Akciory, jakija hrali ŭ RTBD i Vialikim teatry, z partniorami stvarajuć u Varšavie kafe-kamjunici — naviedalisia da ich u hości
«Nas u kamandzie šeść čałaviek-partnioraŭ: ja, Daša, Naścia i Paša, Loša i Hiena. Chto z opiery, chto z dramteatra, chto z režysury, chto z muzyki — usie tvorčyja. Bolšaść źjechała ź Biełarusi paśla 2020-ha i nichto dahetul nie mieŭ dośviedu ŭ hramadskim charčavańni», — koratka znajomić z kalektyvam varšaŭskaha kafe Michelle Andrej Novik, u minułym zorka teatra biełaruskaj dramaturhii. U kaviarni jon — adzin z hałoŭnych kucharaŭ. A jaho žonka Darja, u Biełarusi śpiavaŭšaja ŭ Vialikim teatry, — adkaznaja za viehanskija torty.
Pahutaryli ź imi pra toje, jak jany pačuvajuć siabie ŭ novym ampłua, pra firmovyja stravy i tvorčaść.
«Chočam mieć nie prosta kaviarniu, a teatralna-muzyčnaje kamjunici»
Historyja kafe Michelle z novaj kamandaj pačała pisacca 1 lipienia. Da hetaha pa adrasie Grochowska, 282 užo pracavała kaviarnia, i va ŭładańnie biełarusam dastaŭsia hatovy biznes, u jaki jany ŭdychajuć novaje žyćcio.
«U nas ni ŭ kaho nie było dośviedu pracy z kafe, ale kali Naścia z Pašam daviedalisia, što taki biznes pradajecca, bo papiarednija ŭładalniki pierajazdžajuć u ZŠA, prapanavali nam razam ź Lošam i Hienam uziacca za jaho, ryzyknuć. My chočam mieć nie prosta kaviarniu, a teatralna-muzyčnaje kamjunici», — raskazvaje Andrej Novik.
Razam z žonkaj Darjaj i hadavałym synam jany źjechali ź Biełarusi ŭ Polšču ŭ 2021 hodzie. Niezadoŭha da emihracyi akcior padtrymaŭ usieahulnuju zabastoŭku, jakuju ŭ kastryčniku 2020-ha anansavała Śviatłana Cichanoŭskaja, i napisaŭ zajavu na zvalnieńnie z RTBD. Darja na toj momant była ŭ dekretnym adpačynku, ale na scenu paśla jaho taksama nie viarnułasia: u Vialikim teatry pačalisia čystki niazhodnych, i žančyna vyrašyła zvolnicca.
Dva z pałovaj hady Andrej prapracavaŭ u Varšavie kurjeram słužby dastaŭki. Paralelna praciahvaŭ zajmacca teatram. Razam z adnadumcami zasnavali novy niezaležny kalektyŭ — BY teatr. Darja paśpiachova dałučyłasia da niekalkich polskich prajektaŭ, vykładaje vakał i zajmajecca ŭłasnym hukavym teatram. Usio heta jany ciapier buduć sumiaščać z novymi abaviazkami pa kafe, dzie, pa ich słovach, kožny robić usio, padmianiajučy adno adnaho.
Zvarot Andreja ŭ 2020-m. Apošnim časam hladač moh bačyć akciora ŭ biełsataŭskim sieryjale «Pracesy» ci ŭ filmie «U žyvym efiry» Mary Tamkovič. Vosieńniu razam z BY teatr jany znoŭ płanujuć pakazy śpiektakla «Z@mova», stvoranaha pa matyvach piesień i rytuałaŭ Paleśsia (režysior Maksim Šyško). Taksama śviet pabačyć novy prajekt Andreja — čytańnie pjesy «Maju nachabstva być» Dzijany Bałyka, pryśviečanaj pamiaci Alesia Puškina.
«My paścilisia na praciahu 12 hadoŭ zapar, za hety čas sabrałasia šmat receptaŭ smačnaj viehanskaj ježy»
«Pieršyja dva tydni było, kaniečnie, ciažkavata pryzvyčaicca da kuchni i rytmu tam. Usio ž, kali hatuješ doma, nie dumaješ pra chutkaść, — dzielicca Darja. — Ja lubiła piačy torty doma — dla siabroŭ, na dni narodzinaŭ, upryhožvała ich sama, ale tolki tut heta pačałosia na stałaj asnovie. Andrej ža pastajanna niešta smačnaje doma hatuje — heta prosta niemahčyma (paśmichajecca).
Što važna — my paścilisia na praciahu 12 hadoŭ zapar, i viečna šukali cikavyja raślinnyja spałučeńni, smaki, ekśpierymientavali. I za 12 hadoŭ u nas sabrałasia vielmi šmat receptaŭ smačnaj viehanskaj ježy. Da nas u kafe zavitvali ź inšych haradoŭ i ździŭlalisia, jak pa-inšamu tut smakujuć zvykłyja im stravy».
