«Грузінская мара» перамагае ў правінцыі, прайграе ў вялікіх гарадах Вынік пакуль непрадказальны
У ЦВК Грузіі ужо апрацавалі бюлетэні з 70% участкаў.
Партыя «Грузінская мара», якая цяпер пры ўладзе, набірае пакуль 53% галасоў — але падлічаныя пераважна вынікі на малых, вясковых участках. У Тбілісі, Руставі і Батумі падлік галасоў яшчэ не скончаны.
Акрамя таго, паводле папярэдніх афіцыйных даных, чатыры апазіцыйныя партыі нібыта пераадолелі парог у 5% і праходзяць у парламент. «Кааліцыя пераменаў» набірае 11,19%, «Адзінства — нацыянальны рух» — 9,79%, «Моцная Грузія» — 9,05%, «Гахарыя — за Грузію» — 8,26%.
Адразу пасля завяршэння галасавання, нягледзячы на адсутнасць канчатковых вынікаў, прыхільнікі «Грузінскай мары» пачалі святкаваць перамогу ў Тбілісі, запускаючы салюты каля свайго офіса, і ўжо атрымалі віншаванні ад прэм'ера Венгрыі Віктара Орбана. Ганаровы старшыня партыі (фактычны яе закулісны кіраўнік) Бідзіна Іванішвілі падзякаваў прыхільнікам, падкрэсліўшы, што «партыя дамаглася рэдкага поспеху ў цяжкіх умовах».
Апазіцыя, аднак, таксама абвясціла пра сваю перамогу.
Згодна з экзітполам Edison Research, апублікаваным тэлекампаніяй Formula, апазіцыйныя сілы ў сукупнасці набіраюць 51,9%, тады як «Грузінская мара» — 40,9%. Экзітпол праводзіўся на ўсёй тэрыторыі Грузіі, акрамя некантраляваных цэнтральным урадам Абхазіі і Паўднёвай Асеці.
Прэзідэнтка Грузіі Саломэ Зурабішвілі таксама павіншавала праеўрапейскія сілы з перамогай, адзначыўшы, што, паводле яе звестак, апазіцыя набрала 52% галасоў, і гэта яшчэ без уліку галасоў дыяспары. На сваёй старонцы ў сацсетцы Х яна напісала: «Еўрапейская Грузія перамагае з 52% нягледзячы на спробы фальсіфікацыі выбараў».
Раней мясцовыя СМІ паведамлялі, што на выбарчы штаб апазіцыйнай партыі «Нацыянальны рух» (партыя цяпер зняволенага былога прэзідэнта Міхаіла Саакашвілі) адбыўся напад. На тэрыторыю штаб ўварваліся невядомыя з дубінкамі і ўчынілі бойку з прыхільнікамі партыі.
Каментары