Канада ўвяла санкцыі супраць шэрагу расійскіх культурных дзеячаў і Міністэрства культуры РФ. Сярод іншых пад іх трапіў і прадзюсар Іосіф Прыгожын, якога часта блытаюць з ягоным аднафамільцам Яўгенам Прыгожыным, што нарадзіла нямала мемаў.
Акрамя Іосіфа Прыгожына пад канадскія санкцыі патрапілі такія вядомыя расійскія культурныя дзеячы, якія падтрымліваюць вайну супраць Украіны, як жонка Прыгожына спявачка Валерыя, рэжысёр Мікіта Міхалкоў, акцёры Іван Ахлабысцін і Дзмітрый Харацьян, спевакі Філіп Кіркораў, Юлія Чычэрына, Аляксандр Ф. Скляр, Цімаці (Цімур Юнус), Зара, Shaman (Яраслаў Дронаў).
З чыноўнікаў пад санкцыі патрапілі міністр навукі і вышэйшай адукацыі Валерый Фалькоў і міністарка культуры Вольга Любімава.
Таксама санкцыі ўведзеныя супраць гэтых двух міністэрстваў у цэлым, прапагандысцкага рэсурсу readovka.ru, кампаніі Міхалкова «Бесагон», мабільных аператараў МТС, «Мегафон» і Tele2 і інш.
Каментары