У Італіі ўкраінка ўпала са скалы і 6 гадзін маліла свайго мужчыну-расіяніна аб дапамозе. Ён так і не дапамог
Следчым хлопец сказаў, што стаміўся ад паводзін дзяўчыны і хацеў хутчэй скончыць адносіны.
![Марта-Марыя Агрызка Илья Батракощ Марта-Мария Огрызко Илья Батраков Marta Maria Ohryzko Ilia Batrakov](http://d3kcf2pe5t7rrb.cloudfront.net/img/w840d4webp1/photos/z_2024_07/-trbqd.jpg.webp)
Аб трагічным выпадку, які адбыўся 13 ліпеня на італьянскім востраве Іскія (Ischia) паведамляе Lа Republica. 32-гадовая ўраджэнка Львова Марта-Марыя Агрызка жыла ў трэйлер-парку разам са сваім партнёрам, 41-гадовым расіянінам Ільём Батраковым.
Як паведамляе паліцыя, днём Марта-Марыя пайшла прагуляцца і звалілася са скалы вышынёй два метры. Пры падзенні яна зламала шчыкалатку. Каля трох гадзін дня дзяўчына звязалася са сваім партнёрам праз WhatsАpp і папрасіла аб дапамозе. На працягу наступных пяці гадзін яна пісала яму некалькі разоў.
Сярод паведамленняў не толькі просьбы дапамагчы, але і просьбы дараваць. Але ні яна, ні ён, як адзначае паліцыя, не спрабавалі звязацца з экстраннымі службамі.
Акрамя паведамленняў, Агрызка спрабавала дазваніцца да свайго каханага. Ён падняў трубку толькі а дзясятай гадзіне вечара. Па інфармацыі паліцыі, размаўлялі яны пяць хвілін.
Пасля гэтага, як расказаў сам Батракоў, ён пайшоў яе шукаць і знайшоў яшчэ жывой. Аднак замест дапамогі пакінуў «спаць» у рове.
На наступны дзень Марту-Марыю знайшлі мёртвую. На целе былі пашкоджанні, якія магла атрымаць як ад падзення, так і ад пабояў.
![](http://d3kcf2pe5t7rrb.cloudfront.net/img/w732d4webp1/photos/z_2024_07/nhqkth-hu51p.jpg.webp)
Як высветліла следства, Батракоў шмат піў і раўнаваў сваю партнёрку. У час прыступаў рэўнасці падымаў на яе руку. Жанчына двойчы звярталася па медычную дапамогу. Першы раз пасля атрыманых пабояў, а другі раз з апёкамі другой ступені — Батракоў падпаліў на ёй адзенне.
Былі ў Іллі прэтэнзіі і да кола камунікацыі дзяўчыны. Яго раздражняла, што там шмат украінцаў.
Паратунак ад таксічных адносін Марта-Марыя шукала ў групе псіхалагічнай падтрымкі, але Батракову гэта не падабалася. Аднойчы ён нават пагражаў ёй нажом, патрабуючы спыніць наведанне групы.
Пра частыя сваркі паміж партнёрамі журналістам расказалі і суседзі. Яны сцвярджаюць, што ў тую трагічную суботу Марта-Марыя зноў пасварылася з Іллёй і стала збіраць чамаданы.
Іллю Батракова арыштавала паліцыя. Яго абвінавачваюць у наўмысным пакіданні жанчыны ў небяспецы. Следчыя выказваюць версію аб тым, што прычынай смерці мог стаць прыступ сутараг.
Следчым Батракоў заявіў, што «стаміўся ад паводзін» сваёй партнёркі і хацеў «хутчэй скончыць іх адносіны». А свайму адвакату ён сказаў, што «не чакаў, што ўсё скончыцца так дрэнна».
Каментары
Кохайтесь, чорнобриві, та не з москалями. (Т.Г. Шаўчэнка)