«Беларусы ваяваць не прагнуць». Выданне The Wall Street Journal зняло рэпартаж з беларуска-ўкраінскай мяжы
Здымачная каманда пабывала ў Мінску і абапал беларуска-ўкраінскай мяжы.
Выданне The Wall Street Journal апублікавала відэарэпартаж пра Беларусь і яе гатоўнасць да магчымага ўступлення ў вайну супраць Украіны.
Здымачны працэс адбываўся ў тым ліку падчас нядаўна праведзенай Аляксандрам Лукашэнкам прэс-канферэнцыі з замежнымі журналістамі.
Каманда WSJ пабывала на беларускай частцы мяжы з Украінай па запрашэнні Дзяржпагранкамітэта Беларусі. Там журналістам паказвалі сітуацыю на мяжы і расказвалі пра «пагрозу ўкраінскага ваеннага ўварвання».
«Сітуацыя на гэты момант дастаткова напружаная і, канечне, трэба выконваць меры бяспекі. Абстаноўка можа памяняцца літаральна праз хвіліны ці гадзіны, і нам давядзецца рэагаваць. Наша памежная служба да такіх выклікаў гатовая і адкажа адпаведным чынам», — сказаў журналістам афіцыйны прадстаўнік ДПК Беларусі Антон Бычкоўскі.
Таксама камандзе WSJ удалося пагаварыць са звычайнымі беларускімі памежнікамі, якія адзначылі, што рэгулярна заўважаюць у небе ўкраінскія дроны. Самі ўкраінцы потым пракаментавалі гэтыя заявы.
«Мы выкарыстоўваем дроны для пастаяннага назірання за колькасцю ворагаў, іх перамяшчэннем і дзейнасцю. У той жа час яны таксама заўсёды адсочваюць нашу актыўнасць», — распавёў Аляксандр, адзін з камандзіраў украінскіх пагранічнікаў на мяжы з Беларуссю.
Пасля гэтага рэпарцёр WSJ Эн Сіманс за кадрам у відэа прыводзіць словы Лукашэнкі аб жорсткім адказе Беларусі ў выпадку правакацый з боку Украіны і адзначае, што пры гэтым адказе Лукашэнка сам можа сутыкнуцца з сур'ёзнымі выпрабаваннямі.
«У Беларусі маленькая і не правераная ў баі армія, а апытанні паказваюць, што беларусы ваяваць не прагнуць», — падкрэсліла Сіманс.
Пры гэтым яна звяртае ўвагу на тых беларусаў, якія ўсё ж дапамагаюць Расіі ў агрэсіі супраць Украіны, і прыводзіць у прыклад лукашысцкі Беларускі саюз жанчын і Дабрачынны фонд Аляксея Талая.
Журналісты WSJ у Мінску змаглі пабачыць, як БСЖ разам з фондам Талая рыхтуюць гуманітарную дапамогу для «патрэб жыхароў Данбаса».
«Мы яе размяркуем па дзіцячых дамах, бальніцах і населеных пунктах на прыфрантавых тэрыторыях Данбаса. Мы адно на аднаго абапіраемся: Расія на Беларусь, Беларусь на Украіну, і я нават больш скажу, сама Украіна мае ў нас патрэбу. Для Беларусі ўсё, што адбываецца там, — гэта боль, гэта як у сям'і», — паведаміў журналістам прадстаўнік фонду Талая бізнэсмен Уладзімір Казбанаў, пры гэтым адзначыўшы, што яго арганізацыя знаходзіцца па-за палітыкай.
Поўны рэпартаж на англійскай мове вы можаце паглядзець ніжэй.
Чытайце яшчэ:
Савіных спрабаваў сарваць выступ Ціханоўскай перад ПА АБСЕ. Але не выйшла, і ён пакінуў залу
«Я даў яму паслухаць перахоп размоў расійскіх вайскоўцаў. Ён збялеў, потым стаў чырвоным». Кіраўнік украінскіх памежнікаў распавёў пра апошнюю сустрэчу з Лапо
ISW папярэдзіў аб падрыхтоўцы Расіі да аперацый пад ілжывым сцягам на поўдні Беларусі
Усё здарылася на Новы год. Смерць самай публічнай супрацоўніцы мінскага АМАПа дагэтуль пакідае пытанні14
Каментары
Наўрад ці гэтая мадам дужа хацела аб'ектыўнага асвятлення таго, што насамрэч адбываецца ў нашай краіне й грамадстве. Скляпала сюжэт па-хуткаму.