Жыхар Верхнядзвінскага раёна пачаставаў суседа крафтавым самагонам, а той здаў яго ў міліцыю
Увагу сілавікоў вытворца самагону прыцягнуў пасля таго, як пачаставаў знаёмага выпіўкай уласнага вырабу, паведамляюць «Народныя навіны Віцебска».
![](http://d3kcf2pe5t7rrb.cloudfront.net/img/w840d4webp1/photos/z_2022_11/pig-g1da002c63_1920-e3cok.jpg.webp)
Высветлілася, што ў гаспадарчай пабудове на прысядзібным участку ў яго была арганізавана падпольная вытворчасць самагонкі: міліцыя знайшла апарат для перагонкі і 7 бідонаў з брагай агульным аб'ёмам каля 300 літраў. Уласна самагон сілавікі змаглі знайсці толькі ў малых колькасцях.
Уладальнік падворка запэўніваў, што ў знойдзеных у яго бідонах змяшчаецца зусім не брага, а корм для свіней. Міліцыя канфіскавала гэты «корм» і накіравала яго на экспертызу, таксама да экспертаў адправіўся і гасцінец, падораны суседу.
Судовы эксперт устанавіў, што ў бідонах утрымліваліся спіртазмяшчальныя вадкасці мацункам ад 13 да 14,6 %, а выяўленыя арганалептычныя паказчыкі і наяўнасць прадуктаў спіртавога закісання паказваюць на тое, што яны з'яўляюцца брагай — паўфабрыкатам для вырабу моцнага алкагольнага напою — самагонкі.
У выніку жыхара Верхнядзвінскага раёна аштрафавалі на 512 рублёў, паведамляе афіцыйны прадстаўнік упраўлення ГКСЭ па Віцебскай вобласці Таццяна Серабракова.
Каментары