Новае даследаванне кажа, што малекулярныя змены, звязаныя са старэннем, адбываюцца не лінейна, а прыпадаюць на два перыяды ў нашым жыцці. Што за яны?
Як піша The Washington Post, у новым даследаванні навукоўцы Стэнфардскага ўніверсітэта адсочвалі ўзроставыя змены ў больш чым 135 тысяч тыпаў малекул і мікробаў, узятых у больш чым 100 дарослых людзей. Яны выявілі, што зрухі ў іх колькасці — павелічэнне або памяншэнне — не адбываліся паступова з цягам часу, а згрупаваліся вакол двух узростаў.
На словах аўтараў даследавання, нягледзячы на тое, што мы мяняемся на працягу ўсяго жыцця, ёсць два асноўныя перыяды, калі адбываюцца сапраўды кардынальныя змены. Адзін прыпадае на сярэдзіну пятага дзясятка (у сярэднім гэта 44 гады), а другі — на 60 гадоў.
Вынікі даследавання апублікаваныя ў часопісе Nature Aging.
Даследаваннем было ахоплена 108 здаровых дарослых людзей рознага этнічнага паходжання ва ўзросце ад 25 да 75 гадоў. Кожныя тры-шэсць месяцаў на працягу прыкладна двух гадоў навукоўцы бралі ў іх мазкі з рота, скуры і носа, а таксама ўзоры крыві і кала.
У рамках даследавання вучоныя назіралі змены ў малекулах і мікробах, уключаючы бялкі, метабаліты і ліпіды, якія звязаны з функцыяй сардэчна-сасудзістай і імуннай сістэм, метабалізмам, скурай і цягліцамі. Усяго аналізам было ахоплена каля 135 239 розных малекул і мікробаў.
Статыстычны аналіз паказаў, што большасць малекул (81%) у арганізме чалавека істотна змянялася, калі ён дасягаў 44 і 60 гадоў. Вучоныя таксама заўважылі некаторыя адрозненні ў зменах паміж двума пікамі.
На сярэдзіну 40-х гадоў прыпадаюць прыкметныя змены колькасці малекул, звязаных з сардэчна-сасудзістымі захворваннямі, метабалізмам алкаголю і ліпідаў (тлушчаў). У тых, каму за 60 гадоў, прыкметныя ваганні назіраліся ў колькасці малекул, звязаных з імуннай рэгуляцыяй, функцыяй нырак і метабалізмам вугляводаў, а таксама сардэчна-сасудзістай сістэмай.
Аўтары адзначаюць, што не былі здзіўлены пікам, які прыпадае на 60 гадоў, бо даўно вядома, што ў гэты перыяд узнікаюць многія ўзроставыя захворванні, такія як сардэчна-сасудзістыя ці рак.
А вось пік сярэдзіны 40-х гадоў для іх быў дзіўным з-за таго, што ён ахоплівае як жанчын, так і мужчын. Атрымліваецца, што драматычныя змены ў арганізме нельга тлумачыць выключна надыходам перыменапаўзы або менапаўзы ў жанчын. Існуюць іншыя, больш значымыя фактары, якія ўплываюць на змены ў арганізме як мужчын, так і жанчын.
Дакладная прычына гэтых малекулярных змяненняў, якія прыпадаюць на 44 і 60 гадоў, незразумелая. Але аўтары даследавання адзначаюць, што іх высновы павінны паспрыяць таму, каб людзі пасля 40 гадоў больш клапаціліся пра сваё здароўе. Гэта ўключае ў сябе як праходжанне рэгулярных медыцынскіх аглядаў, так і карэкціроўку ладу жыцця і дыеты.
Вучоныя спадзяюцца, што далейшыя даследаванні малекулярных змен дадуць падказку аб прычынах узроставых захворванняў.
«У тых, хто быў у Мінску ў 2020-м, зусім іншае меркаванне». Сястра Калеснікавай адказала Пазняку81
Каментары
Як і менапаўзы у жанчын: у каго 40 годзікаў, у каго 50.