Арыштавалі маёмасць уласніка кампаніі па вырабу надмагілляў. Ён падмануў сотні беларусаў на мільёны рублёў
Завершана расследаванне крымінальнай справы ў дачыненні да Сяргея Рудэнкі, кіраўніка кампаніі «Студыя граніту RG» (былы «Рытуал Граніт»). Следства ўстанавіла, што ён падмануў больш за 700 чалавек на 4,5 мільёна рублёў.
З 2017 года кампанія Сяргея Рудэнкі займалася вырабам помнікаў і добраўпарадкаваннем месцаў пахавання.
Паводле СК, «у пачатку 2022 года мужчына вырашыў ажыццявіць злачынную схему і зарабіць на гора людзей» і стаў працаваць па прынцыпе фінансавай піраміды. Следчыя таксама высветлілі, што Рудэнка пераводзіў грошы з беларускай фірмы на падкантрольныя рахункі замежнай арганізацыі.
У якасці абавязковай умовы — перадаплата на разліковы рахунак да 70%. Пры гэтым вытворчая дзейнасць прадпрыемства ў Беларусі была спынена: работнікі, якія ажыццяўляюць выраб помнікаў, звольнены, закуп матэрыялаў зусім не ажыццяўляўся.
Падчас расследавання ўстаноўлена, што Рудэнка падмануў 706 беларусаў, а сума шкоды перавысіла 4,5 мільёна рублёў.
Следчыя ва ўзаемадзеянні з Дэпартаментам фінансавых расследаванняў КДК Рэспублікі Беларусь наклалі арышт на маёмасць бізнесмена. Сярод арыштаванага: 5 аўтамабіляў, 3 кватэры, загарадны дом, вытворчыя будынкі і збудаванні, а таксама дарагое абсталяванне на агульную суму больш за 6 мільёнаў рублёў. Гэта дасць магчымасць забяспечыць кампенсацыю прычыненай шкоды.
Рудэнку завочна прад'яўлена абвінавачанне па ч. 4 ст. 209 КК (махлярства, учыненае ў асабліва буйным памеры).
Паводле СК, следчыя неаднаразова накіроўвалі просьбы аб аказанні прававой дапамогі ў краіны, дзе хаваецца Рудэнка. «Нягледзячы на сотні ашуканых людзей, кампетэнтныя органы заходніх краін дасылалі толькі адпіскі, спасылаючыся на тое, што крымінальны пераслед Рудэнкі палітызаваны», — сцвярджае СК.
Брат удавы Зельцара: Кадэбісты ішлі ў кватэру па мяне1
Каментары