Były ministr abarony Paŭdniovaj Karei sprabavaŭ skončyć žyćcio samahubstvam
U ofisie prezidenta krainy prachodziać pieratrusy.
Były ministr abarony Paŭdniovaj Karei Kim Jon Chen sprabavaŭ pakončyć z saboj u śledčym izalatary na ŭschodzie Sieuła, paviedamiŭ kiraŭnik ustanovy na słuchańniach u parłamiencie.
Jak raspavioŭ čynoŭnik, ciapier stan eks-ministra nie vyklikaje bojazi. Ź jahonych słoŭ, u situacyju apieratyŭna ŭmiašaŭsia supracoŭnik SIZA, i Kim Jon Chen «nieadkładna admoviŭsia ad sproby».
Incydent adbyŭsia ŭviečary ŭ aŭtorak niezadoŭha da taho, jak sud u Sieule aficyjna aryštavaŭ byłoha ministra pa abvinavačvańni ŭ dačynieńni da arhanizacyi buntu.
Pa źviestkach śledstva, Kim Jon Chen prapanavaŭ prezidentu Paŭdniovaj Karei Jun Sok Jolu abviaścić u krainie vajennaje stanovišča i zahadaŭ raźmiaścić vajskoŭcaŭ u budynku Nacyjanalnaha schodu.
Jun Sok Jol uvioŭ vajennaje stanovišča pozna ŭviečary 3 śniežnia. Parłamient zabłakavaŭ hetaje rašeńnie, paśla čaho prezident byŭ vymušany jaho admianić. Paśla hetaha kiraŭnik Minabarony padaŭ u adstaŭku, pačałosia rasśledavańnie.
Sam prezident taksama prachodzić pa spravie, jamu zabaroniena pakidać krainu. U sieradu palicyja pryjšła ŭ jaho ofis ź pieratrusami.
Kim Jon Chen, jakoha zatrymali ŭ minułuju niadzielu, u aŭtorak prynios prabačeńni, zajaviŭšy praz advakataŭ: «Usia adkaznaść za hetuju situacyju lažyć vyklučna na mnie».
Jon vybačyŭsia pierad paŭdniovakarejskim narodam i skazaŭ, što jaho padnačalenyja «prytrymlivalisia zahadaŭ i vykonvali ŭskładzienyja na ich abaviazki».
Akramia ofisa prezidenta, paŭdniovakarejskaja palicyja taksama praviała pieratrusy ŭ ofisach palicyi Sieuła i padraździaleńnia, jakoje adkazvaje za achovu budynka parłamienta.
Pa danych Yonhap, prezident pry pieratrusach nie prysutničaŭ, adnak jaho imia było ŭkazana siarod padazravanych u ordary na pieratrus.
Taćciana Zareckaja bolš nie estonskaja startapierka. Ciapier jana sprabuje stać pasiarednicaj inviestaraŭ u Saudaŭskaj Aravii4
Kamientary