Miełatanin dapamoža zasnuć, ale jość niuansy

Miełatanin — heta niejraharmon, jaki naturalnym čynam vypracoŭvajecca ŭ šyškapadobnaj załozie ŭ mozhu. Navukoŭcy adkryli šmat bijałahičnych funkcyj hetaha harmonu — ad baraćby z zapaleńniem da źnižeńnia cisku. Ale hałoŭnaja jaho zadača — stabilizacyja cyrkadnaha rytmu (unutranaha hadzińnika čałavieka), padtrymka sutačnych rytmaŭ snu i aktyŭnaści.

Uzrovień miełataninu pavyšajecca ŭ pieryjad ciemry. Takim čynam mozh atrymlivaje sihnał, što nastała noč i para spać. U dzionny čas jaho ŭzrovień padaje ŭ 10 razoŭ.

Preparaty miełataninu mohuć prymacca ŭnutr dla palahčeńnia zasynańnia, a taksama z metaj karekcyi parušeńniaŭ cyrkadnaha rytmu ŭ rabotnikaŭ sa źmiennym charaktaram pracy, asabliva z načnymi źmienami, abo pry džetłahu — rezkaj źmienie hadzinnych pajasoŭ z-za dalokich pieralotaŭ.

Dakumientalna paćvierdžana, što vypracoŭka miełataninu źnižajecca z uzrostam čałavieka. Akramia taho, u padletkavym uzroście nazirajecca zruch u časie sakrecyi miełataninu, što moža pryvieści da chraničnaha rasstrojstva ŭ vyhladzie vielmi poźniaha zasynańnia (časta paśla hadziny nočy) i poźniaha abudžeńnia. 

Adnak dokazaŭ efiektyŭnaści miełataninu pry lačeńni biassońnicy mała. Pa danych sistematyčnaha ahladu i mietaanalizu 2021 hoda, miełatanin stanoŭča ŭździejničaŭ na jakaść snu ŭ darosłych z reśpiratornymi i mietabaličnymi zachvorvańniami dy pieršasnymi parušeńniami snu, u tym liku z-za džetłahu, ale nie z psichičnymi rasstrojstvami i niejradehienieratyŭnymi zachvorvańniami.

U apošni čas papularnaść miełataninu jak snatvornaha značna ŭzrasła. Niekatoryja prymajuć jaho miesiacami. Ale navukoŭcy papiaredžvajuć pra patencyjnuju škodu hetaha harmona.

Doktar-nieŭrołah, samnołah Alaksiej Małkoŭ adznačaje, što praciahły pryjom miełataninu pryvodzić da taho, što arhanizm pierastaje samastojna vypracoŭvać hety harmon. U vyniku spynieńnie pryjomu jon pryvodzić da parušeńnia snu.

Śpiecyjalisty adznačajuć, što prymianieńnie miełataninu biaśpiečnaje ŭ nizkich dozach (0,5-1 mh) u karotkaterminovych pieryjadach (ad adnaho da troch miesiacaŭ). A voś pryjom «harmonu snu» ŭ dozach ad 1 da 10 milihramaŭ moža pryvieści da dzionnaj drymotnaści, pryhniečanaha nastroju, pačućcia razdražnialnaści, hałaŭnych bolaŭ, bolaŭ u žyvacie.

Jak spravicca biez preparatu?

Ekśpierty źviartajuć uvahu, što jość inšyja pravieranyja sposaby palapšeńnia snu, jakija pracujuć hetak ža dobra, kali nie lepš, čym snatvornyja srodki.

Daśledavańni pakazali, što arhanizm zapavolvaje abo spyniaje vypracoŭku miełataninu pry ŭździejańni śviatła. Najbolšy ŭpłyŭ akazvajuć sini i zialony kolery śpiektru. Jak viadoma, mienavita sini koler źjaŭlajecca asnoŭnaj častkaj bačnaha śpiektru, jaki vypramieńvajecca ekranami ličbavych pryład, takich jak smartfony, płanšety i kampjutary.

Tamu rekamiendujecca admovicca ad ich vykarystańnia za hadzinu da snu, pryniać ciopłuju vannu ci duš, pačytać knihu (možna i elektronnuju ŭ načnym režymie) ci pasłuchać zaspakajalnuju muzyku. Možna pasprabavać hłybokaje dychańnie, johu ci miedytacyju.

Śpiecyjalisty adznačajuć, što kłaścisia spać i ŭstavać nieabchodna kožny dzień u adzin i toj ža čas, navat u vychadnyja dni. Naš arhanizm lubić rucinu.

Kali ž vy pakutujecie na biassońnicu, varta šukać jaje pryčynu, a nie prosta pić snatvornaje.

• 7
• 0
• 0
• 0
• 1
• 0
• 0
• 0