«Usio štatna», ale miery prymajucca. Što ciapier adbyvajecca vakoł Kurskaj AES
Uzbrojenyja siły Ukrainy ŭžo čaćviorty dzień znachodziacca na terytoryi Kurskaj vobłaści i ŭziali pad kantrol jak minimum 20 nasielenych punktaŭ. Ad Kurskaj AES jany znachodziacca jašče za niekalki dziasiatkaŭ kiłamietraŭ, ale na stancyi, jak paviedamlajecca, užo tryvožacca i robiać niekatoryja padrychtoŭčyja zachady.
Pavodle infarmacyi miascovych praŭładnych ŚMI, padjezdy da Kurskaj AES ciapier pierakrytyja. Technična heta vyrašajecca lohka, pakolki, jak skazaŭ supracoŭnik AES, «tam dźvie darohi, na ich błok-pasty, pastavić achovu nie prablema».
Na błokach novaj atamnaj stancyi, jakaja ciapier budujecca pobač sa staroj, usio abiastočana, bolšaść budaŭnikoŭ pakinuła abjekt. Pra źmianšeńnie kolkaści piersanału aficyjna paviedamiŭ «Rasatam».
Pavodle infarmacyi vydańnia «Važnyje istorii», jašče z 7 žniŭnia z budplacoŭki AES stali źjazdžać budaŭniki-vachtaviki — ich 10 tysiač u 40-tysiačnym Kurčatavie.
«Tyja śpiecyjalisty, što zastalisia na budplacoŭcy, viaduć raboty ŭ adpaviednaści z hrafikam. Usie sistemy, jakija zabiaśpiečvajuć chod zbudavańnia enierhabłokaŭ, pracujuć štatna», — zajavili ŭ pres-słužbie hienieralnaha padradčyka.
Na dziejnaj AES zapeŭnivajuć, što achova stancyi ŭkamplektavanaja i maje dastatkova srodkaŭ dla abarony. Na fonie ŭstupleńnia ŭkrainskich vojskaŭ u rehijon jana, maŭlaŭ, pracuje ŭ štatnym režymie. «Važnyje istorii» daviedalisia, što na słužbu ŭ achovie AES viarnuli mužčyn-rashvardziejcaŭ, bo raniej tam u asnoŭnym pracavali zbolšaha žančyny.
Pa słovach krynicy tych ža «Važnych istorij», kiraŭnictva AES rekamiendavała supracoŭnikam AES uziać adpačynki za svoj košt i evakujavać dziaciej.
Miž tym miascovyja pabliki paviedamlali, što nad Kurčatavam nibyta prahrymieŭ mocny vybuch.
Pavodle danych Z-kanałaŭ, pieradavomu atradu USU ŭdałosia dajści da vioski Kromskija Byki, jakaja raźmieščanaja prykładna za 30 km ad AES. Jašče bližej, na adlehłaści 15 km, znachodzicca trasa Kursk — Lhoŭ — Rylsk, kantrol nad jakoj dazvolić ukrainskim siłam ruchacca na ŭschod u bok Kurčatava.
Ad pracy AES, jakaja raźmieščanaja za 60 kiłamietraŭ ad ukrainskaj miažy i składajecca z čatyroch błokaŭ, zaležać 90% pramysłovych pradpryjemstvaŭ Kurskaj vobłaści, jana pastaŭlaje elektraenierhiju ŭ 19 rehijonaŭ Centralnaj fiederalnaj akruhi.
Akramia taho, Kurskaja AES ciapier adzinaja ŭ Rasii stancyja, dzie aktyŭna budujucca novyja inavacyjnyja enierhabłoki. U 2023 hodzie na novabudoŭlu dastavili korpus reaktara.
Nie dziŭna tamu, što bližej da jaje ciapier pierakinutyja «atrady śpiecyjalistaŭ z SSA i FSB, jakija pavinny zabiaśpiečyć biaśpieku stratehičnaha abjekta». Taksama jašče ŭčora paviedamlałasia, što kala AES raźmiaščajuć kompleksy «Pancyr», a taksama «abstalujuć dadatkovyja rubiažy abarony».
Mer Kurčatava Ihar Karpunkoŭ siońnia papiaredžvaŭ žycharoŭ ab napružanaj situacyi ŭ rehijonie i zaklikaŭ ich nie paddavacca panicy.
U Mižnarodnym ahienctvie pa atamnaj enierhii (MAHATE) zajavili, što sočać za paviedamleńniami pra padziei vakoł Kurskaj vobłaści, dzie raźmieščanaja AES, i znachodziacca ŭ kantakcie z RF i Ukrainaj. Pakul, maŭlaŭ, niama padstaŭ dla zaniepakojenaści adnosna jadziernaj biaśpieki.
U PVK «Vahnier» zajavili ab žadańni ŭziać udzieł u bajach u Kurskaj vobłaści
Minabarony Rasii paviedamiła pra pierakidku vajskovaj techniki ŭ Kurskuju vobłaść
Mer Kurčatava, dzie znachodzicca Kurskaja AES, zajaviŭ ab napružanaj situacyi i bajach za dziasiatki kiłamietraŭ ad horada
Minabarony Rasii paviedamiła ab «praduchileńni rejdaŭ USU ŭhłyb Kurskaj vobłaści»
U Kurskaj vobłaści ŭkraincy źniščyli rasijskuju vajskovuju kałonu VIDEA
U pucinskaj administracyi prydumali paraŭnoŭvać ciapierašnija padziei ŭ Kurskaj vobłaści ź bitvaj na Kurskaj duzie
Čały: Čym daŭžej Łukašenka marudzić z vybarami, tym bolš arhumientaŭ, kab jamu nie iści8
Kamientary