Каб распаўсюдзіць фэйк пра жонку Зяленскага, расіяне стварылі фальшывы французскі СМІ
Расійская прапаганда масава распаўсюдзіла навіну пра тое, што Алена Зяленская нібыта купіла шыкоўны аўтамабіль Bugatti за $4,5 мільёна. Прычым са спасылкай французскае медыя Vérité Cachée. Але што хаваецца за гэтым?
Днямі крамлёўскія СМІ разам апублікавалі сенсацыйную навіну пра жонку прэзідэнта Украіны. Яны расказалі, што французскі партал Vérité Cachée (назва перакладаецца як «схаваная праўда») даведаўся пра новую пакупку Алены Зяленскай — новы гіперкар Bugatti Tourbillon за 4,5 мільёна даляраў. Яна нібыта аформіла здзелку падчас паездкі ў Францыю з мужам на 80-годдзе са дня высадкі саюзнікаў у Нармандыі.
Зяленская, як сцвярджаюць прапагандысты, стала першай уласніцай падобнага аўто, якіх плануюць выпусціць усяго 250 штук і толькі ў 2026 годзе.
Як піша Insider, знешне сайт Vérité Cachée падобны да звычайнага анлайн-СМІ. Але існуе ён усяго некалькі дзён: інтэрнэт-архіў упершыню знайшоў яго толькі 25 чэрвеня 2024 года.
Калі прыгледзецца, бачныя некаторыя падазроныя рэчы, напрыклад, назва аднаго з артыкулаў на англійскай мове, хоць сам артыкул на французскай.
Пры аналізе тэкстаў артыкулаў спецыялізаванымі сэрвісамі высветлілася, што напісаныя яны штучным інтэлектам. За выключэннем аднаго-адзінага матэрыялу — аб куплі Bugatti Аленай Зяленскай. Але аўтар зрабіў памылку — у назве мадэлі Bugatti Tourbillon ён напісаў Turbillon.
Артыкул праілюстраваны фатаграфіяй дакумента — пацвярджэння папярэдняй замовы машыны на імя Зяленскай. Але ў адрасе аўтасалона зрабілі памылку ў назве парыжскага прыгарада Нёі-сюр-Сэн, дзе ён знаходзіцца, — замест Neuilly-sur-Seine напісана Neuily-sur-Seine. Прычым гэта не выпадковая памылка друку, памылка паўтараецца двойчы.
Для большага даверу аўтары артыкула прыклалі яшчэ і відэа, дзе нехта, прадстаўлены як супрацоўнік дылерскага цэнтра Bugatti па імені Жак Бертэн, расказвае, як ён ганарыцца тым, што жонка прэзідэнта стала «часткай сям'і Bugatti». Інтэр'ер аўтамабіля, у якім знята відэа, не падобны ні да адной з мадэляў Bugatti.
Занадта стараннае вымаўленне выдае ў «Бертэне» замежніка. А само відэа, падобна, таксама праца штучнага інтэлекту: анлайн-сэрвісы распазнання асоб выяўляюць, што з вялікай верагоднасцю (86% супадзення) «Бертэн» — гэта асоба з фотабанка Shutterstock, дзе яна падпісана «шчаслівы малады мужчына».
Vérité Cachée — не першы фэйкавы СМІ, створаны расійскімі прапагандыстамі. Раней ужо паведамлялася аб неіснуючай нямецкай газеце Globus Deutschland і нібыта польскім выданні Niezależny Dziennik Polityczny, якія публікавалі пракрамлёўскія матэрыялы.
«Проста заліваешся слязьмі і думаеш: за што?» Ірына Шчасная і яе чатыры балючыя гады за кратамі7
Каментары