant razmytnivajucca pa staŭcy 15% ad mytnaha koštu ci pa 7,5% dla lhotnikaŭ. Adnak žadajučym pryvieźci elektramabil z-za miažy varta być hatovymi da taho, što mytnia budzie vyličvać płaciažy nie ad faktyčnaj cany, a ad cany ŭ svaim katałohu.
Jeŭropa ci ZŠA?
Pierad tymi, chto choča nabyć aŭto z-za miažy, staić vybar: kuplać jaho ŭ Jeŭropie, ci ZŠA. Adnak vyznačycca tut davoli prosta. Sami aŭtamabilnyja rynki Jeŭropy i Amieryki vielmi mocna adroźnivajucca. Šerah marak i madelaŭ, jakija pradstaŭlenyja ŭ Jeŭropie, niedastupnyja ŭ ZŠA — i naadvarot. Bolšaść mašyn, jakija vyhadna kuplać u Jeŭropie, dyzielnyja, a ŭ ZŠA amal usie pracujuć na bienzinie. Aproč hetaha, u Štatach vielmi mała aŭto ŭ kuzavie ŭniviersał.
Inšym važnym faktaram, jaki ŭpłyvaje na vybar krainy, źjaŭlajecca stan aŭtamabila. 99% aŭto sa Štataŭ pryjazdžajuć da nas paśla niejkich zdareńniaŭ, čaściej za ŭsio — paśla DTZ (na druhim miescy buduć zatapleńni). Kuplać cełyja aŭtamabili ŭ ZŠA niavyhadna. Tamu kali vy nie hatovyja da kupli aŭto paśla DTZ, amierykanski kirunak dakładna nie dla vas.
Pry hetym treba razumieć, što pry ŭzvažanym padychodzie, nabyvajučy avaryjnaje aŭto z ZŠA, vy atrymlivajecie mahčymaść sekanomić niekalki tysiač dalaraŭ ad koštu anałahičnaha aŭto ŭ Biełarusi. Na aŭto koštam 10-11 tysiač dalaraŭ ekanomija składaje kala 1500-2000$, na mašynach za 15-20 tysiač dalaraŭ jość mahčymaść aščadzić 3-4 tysiačy (z ulikam usich vydatkaŭ na ramont). Z pavyšeńniem cany roźnica budzie raści.
Inšy važny faktar, jaki hraje nie na karyść kupli aŭto z ZŠA, — termin dastaŭki. Jon składaje 2-4 miesiacy ad momantu kupli mašyny na aŭkcyjonie.
Nie treba bajacca źviartacca da pasrednikaŭ
Ź Jeŭropaj usio značna chutčej. Kali havorka idzie pra nabyćcio mašyn ź liku tych, što vystaŭlenyja na prodaž praź internet, to taki aŭtamabil moža być dastaŭleny vam u termin ad niekalkich dzion da niekalkich tydniaŭ. Kali vy budziecie kuplać aŭtamabil praz aŭkcyjon, to termin u zaležnaści ad krainy znachodžańnia pradaŭca budzie vahacca ad 15 dzion da 1-1,5 miesiaca.
Aŭtamabili ź Jeŭropy čaściej za ŭsio pryhaniajuć cełymi. Ryzyki ŭ paraŭnańni z kuplaj aŭto z ZŠA minimalnyja, tamu całkam łahična, što ekanomija budzie značna mienšaj. U niekatorych vypadkach jaje moža i nie być, ale pry kupli aŭto ŭ ES, samastojna ci z dapamohaj pasrednika, u vas budzie nie tolki bolšy vybar u paraŭnańni z tym, što majecca ŭ Biełarusi, ale i bolšaja ŭpeŭnienaść u aryhinalnaści prabiehu.
Na žal, «amaładžeńnie» aŭtamabila šlacham admotvańnia prabiehu — vielmi papularnaja źjava ŭ Biełarusi. Tamu navat tolki praz heta kupla aŭto ŭ inšych krainach Jeŭropy maje sens.
Kali vy ŭsie ž taki navažylisia na pryhon aŭto z ZŠA, to tut amal biez varyjantaŭ — vam daviadziecca źviartacca pa dapamohu da pasrednikaŭ, jakija zajmajucca kuplaj i arhanizacyjaj dastaŭki techniki sa Štataŭ. Praces hety niaprosty, tamu lepiej zapłacić śpiecyjalistam 600-1200 rubloŭ (u zaležnaści ad firmy i pakieta pasłuh), čym namahacca zrabić usio samastojna.
Pryhnać aŭtamabil ź ES krychu praściej, ale kali ŭ vas niama takoha dośviedu, to lepiej taksama źviarnucca da śpiecyjalistaŭ. Košt pasłuhi prykładna taki samy, jak u vypadku z padboram aŭto z ZŠA.
Zachoŭvajcie ćviarozy rozum
Adzinaje, što pry vybary pasrednikaŭ treba ŭklučać ćviarozy rozum i nie vieryć u nadta sałodkija abiacańni. Usie pasredniki, budzie heta vialikaja firma ci IP, pracujuć prykładna pa adnych i tych ža schiemach, tamu i ceny na aŭto musiać być padobnymi. Kali ŭ troch miescach vam nazvali pryblizny košt pažadanaha vami aŭto ŭ miežach 15-16 tysiač, a ŭ čaćviortym — 13-14, to možacie być upeŭnienyja — pasrednik prosta zanižaje vierahodnuju canu, kab pryvabić klijenta. Cudaŭ tut nie byvaje.
Čytajcie taksama:
«Ceny vyraśli na 30—50%, novyja mašyny praktyčna nie pastaŭlajuć». Što adbyvajecca na aŭtarynku
Jak ahienty biełaruskaha HRU ŭkaranilisia ŭ apazicyju: novaje rasśledavańnie14
Kamientary