Беларуская актрыса Кацярына Васільева трагічна загінула ў 37 гадоў
15 жніўня ў выніку няшчаснага выпадку загінула актрыса Малога тэатра Кацярына Васільева, паведаміла прэс-служба тэатра.
Кацярына Васільева нарадзілася 28 красавіка 1987 года ў Гомелі. У 2011 годзе з адзнакай скончыла Вышэйшае тэатральнае вучылішча імя Шчэпкіна. Па заканчэнні была прынята ў трупу Малога тэатра. На рахунку актрысы 15 роляў, сярод якіх Соф'я ў «Гора ад розуму», Марына ва «Улады цемры», Міроніха ў «Апошнім тэрміне» і іншыя.
Прычыну смерці актрысы не называюць. У сеціве з'явілася версія, што няшчасны выпадак здарыўся ў маскоўскім метро. 15 жніўня там маладая жанчына трапіла пад цягнік. Яна ўпала з платформы на станцыі «Першамайская» Арбацка-Пакроўскай лініі, піша «Камсамолка».
Пацярпелая атрымала цяжкія траўмы, хуткая дапамога даставіла яе ў шпіталь, дзе яна памерла. Вядома, што загінулая — ураджэнка Беларусі, у яе нядаўна нарадзілася дзіця.
Імаверна, гэта і была Васільева. Яна таксама прыехала ў Маскву з Беларусі і пяць месяцаў таму ў яе нарадзілася дачка Васіліса.
Муж акторкі не захацеў гаварыць, пры якіх трагічных абставінах загінула ягоная жонка: «Усё, што пішуць пра нібыта няшчасны выпадак — не буду каментаваць. Каця была поўная жыцця! — сказаў ён.
Паводле яго слоў, іх дачка — доўгачаканае дзіця, яны былі ў шлюбе 9 гадоў.
Кацярыну Васільеву ўспамінаюць як таленавітую акторку. Яна была адной з любімых вучаніц Юрыя Саломіна.
Развітанне з Кацярынай Васільевай пройдзе 20 жніўня ў 12:00 у фае Гістарычнай сцэны тэатра.
Каментары