У Лепелі за сутэнёрства судзяць былога крымінальніка і алкаголіка, які ператварыў сваю аграсядзібу ў «Востраў цвярозасці»
Жанчын ён запрасіў для ўцех расіян, якія прыехалі ў камандзіроўку.
У Лепельскім раённым судзе 19 і 20 кастрычніка ў закрытым рэжыме судзяць Ігара Печкурова — уладальніка аграсядзібы, дзе праходзяць рэабілітацыю залежныя ад наркотыкаў і алкаголю.
У сакавіку гэтага года ён знік з сацыяльных сетак, а неўзабаве на канале сілавікоў з'явіўся ролік пра ягонае затрыманне. Паводле каментара прадстаўніка ўпраўлення МУС Віцебскага аблвыканкама, затрыманы з кастрычніка мінулага года на сваёй аграсядзібе выкарыстоўваў жанчын для заняткаў прастытуцыяй. Каштавалі сэксуальныя паслугі ад 50 да 100 рублёў з аднаго кліента. Дома ў сутэнёра было канфіскавана 2,6 тысячы даляраў і 10 тысяч расійскіх рублёў. Асобна падкрэсліваецца, што раней ён прыцягваўся да адказнасці за хуліганства і рабаўніцтва.
Тое, што супрацоўнікі АМАПа затрымалі менавіта Ігара Печкурова, пацвярджаюць і мясцовыя жыхары. Гэты чалавек добра вядомы ў раёне, бо ягоны прыклад міліцыянты часта згадвалі ў прафілактычных гутарках з мясцовымі аматарамі выпіць.
Быў Ігар Печкуроў і героем публікацый у мясцовай прэсе. Два гады таму газета «Лепельскі край» прадстаўляла чытачам Ігара Печкурова як чалавека, які здолеў завязаць са сваім мінулым, пакінуўшы ў ім некалькі судзімасцяў, алкагалізм і дзве разбураныя на гэтай глебе сям'і. Паводле публікацыі, да цвярозага ладу жыцця Печкуроў павяртаўся ў псіханеўралагічным шпіталі пад уплывам праваслаўных вернікаў, якія адведвалі пацыентаў і праводзілі рэлігійныя гутаркі.
У 2016 годзе былы алкаголік ператварыў сваю аграсядзібу «Рыбачок» у рэабілітацыйную ўстанову. Яна існавала дзякуючы спонсарскай падтрымцы з Расіі, аднак імёнаў мецэнатаў ані афіцыйныя крыніцы, ані сам Печкуроў ніколі не называлі. Але на старонках у Instagram і TikTok час ад часу згадваюцца візіты на «Востраў цвярозасці» кіраўнікоў расійскіх структур, якія займаюцца рэабілітацыяй людзей з залежнасцямі, іншых «сяброў з Расіі», якія «прыязджаюць адпачыць», а таксама праваслаўных святароў — у якасці пачэсных гасцей.
Што да «ўдзельнікаў праекта», як іх называе сам Печкуроў, то кагосьці з іх ён прывозіў на «Востраў цвярозасці» сам, а кагосьці дасылалі праваслаўныя валанцёры.
Рэабілітацыя, паводле відэаролікаў у сацыяльных сетках, палягала ў поўнай адмове ад спіртнога, купаннях у возеры ў любое надвор'е і працатэрапіі: «падапечныя» Печкурова ўпарадкавалі сядзібу, даглядалі кур і качак, рабілі дробны рамонт, лавілі рыбу, чысцілі яе, капцілі, а гаспадар прапаноўваў гатовы прадукт на продаж.
Тое, за што ўладальнік «Вострава цвярозасці» трапіў на лаву падсудных, выданне vitebsk.biz апісвае наступным чынам:
«У Лепельскі раён у працяглую камандзіроўку прыехала група грамадзянаў Расіі. Сярод іх былі адзінокія мужчыны, якія хацелі жаночай ласкі. Пра гэта даведаўся ўладальнік адной з мясцовых аграсядзіб. Ён убачыў у гэтай сітуацыі магчымасць зарабіць, прапануючы гасцям сэксуальныя паслугі мясцовых жыхарак. Усе яны мелі фінансавыя цяжкасці».
Абвінавачаны запрашаў жанчын працаваць кухаркамі або барменкамі, а потым ставіў перад фактам, што давядзецца аказваць сэксуальныя паслугі. Паводле матэрыялаў следства, прымусу не было: жанчыны пагаджаліся на гэта добраахвотна.
Печкурова вінавацяць паводле ч. 2 арт. 171 (арганізацыя і (або) выкарыстанне заняткаў прастытуцыяй ці стварэнне ўмоваў для заняткаў прастытуцыяй) і ч.2 арт. 171-2 (уцягванне ў заняткі прастытуцыяй або прымус да працягу заняткаў прастытуцыяй). Ягоную справу разбірае суддзя Дзмітрый Васюк. Падсуднаму пагражае да 10 гадоў пазбаўлення волі.
Чыноўнікі прагаварыліся, што ў Беларусі засталося толькі 8,8 мільёна чалавек? Гэта няправільная выснова14
Каментары