Крапіва, медуніца, макрыца ды іншае пустазелле, якое ўзбагаціць ваш стол

Звычайна гэтыя расліны бязлітасна выполваюць, выкошваюць, труцяць гербіцыдамі, але яны вырастаюць зноў і зноў. Пры гэтым шматлікія з іх — ядомыя і могуць забяспечыць арганізм чалавека вітамінамі, асабліва ўвесну, калі культурныя расліны яшчэ не пачалі расці.

Правілы збору дзікарослых раслін для салатаў

Пры зборы дзікарослых раслін трэба прытрымлівацца некаторых правілаў.

Уводзіць у рацыён іх трэба паступова. Калі вы ніколі ні елі пустазелля, то ваш арганізм можна яго напачатку не ўспрыняць нармальна. Пачынаць лепш з дабаўлення некалькіх лісцікаў пустазелля ў талерку з салатам. Гэта не асабліва зменіць смак, але страва набудзе новае адценне.

Дзікарослыя расліны трэба збіраць у экалагічна чыстых месцах. Не збірайце траваў каля дарог, прамысловых прадпрыемстваў, каля пасадак, якія апрацоўваліся хімікатамі, каля звалак. Сабраныя расліны трэба ўважліва перабраць і добра прамыць.

Калі расліны збіраеце для салатаў, то лепш за ўсё іх спажыць у той жа дзень. Захоўваюць іх не больш за два дні.

Як дзікарослыя расліны дадаюць у салаты

Самы просты спосаб ужывання дзікарослых раслін — дадаваць іх у салаты па аналогіі з кропам ці пятрушкай. Гэта ніяк не адаб'ецца на смакавых якасцях салату, але дадасць неабходных вітамінаў і зробіць рацыён больш разнастайным.

У першыя стравы пустазелле дадаюць за 5—10 хвілін да канца варкі, спачатку ў невялікай колькасці, як прыправу.

Пустазелле падыдзе для зялёных кактэйляў і смузі, якія цяпер набылі вялікую папулярнасць і замяняюць традыцыйную ежу, асвяжаюць, дапамагаюць скінуць вагу і аднавіць сілы. З лісцем дзікіх раслін змешваюць агуркі, бананы, яблыкі, прарошчанае насенне і арэхі.

Дзесяць відаў пустазелля для вашага стала

Павялічыць

Стрэлкі

Стрэлкі (рус. — пастушья сумка). Гэтая расліна расце паўсюль. Мала хто ведае, што яна вельмі багатая на вітаміны, арганічныя кіслоты, мікра— і макраэлементы. Яна ўтрымлівае шчаўевую, яблычную, вінную кіслоты, вітаміны К і В, дубільныя рэчывы. Расліна сакавітая, на смак саладкаватая. У салатах выкарыстоўваюць суквецці і плады. З маладога лісця гатуюць баршчы, супы, салаты, начынкі для пірагоў. Насенне выкарыстоўваюць у якасці спецыі.

Медуніца

Павялічыць

Гэтая расліна багатая на вітамін С, жалеза, марганец, карацін. Медуніцу можна выкарыстоўваць як асноўную зеляніну пры прыгатаванні салатаў. Яе таксама дадаюць у фаршы, супы, яечню, рагу і стравы з круп. Збіраюць медуніцу, пакуль яе суквецці не агрубелі. Пры зборы зрываюць верхавіны расліны.

Макрыца

Павялічыць

Расліна застаецца ядомай да свайго цвіцення. Яна багатая на вітаміны С, Е, калій. Яе таксама можна ўжываць як шпінат. Для гэтага яе трохі адварваюць і дадаюць алей. Смак свежай макрыцы дастаткова нейтральны, таму, калі яе дадаць у салат ці суп, то ніхто не зразумее, што яна там прысутнічае. Макрыца паляпшае дзейнасць сардэчна-сасудзістай і цэнтральнай нервовай сістэмы, карысная пры страўнікава-кішачных захворваннях.

Конскае шчаўе

Павялічыць

У лісці расліны прысутнічае аскарбінавая кіслата. Па сваім хімічным складзе расліна блізкая да рэвеню. У ежу ідуць як лісты, так і сцёблы. Лісце выкарыстоўваюць для прыгатавання салатаў, супоў, начынкі для пірагоў. Яго можна дадаваць у смузі.

Конскае шчаўе вельмі смачнае ў салаце з агуркамі ці памідорамі!

Добрымі кампанентамі для яго будуць радыска, малады часнок і зялёная цыбуля. У ежу выкарыстоўваюць толькі маладыя, маленькія лісцікі. На смак яны не такія кіслыя, як лісце звычайнага шчаўя.

