Старшыню Беларускага кангрэса дэмакратычных прафсаюзаў Аляксандра Ярашука пераводзяць са шклоўскай калоніі ў крытую турму ў Магілёве. Пра гэта «Свабодзе» паведаміў актывіст незалежнага прафсаюзнага руху Максім Пазнякоў са спасылкай на звесткі, атрыманыя ад самога Ярашука.
«Ведаем, што яму дастаецца, на яго ад пачатку моцна ціснулі і цяпер не адчапіліся. За што кідаюць у «крытку« (крытую турму. — РС), пакуль нам невядома. Але зразумела, што падставу знойдуць, калі ёсць загад. Перавод у крытую турму для яго, чалавека ўжо пенсійнага ўзросту, азначае новыя выпрабаванні. Разумеем, што ў маральным і ў фізічным сэнсе крытая турма — гэта значна цяжэй, чым калонія. Але даходзяць звесткі, што ён трымаецца мужна», — расказаў актывіст.
Аляксандр Ярашук нарадзіўся ў 1951 годзе. Лідара БКДП арыштавалі ў красавіку 2022 года і асудзілі на 4 гады зняволення паводле 342 і 361 артыкулаў Крымінальнага кодэкса — за «арганізацыю дзеянняў, якія груба парушаюць грамадскі парадак», і «заклікі да дзеянняў, якія наносяць шкоду нацыянальным інтарэсам краіны». Сваёй віны Аляксандр Ярашук не прызнаў, праваабаронцы Беларусі прызналі яго палітвязнем.
З праблемамі са здароўем сутыкнуліся ў няволі іншыя лідары незалежнага прафсаюзнага руху, паведаміў Максім Пазнякоў.
«Ведаем, што ў Генадзя Фядыніча, якога трымаюць у бабруйскай калоніі № 2, пачаліся праблемы з ныркамі, а ў яго яшчэ і цукровы дыябет. У Васіля Бераснева, які ў 15-й калоніі пад Магілёвам, таксама хворыя ныркі.
Там жа адбывае тэрмін ажно ў 8 гадоў Вацлаў Арэшка.
У яго вельмі складанае становішча са зрокам, адным вокам зусім не бачыць».
Усяго ў вязніцах цяпер знаходзіцца 51 актывіст незалежнага прафсаюзнага руху Беларусі. Паводле Максіма Пазнякова, які за мяжой часова выконвае абавязкі старшыні БКДП, пра ўсіх зняволеных паплечнікаў у кангрэсе стараюцца сабраць звесткі, па магчымасці падтрымліваюць кантакты з імі праз сваякоў. Праўда, гэта не заўсёды ўдаецца.
«Большасць нашых палітвязняў — гэтыя тыя, каго ўжо асудзілі і яны знаходзяцца ў калоніях. Ад некаторых прыходзяць лісты, бываюць званкі на волю. Але не ад усіх. Вось у Аляксандра Ярашука нават званкі абмяжоўвалі. Часам бывае і так, што сваякі вязняў просяць пра іх нічога не паведамляць у медыя, асцерагаюцца. Неўзабаве адзін актывіст мусіць выйсці на волю, дык пра яго просяць маўчаць. Гэта што тычыцца калоній.
Але ёсць і тыя калегі, каго адносна нядаўна затрымалі і яны яшчэ пад следствам, як актывісты з «Нафтана» Вольга Брыцікава, Аляксандар Балонкін і Аляксандр Кухаронак. Ведаем пра іх, што яны ў віцебскім СІЗА. Умовы там складаныя, але яны трымаюцца».
Паводле Максіма Пазнякова, сёлета варта чакаць больш рашучых дзеянняў, нацэленых на вызваленне беларускіх прафсаюзных актывістаў, з боку Міжнароднай арганізацыі працы (МАП).
«Сёлета МАП прыняла рэзалюцыю аб Беларусі, у якой размова ідзе пра ўжыванне адносна беларускага ўрада 33-га пункта статута МАП. Гэтым пунктам прафсаюзным арганізацыям, якія ўваходзяць у МАП, у адказ на парушэнне ў пэўнай краіне права на прафсаюзныя аб’яднанні рэкамендавана аказваць на яе ціск праз санкцыі, байкоты, кампаніі салідарнасці працоўных. Гэтая пазіцыя даведзеная да розных краін, і мы чакаем, што неўзабаве яна пачне даваць плён», — сказаў Максім Пазнякоў.
Брат удавы Зельцара: Кадэбісты ішлі ў кватэру па мяне1
Каментары