«Prapanovu pra BDSM-viečarynu adchilili»
Uziacca za kafe — heta surjozny vyklik dla ŭsich u kamandzie, ale kožny hladzić na situacyju z pazityvam: «luby novy krok — heta ruch napierad».
U vieraśni ŭłaśniki chočuć atrymać licenziju na ałkahol, kab mieć mahčymaść prapanoŭvać u mieniu vino. Da piatničnych tvorčych viečaroŭ nieŭzabavie dadaducca i subotnija. Dniom ža ŭ vychodnyja kaviarnia adkrytaja dla praviadzieńnia majstar-kłasaŭ.
«Prapanovu pra BDSM-viečarynu my adchilili, a tak adkrytyja dla roznych idej, — paśmichajecca Andrej. — My chočam dać placoŭku akcioram i muzykam, stendapieram. Taksama ŭ nas buduć ładzicca vystavy roznych biełaruskich mastakoŭ.
Adzin z zapłanavanych kancertaŭ na placoŭcy — solnik samoj Darji:
«Spačatku chaču vystupić z kavierami. I ŭ pieraryvach, kab razbavić kancert, mahčyma, budzie stendap ad mianie. U mianie jość šmat dumak, chočacca imi ź ludźmi padzialicca, parazmaŭlać».
Svajo 35-hodździe jana taksama maryć adznačyć u hetych ścienach:
«Ja ŭžo siomy hod pišu albom. Spadziajusia, u śniežni atrymajecca zrabić paŭnavartasnuju prezientacyju. Usie pieśni i muzyka na im — majho aŭtarstva, na anhlijskaj movie. Ale biez sutvorcy, aranžyroŭščyka, teatralnaha kampazitara, Mikity Załatara ŭ mianie b ničoha nie atrymałasia».
«Heta ščaście, kali nie siadziš na adnym miescy»
Surazmoŭcy pryznajucca, što praz dva miesiacy vałodańnia kafe źnikła adčuvańnie taho, što heta praca.
«Heta nibyta moj druhi dom, kudy ja pryjazdžaju i kłapačusia pra jaho, pra našych haściej», — dzielicca adčuvańniami Darja.
Dadatkova pačućcio doma stvarajuć susiedzi. Tak, Noviki pasiabravali ź siamjoj emihrantaŭ-ukraincaŭ źvierchu — ciapier, pakul baćki pracujuć, ich syn časta zastajecca tam, znajšoŭšy ŭ tych ścienach siabroŭku.
Andrej nie chavaje, što, choć sumiaščać i teatr, i zdymki ŭ kino, i kaviarniu niaprosta, jon tak ci inakš kajfuje ad pieraklučeńnia na roznyja vidy dziejnaści.
«Heta ščaście, kali nie siadziš na adnym miescy. Ja sapraŭdy ščaślivy, što my sprabujem siabie ŭ novych roznych rečach. I pakul, padajecca, u nas dobra atrymlivajecca».
Padtrymka, jakuju ŭ Polščy vyłučali i biełaruskim teatram, stała dastupnaj tolki ŭkraincam? Razabralisia, što adbyvajecca i jak žyvie niezaležny teatr za miažoj
Režysior Darja Žuk rychtuje navukova-fantastyčnuju dramu-antyŭtopiju pra telepartacyju ŭ Biełaruś
Jakaja sietka kafe samaja raspaŭsiudžanaja ŭ Biełarusi? Heta nie «Burhier Kinh» i nie były «Makdonalds»
Kamientary
• RASIEJSKIJA NICI •
📿 Iznoŭ sunuć biełarusaŭ u piatlu «vielikoho i mohučieho». Nu, źjaviłasia ŭ maskoŭcaŭ čarhovaje modnaje «słofco» «komjuniti», dyk navošta hetuju rasiejščynu adrazu ciahnuć piščom u našu movu?!
🐹 I chaj chamiački nie pierakonvajuć siabie j inšych, što jano byccam z anhielskaje. Bo, zhodna z tranślitaracyjaj (pa prykładu «kamputaru»), pa-nasku słušna tolki «kamunity», «kamunyty»... Kamu, nu, ty heta davodziš? Usie j tak zdavion kažuć «kamuna», «kamunist» i im padobnaje — a nie «kamjuna», «kamjunist»! Nie, tutaka treba znoŭ, małpujučy, pierajmać u rasiejcaŭ, mižvoli śćviardžajučy, što my kštałtu ichnija małodšyja braty.
🧵 Pa-druhoje, kali z anhielskaj, to čamu naprykancy niejkija -nici? Pa-anhielsku ž i hučyć «community» jakraz z -nyty. Ale, padobna, chałujskija nici źnitavali hetym vo vušy j vočy.
.