Дзьмухавец

Павялічыць

Яго лісце ўтрымлівае вітаміны А, С, В, Е, К, бета— і альфакарацін, мікра— і макраэлементы. Расліна мае антыпаразітарныя ўласцівасці.

Лісце лепш за ўсё збіраць ранняй вясной, калі яно амаль не мае горкага прысмаку.

А з кветак дзьмухаўца вараць варэнне.

Сушанае карэнне расліны выкарыстоўваецца як заменнік кавы.

Перад ужываннем лісце дзьмухаўца на некалькі гадзін замочваюць у вадзе, каб сышла гарката.

Лебяда

Павялічыць

У гады нішчымніцы нашы продкі вясной ніколі не міналі лебяды.

Лебяда мае прыемны смак і вельмі карысная. Яна амаль на траціну складаецца з пратэіну і па сваіх пажыўных якасцях можа спаборнічаць з грыбамі і шпінатам.

Лісце лебяды тушаць, дадаюць у посныя стравы, супы. А высушаным і змолатым — у хлеб.

Лебяду сушаць, соляць, марынуюць, гатуюць пюрэ, салаты. Яе можна адварыць і заправіць маслам ці маянэзам. Самы просты салат — яйка ці бульба, лебяда і маянэз ці алей.

Перад тым як есці ў салаце, лебяду ашпарваюць кіпнем ці апускаюць у вар на імгненне.

Канюшына

Павялічыць

Расліна мае дастаткова спецыфічны смак, да якога трэба прызвычаіцца, але яна багатая на бялок, фосфар і кальцый.

Свежае лісце маладых раслін дадаюць у салаты з гародніны, супы, а таксама гарніры да мяса і морапрадуктаў, смузі і зялёныя кактэйлі.

Высушанае і здробненае лісце выкарыстоўваюць пры прыгатаванні соусаў, сыроў, мукі.

Лічыцца, што канюшына дапамагае аднавіць сілы пры вялікіх фізічных нагрузках.

Крапіва

Павялічыць

Хіба што найбольш вядомая страва з крапівы — суп.

Сабраная ў маі расліна — самая каштоўная. У ёй у дзесяць разоў болей жалеза і медзі, чым у капусце.

Крапіва ўтрымлівае ў два разы болей вітаміну С, чым парэчка, і ў чатыры разы болей, чым лімон.

Па ўтрыманні караціну яна пераўзыходзіць моркву, а вітаміну К — шпінат.

Расліна багатая на бялок, арганічныя кіслоты, дубільныя рэчывы, эфірныя алеі, цукар.

З дапамогай крапівы можна аднавіць утрыманне кальцыю ў арганізме. Збіраюць верхавіны расліны.

Перад тым як есці, крапіву ашпарваюць кіпнем ці апускаюць у вар на імгненне.

У сушаным выглядзе крапіву дадаюць у выпечку, салаты, і іншыя стравы. Ёю можна пасыпаць адварную бульбу.

З крапівой асцярожным трэба быць тым, у каго праблемы з тромбамі, бо гэтая расліна накоплівае вітамін К, які загушчае кроў.

Маркоўнік цмяналісты

Павялічыць

Гэта пахучая трава з мяккім смакам і тонкім водарам анісу.

Расліна багатая на марганец, кальцый і калій. Яна зʼяўляецца крыніцай жалеза і цынку, што можа спрыяць прадухіленню анеміі.

Маркоўнік выкарыстоўваюць у свежым выглядзе ў якасці прыправы для соусаў, супоў, сырой гародніны, амлетаў, мяса на грылі. Расліна добра пасуе для салатаў. У вараныя стравы трэба дадаваць у самы апошні момант, у канцы варкі. Маркоўнік выкарыстоўваецца ў французскай і італьянскай кухні.

Трыпутнік

Павялічыць

Гэтая расліна, як крапіва, конскае шчаўе і лебяда, даўно ўжываецца ў ежу. Яе таксама трэба збіраць толькі калі лісце маладое. Трыпутнік дадаюць у хлеб, выпечку, зялёныя кактэйлі. Маладое лісце добра спалучаецца са шчаўем, асабліва ў супах з маладой зеляніны. Трыпутнік можна дадаваць у амлеты ці гатаваць з цыбуляй і бульбай. Карысным будзе і насенне трыпутніку. Яно дапамагае ачысціць кішэчнік.

Спадзяваемся, нашы парады дапамогуць вам зрабіць веснавое меню больш разнастайным і карысным.

Чытайце яшчэ:

Вучоныя даказалі, што расліны ўмеюць размаўляць

Чарамша — скарбніца вітамінаў. Вось што з яе можна гатаваць і як вырошчваць

Чуфа: гэты земляны арэх выдатна расце ў беларускіх умовах. Пасадзіце, і вам спадабаецца

• 14
• 0
• 2
• 2
• 1
• 2
• 2
• 0