Ihar Piečkuroŭ. Fota: instagram.com/ostrov.trezvosti/

Ihar Piečkuroŭ. Fota: instagram.com/ostrov.trezvosti/

U Lepielskim rajonnym sudzie 19 i 20 kastryčnika ŭ zakrytym režymie sudziać Ihara Piečkurova — uładalnika ahrasiadziby, dzie prachodziać reabilitacyju zaležnyja ad narkotykaŭ i ałkaholu. 

U sakaviku hetaha hoda jon źnik z sacyjalnych sietak, a nieŭzabavie na kanale siłavikoŭ źjaviŭsia rolik pra jahonaje zatrymańnie. Pavodle kamientara pradstaŭnika ŭpraŭleńnia MUS Viciebskaha abłvykankama, zatrymany z kastryčnika minułaha hoda na svajoj ahrasiadzibie vykarystoŭvaŭ žančyn dla zaniatkaŭ prastytucyjaj. Kaštavali seksualnyja pasłuhi ad 50 da 100 rubloŭ z adnaho klijenta. Doma ŭ suteniora było kanfiskavana 2,6 tysiačy dalaraŭ i 10 tysiač rasijskich rubloŭ. Asobna padkreślivajecca, što raniej jon pryciahvaŭsia da adkaznaści za chulihanstva i rabaŭnictva.

Toje, što supracoŭniki AMAPa zatrymali mienavita Ihara Piečkurova, paćviardžajuć i miascovyja žychary. Hety čałaviek dobra viadomy ŭ rajonie, bo jahony prykład milicyjanty časta zhadvali ŭ prafiłaktyčnych hutarkach ź miascovymi amatarami vypić.

Byŭ Ihar Piečkuroŭ i hierojem publikacyj u miascovaj presie. Dva hady tamu hazieta «Lepielski kraj» pradstaŭlała čytačam Ihara Piečkurova jak čałavieka, jaki zdoleŭ zaviazać sa svaim minułym, pakinuŭšy ŭ im niekalki sudzimaściaŭ, ałkahalizm i dźvie razburanyja na hetaj hlebie siamji. Pavodle publikacyi, da ćviarozaha ładu žyćcia Piečkuroŭ paviartaŭsia ŭ psichanieŭrałahičnym špitali pad upłyvam pravasłaŭnych viernikaŭ, jakija adviedvali pacyjentaŭ i pravodzili relihijnyja hutarki.

Fota: instagram.com/ostrov.trezvosti/

Fota: instagram.com/ostrov.trezvosti/

U 2016 hodzie były ałkaholik pieratvaryŭ svaju ahrasiadzibu «Rybačok» u reabilitacyjnuju ŭstanovu. Jana isnavała dziakujučy sponsarskaj padtrymcy z Rasii, adnak imionaŭ miecenataŭ ani aficyjnyja krynicy, ani sam Piečkuroŭ nikoli nie nazyvali. Ale na staronkach u Instagram i TikTok čas ad času zhadvajucca vizity na «Vostraŭ ćviarozaści» kiraŭnikoŭ rasijskich struktur, jakija zajmajucca reabilitacyjaj ludziej z zaležnaściami, inšych «siabroŭ z Rasii», jakija «pryjazdžajuć adpačyć», a taksama pravasłaŭnych śviataroŭ — u jakaści pačesnych haściej.

Što da «ŭdzielnikaŭ prajekta», jak ich nazyvaje sam Piečkuroŭ, to kahości ź ich jon pryvoziŭ na «Vostraŭ ćviarozaści» sam, a kahości dasyłali pravasłaŭnyja vałanciory.

Fota: instagram.com/ostrov.trezvosti/

Fota: instagram.com/ostrov.trezvosti/

Reabilitacyja, pavodle videarolikaŭ u sacyjalnych sietkach, palahała ŭ poŭnaj admovie ad śpirtnoha, kupańniach u voziery ŭ luboje nadvorje i pracaterapii: «padapiečnyja» Piečkurova ŭparadkavali siadzibu, dahladali kur i kačak, rabili drobny ramont, łavili rybu, čyścili jaje, kapcili, a haspadar prapanoŭvaŭ hatovy pradukt na prodaž.

Toje, za što ŭładalnik «Vostrava ćviarozaści» trapiŭ na łavu padsudnych, vydańnie vitebsk.biz apisvaje nastupnym čynam:

«U Lepielski rajon u praciahłuju kamandziroŭku pryjechała hrupa hramadzianaŭ Rasii. Siarod ich byli adzinokija mužčyny, jakija chacieli žanočaj łaski. Pra heta daviedaŭsia ŭładalnik adnoj ź miascovych ahrasiadzib. Jon ubačyŭ u hetaj situacyi mahčymaść zarabić, prapanujučy haściam seksualnyja pasłuhi miascovych žycharak. Usie jany mieli finansavyja ciažkaści».

Abvinavačany zaprašaŭ žančyn pracavać kucharkami abo barmienkami, a potym staviŭ pierad faktam, što daviadziecca akazvać seksualnyja pasłuhi. Pavodle materyjałaŭ śledstva, prymusu nie było: žančyny pahadžalisia na heta dobraachvotna.

Piečkurova vinavaciać pavodle č. 2 art. 171 (arhanizacyja i (abo) vykarystańnie zaniatkaŭ prastytucyjaj ci stvareńnie ŭmovaŭ dla zaniatkaŭ prastytucyjaj) i č.2 art. 171-2 (uciahvańnie ŭ zaniatki prastytucyjaj abo prymus da praciahu zaniatkaŭ prastytucyjaj). Jahonuju spravu raźbiraje sudździa Dźmitryj Vasiuk. Padsudnamu pahražaje da 10 hadoŭ pazbaŭleńnia voli.

Клас
10
Панылы сорам
14
Ха-ха
26
Ого
4
Сумна
2
Абуральна
13