«Pa ŭsio heta treba jechać u Miensk». Na što skardziacca žychary spadarožnikaŭ stalicy, jakija znoŭ uziaŭsia raźvivać Łukašenka

21 kastryčnika, havoračy pra transpartnuju infrastrukturu, Łukašenka prapanavaŭ pabudavać chutkasnyja čyhunačnyja linii da haradoŭ — spadarožnikaŭ Miensku. Na jaho dumku, heta dapamoža razhruzić hustanasielenuju stalicu, a ludziam adtul budzie zručniej dabiracca na pracu ŭ Miensk.

«Treba stvarać narmalnyja nia tolki aŭtamabilnyja, ale i čyhunačnyja, i inšyja šlachi znosin. Šmat raspracovak u śviecie ŭžo jość. Tamu ŭ hetym kirunku nam treba ruchacca, i ŭ nastupnaj piacihodcy pytańni haradoŭ-spadarožnikaŭ, asabliva Miensku, my pavinny vyrašyć», — skazaŭ jon.

Ciapierašnija spadarožniki Miensku — heta Dziaržynsk, Fanipal, Smalavičy, Łahojsk, Zasłaŭje i pasiołak Rudziensk. Ułady nia pieršy raz havorać pra nieabchodnaść ich raźvićcia.

Pavialičyć

U niekatoryja harady — spadarožniki Miensku ŭžo niejki čas možna dabracca ciahnikami haradzkich linij.

Jak ułady raźvivali harady-spadarožniki

Ambitnyja plany rostu haradoŭ-spadarožnikaŭ čynoŭniki ahučyli jašče ŭ 2014 hodzie. Planavałasia, što za 10-15 hadoŭ pryrost žycharoŭ tam składzie 120-130 tysiač. Tolki ź Miensku, pavodle planaŭ, tudy musili pierajechać 50-60 tysiač čałaviek.

Adnak za 10 hadoŭ kolkaść žycharoŭ usich haradoŭ-spadarožnikaŭ vyrasła tolki na 21 tysiaču 31 čałavieka. Heta ŭ šeść razoŭ mienš za zaplanavanaje.

U Rudziensku žycharoŭ stała navat mienš — na 68 čałaviek. A za apošni hod (2023/2024) źmienšyłasia kolkaść žycharoŭ u Zasłaŭi (minus 15) i Dziaržynsku (taksama minus 15 žycharoŭ).

Taksama ŭ haradach-spadarožnikach stali mienš budavać žylla. Kali letaś za pieršyja paŭhoda ŭ Dziaržynskim rajonie, kudy ŭvachodzić Fanipal, pabudavali 37,7 tysiačy kvadratnych metraŭ ahulnaj žyłoj płoščy, to sioleta — 21,4 tysiačy.

U Smalavickim rajonie letaś za paŭhoda zdali krychu bolš za 43 tysiačy kvadratnych metraŭ ahulnaj žyłoj płoščy. A sioleta — 42,6 tysiačy. U Łahojskim rajonie ŭ 2023-m za pieršyja paŭhoda pabudavali 26,3 tysiačy kvadratnych metraŭ žyłoj płoščy. Sioleta — 19,4 tysiačy.

U Puchavickim rajonie, kudy ŭvachodzić Rudziensk, letaś za pieršyja paŭhoda ŭviali ŭ ekspluatacyju 32,8 tysiačy kvadratnych metraŭ žyłoj płoščy. Sioleta za taki ž čas — tolki 20,8 tysiačy kvadratnych metraŭ.

U bolšaści rajonaŭ, dzie mieściacca harady — spadarožniki Miensku, z 2015 hodu nia stała bolš škołaŭ. U Dziaržynskim rajonie ich tak i zastałosia 25, u Puchavickim, dzie mieścicca Rudziensk, była 31 škoła, a stała 28. U Smalavickim rajonie stała na adnu škołu bolš, u Łahojskim na dźvie mienš.

«Kiepskaja vada, nie staje lekaraŭ, nastaŭnikaŭ i hipermarkietaŭ»

«Svaboda» na ŭmovach ananimnaści parazmaŭlała ź niekalkimi byłymi i ciapierašnimi žycharami haradoŭ — spadarožnikaŭ biełaruskaj stalicy. Na ich dumku, znosiny ź Mienskam — važnaje pytańnie. Adnak surazmoŭcy pierakananyja, što chutkasnyja ciahniki nielha budzie puskać kožnyja 20 chvilin. A dabiracca da Miensku biez ułasnaha aŭtamabila žycharam davodzicca časam pa 50 chvilin.

«Jeździć maršrutkami ci elektryčkami štodzień na pracu ŭ Miensk nia vielmi zručna, biez mašyny heta ciažka», — adznačyŭ adzin z surazmoŭcaŭ.

Niekalki čałaviek taksama paskardzilisia na jakaść vady ŭ haradach-spadarožnikach.

«Vada byvaje brudnaja, a byvaje, uletku jaje prosta niama. Prablema pieramiaščacca ź dziciačym vazkom. Vialikaja prablema taksama ź lekarami, jana była zaŭsiody. Niama vuzkich specyjalistaŭ, prablema navat da ŁORa trapić», — pieraličvaje nabalełaje adzin z surazmoŭcaŭ.

Jašče adna prablema, na jakuju źviarnuli ŭvahu surazmoŭcy «Svabody»: brakuje treneraŭ, kiraŭnikoŭ hurtkoŭ, nastaŭnikaŭ i pedahohaŭ. Jość taksama pytańni da zabavaŭ — mała kaviarniaŭ, niama sietkavych kramaŭ i vialikich hipermarkietaŭ.

«Pa ŭsio heta treba jechać u Miensk», — kaža adzin z surazmoŭcaŭ.

• 0
• 0
• 0
• 0
• 0
• 0
• 0
• 0