Вышэйшую адукацыю ён атрымаў у 31 год, але даслужыўся да самых высокіх пасадаў.
«50 гадоў БССР» і «Крывая Града»
Леаніду Зайцу сёлета будзе ўжо 61 год. Гэта далёка не самы малады чыноўнік у лукашэнкаўскай абойме, але вядома пра яго не так і шмат.
Нарадзіўся ён у вёсцы Гацук. Гэта самая поўнач Слуцкага раёна, да Мінска каля 55 кіламетраў. Гэта вёска больш чым на тысячу жыхароў. Ёсць школа, музычная школка, садок, некалькі магазінаў.
Мясцовыя людзі ў асноўным працуюць на торфпрадпрыемстве «Слуцкае». Калісьці ў вёсцы быў цэх «Мілавіцы», але яго закрылі. Заяц — гэта адно з найбольш распаўсюджаных мясцовых прозвішчаў. Яшчэ часта ўжываюцца Каляда, Хацько, Казючыц.
Сярэднюю школу Леанід Заяц скончыў у 1976 годзе. Ён не пайшоў вучыцца ва ўніверсітэт, трапіў у войска. А пасля вярнуўся ў родную вёску. Пачаў працаваць трактарыстам у калгасе «50 гадоў БССР». Цяпер гэтая гаспадарка мае назву «Крывая Града».
Праз нейкі час працы ў калгасе Заяц паступае на завочнае ў Сельскагаспадарчую акадэмію ў Горках, навучаецца там на агранома. Калі адвучыўся, то стаў галоўным аграномам у калгасе «Слуцк», які знаходзіцца зусім побач з Гацуком.
Як выбіваўся ў людзі
У цэлым біяграфія Зайца крыху нагадвае біяграфію Аляксандра Лукашэнкі. Вучоба ў Горках, праца ў калгасе. Праўда, у палітыку Заяц так і не пайшоў.
Калі Савецкі Саюз канаў, то Леаніду Зайцу прапанавалі ўзначаліць родны калгас. Праўда, зваўся ён на той момант не «50 гадоў БССР», а «Беларусь». Гэта адна з самых паспяховых гаспадарак Случчыны. Была яна ў парадку і ў не самыя прыбытковыя часы — пачатак 1990-х.
У 1998 годзе Зайца забралі ў райцэнтр. Ён узначаліў завод хлебапрадуктаў. Але гэта была толькі прыступка да больш высокіх пасадаў. Ужо праз год яго забіраюць старшынёй Маладзечанскага райвыканкама. Чаму не ў слуцкі? Справа ў тым, што гэты раён на той час узначальваў яшчэ адзін будучы топ-чыноўнік — Зянон Ломаць.
І хоць сам Заяц у Маладзечне адпрацаваў не так доўга, але жыццё, хай і праз дачку, звяжа з гэтым горадам.
У 2001 годзе Мікалай Дамашкевіч забярэ Леаніда Зайца да сябе намеснікам у Мінскі аблвыканкам. Там Заяц адказвае за сельскую гаспадарку і харчаванне.
Але з адстаўкай Дамашкевіча і прыходам Леаніда Крупца працы ў аблвыканкаме для Леаніда Зайца не засталося, таму ён пераходзіць дырэктарам у адзін з найлепшых у краіне агракамбінатаў — у «Дзяржынскі». Цікава, што Заяц стаў не першым кіраўніком «Дзяржынскага», які пасля скокнуў у міністры. Да яго такі самы лёс паўтарыў Сямён Шапіра.
Якім быў міністрам
Ад 2012 года Леанід Заяц знаходзіўся на пасадзе міністра сельскай гаспадаркі. У рэйтынгах самых уплывовых людзей Беларусі, якія складала «Наша Ніва», чыноўнік традыцыйна знаходзіўся ў восьмым і дзявятым дзясятку.
Чыноўнік хваліў Лукашэнку за тое, што той у 1994 не паддаўся модзе на фермерскія гаспадаркі, а адстойваў калгасы. Гэткія ўчынкі кіраўніка дзяржавы ён называў «мудрымі».
Леанід Заяц гаворыць з моцным беларускім акцэнтам, гаварыць чыста па-руску ён не ўмее.
«Аграрыі павінны быць удзячныя дзяржаве», — адзін з пастулатаў працы Зайца. За яго час у краіне з’явілася некалькі паспяховых гаспадарак, але ў цэлым сфера застаецца адстаючай на фоне суседніх дзяржаваў.
Таксама праца Зайца звязаная з пастаяннымі забаронамі на пастаўкі нашай прадукцыі ў Расію і неабходна неяк рэагаваць на гэта. Сам міністр абвінавачваў Рассельгаснагляд ў падтасоўцы вынікаў лабараторных даследаванняў. А таксама абяцаў кіраўніку Рассельгаснагляд Данкверту, што яго не арыштуюць, калі той прыедзе ў Беларусь.
Сярод сваіх дасягненняў Леанід Заяц называў развіццё вытворчасці малака ды мяса і адно з лідзіруючых месцаў Беларусі па экспарце гэтых прадуктаў.
Рэха абасраных кароваў
Міністр сельскай гаспадаркі — гэта ўвогуле выбуховая пасада. Ні ў адным ведамстве кіраўнікі не мяяняліся так часта, як тут. Заяц быў дзясятым міністрам. Але ніхто да яго так доўга не знаходзіўся ў гэтым крэсле.
Мабыць, Леанід Заяц і далей мог бы быць міністрам, калі б не паездка Лукашэнкі ў гаспадарку «Купалаўскае» Шклоўскага раёна. Кіраўніка дзяржавы так абурылі каровы, якія знаходзіліся ў гноі, што ён параўнаў гэтую гаспадарку з Асвенцімам.
У выніку пасадаў пазбавіліся віцэ-прэм’ер Міхаіл Русы, старшыня Магілёўскага аблвыканкама Уладзімір Даманеўскі, а таксама міністр сельскай гаспадаркі Заяц.
Праўда, без працы Заяц пабыў зусім нядоўга. Ад 1 красавіка ён стаў старшынёй Магілёўскага аблвыканкама.
Дачка працуе на «Інтэграле»
Раней міністр жыў у вялікай трохпакаёўцы па вуліцы Варанянскага ў Мінску. Гэта дом, у якім атрымалі кватэры шмат якія чыноўнікі. Цяпер кватэра належыць ягонай дачцэ Наталлі. Ёй 36 гадоў. Яна працуе вядучым інжынерам на прадпрыемстве «Інтэграл».
Свайго мужа — Аляксандра Лагуновіча — Наталля сустрэла ў Маладзечне. Ён крыху маладзейшы за жонку. Гуляе ў хакей у начной лізе ў Мінску. У пары ёсць дачка.
Усё здарылася на Новы год. Смерць самай публічнай супрацоўніцы мінскага АМАПа дагэтуль пакідае пытанні14
Каментары