Сайт BulletinOnline.org паведаміў сэнсацыйныя зьвесткі: халодна прынятая беларускімі гледачамі «Настасься Слуцкая» сабрала ў Расеі 7 мільёнаў даляраў касы. «Куды глядзіць беларуская пракуратура?» — пытаецца аўтар артыкулу Яўген Крастоўскі.
 |
Створаны беларусамі ў 2003 годзе гістарычны мастацкі фільм «Настасься Слуцкая» быў прададзены расейскай кампаніі за сьціплыя 8 з паловай тысячаў даляраў. Новыя ўладальнікі стужкі памянялі назву фільму на «Княгіня Слуцкая» й запусьцілі яе ў расейскія гандлёвыя сеткі. Ужо ў 2005-м з Расеі дайшлі зьвесткі пра посьпех карціны, але названая BulletinOnline.org сума збораў у больш як 7 мільёнаў даляраў ня можа ня ўражваць.
Аўтар артыкулу не назыве крыніцы інфармацыі, таму названай суме няпроста даць веры. У інтэрнэце складана знасьці хоць якія водгукі гледачоў карціны, аўтарытэтны рэйтынг IMDB набраў усяго 8 глядацкіх галасоў, ды і тыя ацанілі фільм вельмі пасрэдна. Падобныя вынікі глядацкай увагі дэманструе і расейскі kinopoisk.ru.
Часопіс Total DVD у сваім аглядзе зьвяртае ўвагу на нізкую якасьць дыску і дае наступную характарыстыку самому фільму: «Замест новага слова ў гісторыі беларускага кіно атрымалася карціна ў найгоршых традыцыях савецкіх гістарычных стужак — сюжэтна няўцямная, з па-аматарску пастаўленымі баямі, кляўстрафабічнымі буйнымі плянамі і трэшавай «аголенкай»…»
Для параўнаньня, шырока разрэклямаваны, высокабюджэтны расейскі фільм гістарычнай тэматыкі «1612» меў непараўнальна большую аўдыторыю, пракат і рэакцыю, а тым ня менш не набраў агулам і 6 мільёнаў даляраў.
Як удалося і ці ўдалося слуцкай княгіні абскакаць такіх паважных канкурэнтаў, застаецца яшчэ адной гістарычнай загадкай.
«Дамоклаў Меч». Канал «Белорусскій сіловік» настолькі прарасійскі, што многія меркавалі, што гэта расіяне яго вядуць. Не, за ім стаіць суперагент Лукашэнкі25
Каментары