Беларусаў замежжа абавяжуць паведамляць пра шлюб і нараджэнне дзяцей. А якое пакаранне тым, хто праігнаруе?
Днямі Лукашэнка падпісаў папраўкі ў законы па рэгуляванні шлюбных і сямейных адносін. З яго вынікае, што беларусаў замежжа абавяжуць паведамляць дзяржаве аб рэгістрацыі шлюбаў і нараджэнні дзяцей за мяжой.
Дзяржава хоча ведаць пра цябе ўсё
Згодна са зменамі ў заканадаўстве, у беларусаў з'явіцца абавязак паведамляць у кампетэнтныя органы звесткі аб рэгістрацыі шлюбаў і нараджэнні дзяцей за мяжой.
Зрабіць гэта трэба будзе не пазней за 6 месяцаў з моманту рэгістрацыі акта грамадзянскага стану.
«Парадак прадстаўлення грамадзянамі, уліку і апрацоўкі названых звестак органамі, якія рэгіструюць акты грамадзянскага стану, вызначаецца ўрадам Беларусі», — гаворыцца ў законе.
Асноўныя палажэнні закона ўступаюць у сілу 1 студзеня 2025 года. Інфармацыі пра тое, што чакае беларусаў, якія праігнаруюць новыя патрабаванні, няма.
У той жа час ураду пастаўлена задача да 1 студзеня 2025 года забяспечыць прывядзенне актаў заканадаўства ў адпаведнасць з гэтым законам і прыняць іншыя меры па яго рэалізацыі.
Ці з'явіцца адказнасць за ігнараванне патрабаванняў?
Пакуль незразумела. Сітуацыя падобная да той, што склалася з абавязкам падаваць звесткі пра наяўнасць другога грамадзянства, ДНЖ, карты паляка і іншых дакументаў, якія даюць права на ільготы ў замежных дзяржавах.
Патрабаванне ёсць, а вось адказнасці за невыкананне гэтых патрабаванняў — няма.
Сілавікі анансавалі, што з цягам часу пралабіруюць змены ў Кодэкс аб адміністратыўных правапарушэннях, каб складаць пратаколы на тых, хто не паведаміў, напрыклад, пра сваю карту паляка. Аднак пакуль пакаранне так і не прыдумалі.
***
Цалкам азнаёміцца з усімі зменамі можна па спасылцы.
«Чаму не спытае ў сябе: калі я езджу ў Германію і забіраю ўсе ўзнагароды, чаму не выйшаў на кантакт з немцамі?» Да каго звярнуўся Латушка?25
Каментары